2 Korintus 6
6
1Mewaliꞌ, ingka hieꞌe, majamaka moꞌawa hante Pueꞌ Ala mampowute pohawaꞌNa pe toaꞌ. Iomo horiana kiperapiꞌ mpololeke halali-halali, hingkeꞌna inioꞌ idangkeleꞌikei komarimane Pueꞌ Ala pe ingkei. 2#Yes. 49:8I lali Suraꞌ Mangkolehi, notiꞌi Pueꞌ Ala waheꞌe:
“I tempo to Kupokononto, Kupehoromua pekokaemi,
I ando koKuposalamaꞌmi, Kusulungikei ka pehuku dosami.”
Halali-halali, kutiꞌikikei: hinewowoꞌenamo tempone to nopokononto Pueꞌ Ala mamposalamaꞌkei.
Hi Paulu norumpa woriꞌ komaporiꞌ
3Aku hante awangku majamaka, hangangaa kikororomiꞌi hingkeꞌna hawaꞌi uwaꞌ komasalaꞌne waliangki horiana hawaꞌi uwaꞌ to nipokonawuꞌ, hei hingkeꞌna hawaꞌi uwaꞌ toaꞌ to wadi mosalaꞌi jamangki mampowute hawaꞌna Pueꞌ Ala. 4Iomo horiana, i langkaꞌ-langkaꞌna kiwali nturusi hapo to moromiꞌ, hingkeꞌna tongawa koꞌingkana topajamane Pueꞌ Ala to mononto, moliu i kokiriina molangkaꞌ-langkaꞌ komaporiꞌ. 5Nikondoka, nitarungkuꞌka, hei nipaduluka.#6:5 Rapaꞌna: basa Sur. 13:50, 19:23-41. Majamaka madori horiana woriꞌ mpiha hawaꞌka hohumbo leꞌo hei hawaꞌka hohumbo mangka. 6I langkaꞌ-langkaꞌna, mombaha koꞌingkana topajamane Pueꞌ Ala, alaꞌ:
Mononto lalingki,
kibahaꞌ hawaꞌne Pueꞌ Ala,
sabaraꞌka,
moromiꞌ lalingki pe lekiꞌ-lekiꞌna toaꞌ,
norandaka Inohaꞌ Mangkolehi,
hei mampokarimaka hangko awangki ka kopopuhiꞌna lalingki,
7kipopatengkaꞌ jamangki ka kuasaꞌ to kihua ka Pueꞌ Ala. Waliangki to mononto i peꞌoꞌelena Pueꞌ Ala to mewali piho hante labangki mantahaka moꞌewa poniꞌki.#6:7 I lali wiharo Yunani: parewa moponiꞌ i korawe koiri hante koana. Basa woꞌo Rm. 6:13, 13:12; 2Kor. 10:4; Eps. 6:11-18; 1Tes. 5:8.
8Kipopatengkaꞌ nturusi jamane Pueꞌ Ala, moromiꞌ roꞌadaꞌika ba ropononaꞌaka; niperenakika ba nipokonawuꞌka. Kehapoꞌi kitiꞌi hapo to tuꞌu, angkana uwaꞌ to mantiꞌi topowutika. 9Uwaꞌ toaꞌ to mopangakuꞌ ingka rumbaꞌanaka Pueꞌ Ala, uwaꞌ woꞌo to mosapuakaka. Woriꞌ komaporiꞌ to morumpaka horiana ingka hibalika toaꞌ to hingkiꞌ mahi, angkana tuwuꞌka tene! Nikondoka, angkana hawaꞌka mahi. 10#Rm. 8:32; Eps. 1:3-8; Kol. 1:9-14Pehoringki maporiꞌ, angkana motanaꞌ lalingki. Merima-rima tuwuꞌki, angkana ingka to mangkomika pebarakati ka Pueꞌ Ala pe toaꞌ to woriꞌ. I pampeꞌelena toaꞌ, woriꞌ komakuraꞌki, angkana kotuꞌuana lekiꞌna uwaꞌ i ingka.
11Halalingku toKorintus! Ohina lalingki kipowutekikei, hei kipokarimakei. 12Handoꞌio ingka to hawaꞌi marima pe ingkei, angkana ingkei wae to hamboaꞌmo marima pe ingka. 13Pololitangku hieꞌe, hibaliꞌa mololita pe anaꞌku hadoduongku, io horiana kuperapiꞌ hingkeꞌna ipokarimaka, hibali ingka woꞌo marima pe ingkei!
Inioꞌ mohintuwuꞌ hante toaꞌ to hawaꞌi mepoꞌohi pe Pueꞌ
14Inioꞌkei mohintuwuꞌ hante toaꞌ to hawaꞌhi mepoꞌohi pe Pueꞌ Yesu.#6:14 inioꞌkei mohintuwuꞌ hante toaꞌ to hawaꞌhi mepoꞌohi pe Pueꞌ Yesu Rapaꞌna: inioꞌ mangkohamokoi toaꞌ to hawaꞌi mepoꞌohi, ba mobisnis moꞌawa, ba mopolitik. Wadireꞌi toaꞌ to mampetuntui peleihane Pueꞌ Ala mohintuwuꞌ hante toaꞌ to mosapuaka Pueꞌ Ala?#6:14 Wadireꞌi toaꞌ to mampetuntui peleihana Pueꞌ Ala mohintuwuꞌ hante toaꞌ to mosapuaka Pueꞌ Ala? Wadi woꞌo nilimba: Wadireꞌi toaꞌ to mononto waliare mohintuwuꞌ hante toaꞌ to kodake waliara? Wadireꞌi to mobaro mampahamoloꞌ hante to mokorindi? 15Wadireꞌi Kerisitu mohintuwuꞌ hante Belisiꞌ?Wadireꞌi toaꞌ to mepoꞌohi mohintuwuꞌ hante toaꞌ to hawaꞌi mepoꞌohi? 16#Im. 26:12; Yeh. 37:27Hapo kohibaliane tambina Pueꞌ Ala hante tambi penombaha pe lente lomoa? Hawaꞌi uwaꞌ kohibobaliane! Ingkiꞌ hieꞌe wadi nipandiriꞌ hibali tambina Pueꞌ Ala, alaꞌ Pueꞌ Ala to tuwuꞌ uwaꞌ i lalinta. Notiꞌi waheꞌe:
“Hingkiꞌ meꞌohaꞌA i lumbura
hei hingkiꞌ Kupoꞌawahi.
Aku hingkiꞌ mewali Pueꞌ Alara,
hei iohi hingkiꞌ mewali toaꞌKu.
17 #
Yes. 52:11
Mewaliꞌ, hangangaa ipolihikei toaꞌ to hawaꞌhi pobahaꞌA.
Inioꞌhi nipohintuwuꞌki!
Ipomoꞌelakei wotami ka lekiꞌ-lekiꞌna waliara to kodake.
Ane iwalikei hatoꞌo, hingkiꞌ Kutorimokei.
18 #
2Sem. 7:14; 1Dat. 17:13; Yes. 43:6; Yer. 31:9 Aku hingkiꞌ mewaliꞌA Umoꞌmi, hei ingkei woꞌo hingkiꞌ mewalimokei anaꞌKu.”
Hatoꞌomo pantiꞌine Pueꞌ Ala
to meliu kuasaꞌNa ka lekiꞌna to uwaꞌ.
Currently Selected:
2 Korintus 6: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
