1 Korintus 2
2
Hi Paulu mampowute Kareba Moromiꞌ ka kuasaꞌna Inohaꞌ Mangkolehi
1 #
Sur. 18:1-11
Halali-halali, i kohupaꞌku i kotami hampiha, kupowutekikei kareba to ka Pueꞌ Ala to tewowuni tene. I tempo tiꞌo, hawaꞌa mopakeꞌ lolita to dingkaoꞌ, ba lolita to motuntuni komapandengku hadoduongku. 2Kuwali hatoꞌo, alaꞌ kupokononto i lalingku, hawaꞌa hingkiꞌ mampololita to ntaniꞌna i lumbumi, bateꞌnalu hi Yesu Kerisitu to nipaku i loti momehulepe wute mahi. 3Kolentuꞌaku tene uwaꞌ moꞌawa hante ingkei, moledeꞌa, hante mororidiꞌa nokomi komorokaꞌku. 4Kareba to kupowutekikei tiꞌo, hawaꞌi kupowute motuntuni komapandengku hadoduongku, angkana kuasaꞌna Inohaꞌ Mangkolehi to mampotongawa kotuꞌuna kareba to kupowute tiꞌo, 5hingkeꞌna mepoꞌohikei. Hei pepoꞌohimi tiꞌo hawaꞌi mehupaꞌ ka komapandena toaꞌ, angkana mehupaꞌ ka kuasaꞌna Pueꞌ Ala.
Inohaꞌ Mangkolehi to mamponobahaꞌiki poturuꞌ to ka Pueꞌ Ala
6Kehapoꞌi hatoꞌo, ane mololitaka pe toaꞌ to marohomo pepoꞌohire pe Kerisitu, uwaꞌ mpuꞌu komapandengki. Angkana komapandengki tiꞌo, hawaꞌi hibali komapandera toaꞌ to hawaꞌi mepoꞌohi pe Pueꞌ Ala ba komapandera tadulako i duniaꞌ, alaꞌ kuasaꞌra tadulako i duniaꞌ hieꞌe hingkiꞌ moholi. 7#Rm. 8:18, 30; 9:23; Eps. 5:27; Kol. 3:4; 1Tes. 2:12; 2Tes. 2:14; 2Tim. 2:10; Ibr. 2:10; 1Ptr. 5:10Kopebahaꞌ to kipowutekimokikei, iomo tungkaihane Pueꞌ Ala. Hampiha, tungkaihaNa tiꞌo tewuni tene, hawaꞌi robahaꞌ toaꞌ. Angkana ikohandoaꞌana tene Nowali duniaꞌ hieꞌe, Pueꞌ Ala mampokononto umbiꞌ kohingkiꞌ Nopaꞌaninta kotuwuꞌ to wolaꞌ to hawaꞌi mokoꞌukoa hingkeꞌna manobaꞌki woꞌo. 8Hampiha tadulako i duniaꞌ hieꞌe, hawaꞌi robahaꞌ tungkaihane Pueꞌ Ala, alaꞌ ane kerobahaꞌi, kehawaꞌhi mopaku Pueꞌta to manobaꞌ tuwuꞌNa i loti momehulepe. 9#Yes. 64:4; 65:17; 52:15Angkana hibali to teꞌukiꞌ i lali Suraꞌ Mangkolehi:
“Hihimo to mampokarima Pueꞌ Ala,
Nopatimomokimohi to moromiꞌ mpololeke,
to handoaꞌi tene roꞌokiꞌ ba rohori toaꞌ,
hei to handoaꞌi tene uwaꞌ i pekirina toaꞌ.”
10Ingkiꞌ hieꞌe, tobahaꞌmo tungkaihana Pueꞌ Ala, alaꞌ tungkaihaNa tiꞌo noponobahaꞌimoki Pueꞌ Ala moliu Inohaꞌ Mangkolehi. Hei hawaꞌi uwaꞌ to tewuni i Inohaꞌ Mangkolehi, alaꞌ Io to moparesaꞌ lekiꞌna, tepekahi tungkaihane Pueꞌ Ala to handoaꞌi tene robahaꞌ toaꞌ. 11Alaꞌ to pobahaꞌ hapo to uwaꞌ i pekirina haduo toaꞌ, iolu hadoduona. Hatoꞌo woꞌo, to pobahaꞌ hapo to uwaꞌ i pekirina Pueꞌ Ala, bateꞌnalu Inohaꞌna Pueꞌ Ala hadoduona. 12Hei ingkiꞌ hieꞌe, hawaꞌki pahua pekiri ka duniaꞌ hieꞌe, angkana pahuaki pekiri ka Inohaꞌna Pueꞌ Ala hingkeꞌna tobahaꞌi lekiꞌna to nopaꞌanikiki ntontooꞌ Pueꞌ Ala ka kopopuhiꞌna laliNa.
13Mewaliꞌ, ane mampowuteka Kareba Moromiꞌ, hawaꞌkei kipowuteki motuntuni komapandengki hadoduongki, angkana kipowute kareba tiꞌo hante lolita to ka Inohaꞌ Mangkolehi pe toaꞌ to pahuahi Inohaꞌ Mangkolehi.
14Toaꞌ to hawaꞌi pobahaꞌ Pueꞌ Ala, hawaꞌhi mamponiuꞌ poturuꞌ to ka Inohaꞌna Pueꞌ Ala, alaꞌ rotiꞌireaꞌ, “Poturuꞌ tiꞌo hawaꞌi mekahi i akala.” Hawaꞌi mekahi i pekirira poturuꞌ to ka Inohaꞌna Pueꞌ Ala, alaꞌ Inohaꞌ Mangkolehi hawaꞌi majama i lalira. 15Ingkiꞌ to pahuamo Inohaꞌ Mangkolehi, mononto lalinte mampopoꞌori lekiꞌna: ba moromiꞌi ba hawaꞌi. Angkana toaꞌ to hawaꞌi pobahaꞌ Pueꞌ Ala, hawaꞌi robiaꞌ moparesaꞌ hapo to uwaꞌ i lalinta, 16alaꞌ teꞌukiꞌmo i lali Suraꞌ Mangkolehi:
“Himoreꞌi to pobahaꞌ pekirina Pueꞌ Ala?
Himoreꞌi to wadi mampoturuꞌ Pueꞌ Ala?” (Yes. 40:13)
Angkana ingkiꞌ hieꞌe, nopaꞌanimoki Pueꞌ Ala pekiri to hibali hante pekirina Kerisitu.
Currently Selected:
1 Korintus 2: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
