2 Korintus 2
2
1Mewaliꞌ, kutiꞌi i lalingku: inioꞌkei dulu ako kukadoroꞌi, alaꞌ hawaꞌi kulei mampomaporiꞌ womo lalimi, hibali to mewali hampiha i tempomi kukadoroꞌi. 2Alaꞌ ane kupomasusa womoꞌi lalimi, hihimoreꞌi to kupohinaru hingkiꞌ mampododoliꞌa? Bateꞌnalu ingkei to kahampihamo kupomasusa lalimi. 3Iomo tungkaihangka hinaꞌ kupokatumo haꞌanu suraꞌ pe ingkei hampiha,#2:3 Suraꞌ to notungkai hi Paulu iseꞌe hamboaꞌmo uwaꞌ. Kotuꞌuana, iba suraꞌ to nopokatu hi Paulu pe toKorintus. To kaꞌisaꞌ hante to katolu hamboaꞌmo uwaꞌ. (1Kor. 5:9.) hingkeꞌna ane mehupaꞌa, hamboaꞌmo ipomasusakei lalingka. Alaꞌ kotuꞌuana, ingkei wae to hangangaa mampomotanaꞌ lalingku. Hei kupoꞌohi, ane motanaꞌa, ingkei woꞌo hingkiꞌ motanaꞌ. 4I tempona kuꞌukiꞌ suraꞌ tiꞌo hampiha, maporiꞌ mpololeke kuhori hei kupohanondoiha; tidoꞌmo uwai matangka. Hawaꞌi kuꞌukiꞌ suraꞌ tiꞌo hingkeꞌna kupomasusaꞌi lalimi, angkana suraꞌ tiꞌo kuꞌukiꞌ hingkeꞌna ibahaꞌkei hohumbo kokodeꞌne rimangku pe ingkei.
Hi Paulu merapiꞌ hingkeꞌna tokorintus moꞌampuni awara to masalaꞌ
5Hinewowoꞌena kukodokoꞌi moꞌukiꞌ noniuꞌ waliana haduo toaꞌ i lumbumi to masalaꞌ mpololeke. Waliana tiꞌo handoꞌiolu aku to nopomasusa, angkana mampomasusa woꞌo lekiꞌna lalimi ba hadolaꞌ ka ingkei. Hawaꞌi kulei motambai-mbai hapo to mewali. 6Woriꞌkei to mobutusi toaꞌ tiꞌo hangangaa nihuku, hei kutiꞌikikei, ganaꞌmo pehukumi i io. 7Hinewowoꞌena hangangaa niꞌampuni hei ipododoli laline toaꞌ tiꞌo, hingkeꞌna hawaꞌi rahi masusa pekirine wute hamboaꞌmo uwaꞌ pepohinaruane. 8Iomo horiana kuperapiꞌ hingkeꞌna ipotongawakei komarimami pe io. 9I lali suraꞌku to kupokatumo pe ingkei,#2:9 Suraꞌ to notungkai hi Paulu tiꞌo, hamboaꞌmo uwaꞌ. Basa hapo to teꞌukiꞌ i lalana katolu. hawaꞌkei kurumbaꞌ mohuku toaꞌ tiꞌo. Tungkaihangku moꞌukiꞌ suraꞌ tiꞌo, kupampeꞌeleikei, ba hingkiꞌ ipetuntuikei lekiꞌ-lekiꞌne hawaꞌka ba hawaꞌi. 10#Mat. 18:18; Yoh. 20:23Angkana hinewowoꞌena kutiꞌikikei: ane iꞌampunikei salaꞌne awami, aku woꞌo hingkiꞌ moꞌampuniꞌi. Ane uwaꞌ salaꞌna pe aku, kuꞌampuni i hinarona Kerisitu! Kuwali hatoꞌo alaꞌ koꞌingkeina. 11#Pwl. 3:1-7Iomo horiana kutiꞌi, hangangaa toꞌampuni toaꞌ to masalaꞌ, hingkeꞌna hawaꞌi uwaꞌ tempone Belisiꞌ monaniki, alaꞌ tobahaꞌ: Belisiꞌ tiꞌo mapande moꞌakalai toaꞌ hingkeꞌna monawuꞌhi pe lali dosa.
Lalina hi Paulu hawaꞌi tinto, alaꞌ handoaꞌi tene uwaꞌ kareba ka tokorintus
12 #
Sur. 16:8; 20:6; 2Tim. 4:13 Kololiuhana halali-halali, hampiha i kopolaingku ka kota Epesu, nolouꞌa pe kota Troas mampowute Kareba Moromiꞌ noniuꞌ Kerisitu. I kohupaꞌku i Troas, Pueꞌ mampaniꞌa lala hingkeꞌna majamaꞌa itoꞌo. 13Angkana kehapoꞌi hatoꞌo, hawaꞌi tinto lalingka, alaꞌ hi Titus handoaꞌi tene mahuliꞌ mampowute kareba ka ingkei toKorintus. Iomo horiana mesabiꞌmoꞌa pe halali hampepoꞌohingku to uwaꞌ i Troas, hingkeꞌna humeiꞌa iseꞌe i woiꞌ Makedonia mampaliꞌ hi Titus.
Hi Paulu mampololita pajamana mampowute Kareba Moromiꞌ
14Angkana kutiꞌi woriꞌ komoromiꞌ pe Pueꞌ Ala, alaꞌ pohintuwuꞌki hante Kerisitu, penanika, hei Io mewali tadulakongki to morandaka nturusi. Pueꞌ Ala mampowute Kareba Moromiꞌ moliu i ingka pe lekiꞌ-lekiꞌna toaꞌ i imbo-imbolu, hingkeꞌna wadihi woꞌo pobahaꞌ Pueꞌ Ala. Kareba Moromiꞌ tiꞌo wadi nipandiriꞌ hibali bokaꞌ to mewowau. 15-16Nokomi pampowutengki kareba noniuꞌ i Kerisitu, iomo horiana mewowauka i pampeꞌelena Pueꞌ Ala, hei i lumbura lekiꞌ-lekiꞌna toaꞌ. I toaꞌ to mampoꞌohi Kareba Moromiꞌ, nipandiriꞌka hibali dupaꞌ to mewowau, alaꞌ kipowutekihi kareba to mangkomihi pe kotuwuꞌ to wolaꞌ to hawaꞌi mokoꞌukoa. Angkana i toaꞌ to mosapuaka Kareba Moromiꞌ, ingka to mampowute Kareba Moromiꞌ tiꞌo, nipandiriꞌka hibali wau to mahi, alaꞌ kipowutekihi kohingkiꞌ nohukure Pueꞌ Ala wute nantolou-louna.
Uwaꞌreꞌi to pobiaꞌ mampopatengkaꞌ jama hieꞌe hante rohona hadoduona? 17Ingka hieꞌe, hawaꞌka hibali toaꞌ to mampaliꞌlu rasiꞌ ka pampowuteki hawaꞌna Pueꞌ. Angkana, alaꞌ kibahaꞌ Pueꞌ Ala to moꞌuwiꞌka mampopatengkaꞌ jamaNa, hei Io mampeꞌele pajamangki tiꞌo, iomo horiana kipowute hawaꞌne Pueꞌ ka lalingki mpololeke alaꞌ pohintuwuꞌki hante Kerisitu.
Currently Selected:
2 Korintus 2: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
