1 Korintus 16
16
Pesulungi pe jumaꞌa i Yerusale
1Kololiuhana halali-halali, hingkiꞌ mololitaꞌa noniuꞌ i doiꞌ to hingkiꞌ nirampu hingkeꞌna mosulingikei toaꞌna Pueꞌ Ala i kota Yerusale to merima-rima tuwuꞌra. Kuperapiꞌ hingkeꞌna irampukei doiꞌ pesulungimi motuntuni hapo to kupoturuꞌkimohi i jumaꞌa-jumaꞌa to uwaꞌ i woiꞌ Galatia. 2Hampoliꞌmokei ipekau kohupaꞌka honiꞌkei irampu hapo to hingkiꞌ nipakatukihi. Angkana haminggu-haminggu i ando minggu,#16:2 ando minggu I lali wiharo Yunani: ando kaꞌisaꞌ. nipotaniꞌ dulu doiꞌ tiꞌo i tambimi motuntuni pahuami haduo-haduo, hei iporiakei ngkoromiꞌ wuteꞌa mehupaꞌ. 3Ane mehupaꞌmoꞌa intu, iꞌuwiꞌkei ka lumbumi, toaꞌ to nipoꞌohi, hingkeꞌna kupaꞌanihi suraꞌ rotiko, hei kurumbaꞌhi nolou pe Yerusale mangkomi doiꞌ pesulungimi. 4Hei ane roparaluꞌa, nolouluꞌa woꞌo moꞌawa hante iohi.#16:4 Koꞌukoana hi Paulu nolou moroa doiꞌ hei mangkomi nolou pe Yerusale moꞌawa hante toaꞌ to ka Makedonia hante Yunani. Basa Roma 15:25-27.
Tungkaihana hi Paulu nolou pe Korintus
5Uwaꞌ tungkaihangkaꞌ hingkiꞌ mololoꞌokei angkana akoꞌa dulu moweoꞌi jumaꞌa-jumaꞌa to uwaꞌ i woiꞌ Makedonia, alaꞌ kukodokoꞌi dulu nolou pe iohi. 6Peleihangku hingkeꞌna meꞌohaꞌa dulu moꞌawa hante ingkei. Wora hingkiꞌ meꞌohaꞌa i ingkei wute liu tempo mepoholeꞌ, hei uko tiꞌo ipopewotumoꞌakei mampololiu patengkaꞌku nolou pe woiꞌ ntaniꞌna. 7Hawaꞌi kulei holampi hangkaꞌ-hangkaꞌlu ingkei. Ane noponiuꞌ Pueꞌ, kukodokoꞌi hingkeꞌna meꞌohaꞌa moꞌawa hante ingkei. 8Angkana hinewowoꞌena, hangangaa meꞌohaꞌa dulu iseꞌe i Epesu wute i ando Pentakosta, 9alaꞌ kehapoꞌi woriꞌhi toaꞌ to moꞌewaꞌa, angkana modumbuꞌ mpololeke pajamangka iseꞌe.
Hi Timotius hante hi Apolo
10Ane mehupaꞌi hi Timotius, kupohinaru itorimokei ngkoromiꞌ hei iꞌadaꞌikei, alaꞌ io mampopatengkaꞌ jamana Pueꞌ hibali hante aku. 11Mewaliꞌ, inioꞌ uwaꞌ to mampariwoiꞌ.#16:11 Wora uwaꞌ to hawaꞌi moꞌadaꞌi hi Timotius alaꞌ io moleaꞌ tene hei handoꞌio suro. Basa 1 Timotius 4:12. Kuperapiꞌ woꞌo hingkeꞌna ipopewotukei ngkoromiꞌ ane mahuliꞌi humei pe aku, alaꞌ kupekau iseꞌe kohupaꞌne moꞌawa hante halali hampepoꞌohinta.
12 #
Sur. 18:24–19:1; 1Kor. 1:12; 3:4-6 Kololiuhana, ane halalinta hi Apolo, woriꞌ mpihamo kurumbaꞌ hingkeꞌna mampoꞌawa halali hampepoꞌohi to ntaniꞌna to hingkiꞌ nolou mololoꞌokei i Korintus. Hinewowoꞌena handoaꞌi tene hiniꞌ nolou, angkana ane uwaꞌi koholangkoane, hingkiꞌ akolukei nololoꞌo.
Kotutuana suraꞌ
13Majaga-jagakei. Ipokarohokei pepoꞌohimi! Ipokarohokei lalimi! Itikokei nturusi pepoꞌohimi! 14Hapolu to iwalikei, hangangaa iwalikei ka lalimi to buhaꞌ rima.
15Halali-halali, ibahaꞌmokei hi Stepanu hantambi to uluꞌ-uluꞌna mewali toSarani i woiꞌ Akaia.#16:15 woiꞌ Akaia Hinewowoꞌena hadolaꞌ ka woiꞌ Yunani. Mampeweihi kotuwuꞌra pe Pueꞌ hingkeꞌna mosulungihi toaꞌna Pueꞌ Ala. 16Mewaliꞌ, halali-halali, kuperapiꞌ hingkeꞌna ipetuntuikei poturuꞌre hi Stepanu hantambi, hei poturuꞌra lekiꞌ-lekiꞌna awara to mampopatengkaꞌ jamana Pueꞌ.
17Motanaꞌ lalingka alaꞌ mehupaꞌmohi hi Stepanu, hi Potunatu hante hi Akaikusi ka kota Korintus. Iomohi to kurekeꞌ sulewotami to humei mosulungiꞌa iseꞌe. 18Halalinta tiꞌo mampokaroho lalingku, hei wadihi woꞌo mampokaroho lalimi. Iomo horiana kuperapiꞌ hingkeꞌna iꞌadaꞌikei toaꞌ to hatoꞌo.
19Lekiꞌ-lekiꞌna jumaꞌa to uwaꞌ i poropensi Asia#16:19 poropensi Asia Hinewowoꞌena hadolaꞌ ka Turki, tinaꞌ i kotompuhana ando. mampowute tabeara pe ingkei. Hi Akila hante hi Prikila hantambina#16:19 Hi Akila hante hi Prikila Basa Suro 18:1-3, 18, 26; Roma 16:3-4; 2 hi Timotius 4:19. moꞌawa hante lekiꞌ-lekiꞌna toSarani to maminggu i tambira mampowute woꞌo tabeara i lali konaꞌna Pueꞌ. 20Tabea ka lekiꞌ-lekiꞌna halali hampepoꞌohimi iseꞌe i Epesu. Ane hirampukei maminggu, mometabeꞌ-tabeꞌkei ka lalimi mpololeke.
21Koꞌukoana suraꞌ hieꞌe kuꞌukiꞌ hante korawengku hadoduongku. Tabea ka aku hi Paulu! 22Toaꞌ to hawaꞌi mampokarima Pueꞌ Yesu, hingkiꞌ horewuꞌ.
Maranata! Humeimoko, Pueꞌ!
23Kuperapiꞌ hingkeꞌna Pueꞌ Yesu mobarakatikei! 24Kupokarimakei lekiꞌ-lekiꞌmi i lali konaꞌna Yesu Kerisitu. Amin.
Currently Selected:
1 Korintus 16: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
