YIA̒APO 5
5
Wuu̒du pasali lotaa najisi
1 Eeya lotahuda mai odelei Musa, 2“Wohia mao̒ palenta botie ode taulo Isirai̒lu: Ngoa̒amila taa u hidutolaa ngongoto lo alipo umoo̒ topotala, meaalo ngongoto lo tilaluwa, meaalo tamalo dedeta milate, musi yinggilolo monto Kema taulo Isirai̒lu. 3Timongolio musi poloo-ntulolo, alihu diila moo̒ najisi kema, tou̒toonu Wau̒ bliu-biluloa̒ pee̒-pee̒enta wolo umati-U̒.” 4Taulo Isirai̒lu mohutu mao̒ palenta boito wau mopolualao̒ ngoa̒amila taa udebo odelo uito monto kema.
Dudelo lou̒ moluloo̒ uiluhi
5 Eeya longohi mao̒ odelei Musa 6wuwuu-uduwaalo botie ode taulo Isirai̒lu: Wonu bolo tahingota-ngotaawa diila tatapu wau molotolo hilao to Eeya lou̒ mohutu totala ode taa wewo, 7yi tau boito musi mongaku mao̒ dusaalio wau momayali toloto wolo polupolu duhengala wolo dulo puulo poloseni, ode taa u iloluhialio. 8Bo wonu taa u iloluhialio boito mailate wau diila o ilaato modudulo, yi toloto boito musi wuduwola ode Eeya, wau mowali tayadio li iimamu. Toloto boito diila tuwo-tuwoto himba ulai̒ duo̒lo upacala polulutalo dusa ode taa u ototala boito. 9Monto wolo wambai̒o upodewo taulo Isirai̒lu ode Eeya, dewo tolomodulio mowali tayadu li iimamu tamololimo mao̒ dewo boito. 10Wolo upodewo lo tahingota-ngotaawa ode Eeya, mowali tayadio lotau boito lohihilao. Bo wolo u wuduwolio mao̒ ode iimamu ngota, mowali tayadio li iimamu boito.
Wuu̒du pasali lodile talolai̒ tamo lantobe dilelio
11 Eeya lopoa̒hu odelei Musa 12-14mongohi mao̒ wuwuu-uduwaalo botie ode taulo Isirai̒lu. Mowaliilio talolai̒ ngota molantobe dilelio. Tio molantobe dilelio boito diila tatapu wau molotolo hilao to olio wau maloo̒leeto batangalio sababu lou̒lauwa wolo talolai̒ wewo. Bo dile talolai̒ boito diila otantuulio, sababu sua̒li boito pilohutu lodilelio wolo tutuuo̒; sakusiilio diaaluo, wau tio diila ilodungga mopatato. Meaalo, mowaliilio dile talolai̒ ngota molantobe dilelio, lebe-lebe pomao̒ dilelio boito diila loitohe wolo talolai̒ wewo. 15To delomo oluo losua̒li boito dile talolai̒ boito musi modelo dilelio odeli iimamu. Tio olo modelo mao̒ dewo u palaluwolo, deu̒yito-yito ngokilo labu lopale. Labu boito diila mowali tooheelo lowinulo jaitun meaalo dutuwalo dupa, sababu debo odelo dewo polo lantobu wau milakusudu u mopoilaalo mao̒ woluolio lo polo lantobu lodile talolai̒ ode dilelio.
16Ti iimamu musi mopoa̒hu mao̒ taabua boito ode talu lomesba wau timihula motitalu ode Eeya. 17Lapatao̒ ti iimamu musi mohama mao̒ manggo huta tuwau wau molooheo̒ taluhu mantali ngoi̒di ode delomio. Lapatao̒ uito tio musi mohama mao̒ ngoi̒di peaahuo̒ monto wumbato Kema lo Eeya wau mopo tuwotao̒ ode delomo taluhu boito. 18Lapatao̒ tio musi mongowaa̒ao̒ huwoo̒ taabua boito, wau mopodutu mao̒ labu lodewo polo lantobu ode delomo uluu̒lio, hiambola ti iimamu lohihilao modihu taluhu mopaa̒to u mopotoduo mai laa̒anati. 19Lapatao̒ uito ti iimamu musi mohulitao̒ tadia wau mohile mao̒ akolowalio lotaabua boito. Ti iimamu musi moloi̒ya mao̒, “Wonu yio̒ diila lojina, yio̒ diila otuhata lolaa̒anati upilopo dungga mai lotaluhu botie. 20Bo wonu yio̒ malojina, 21hinta Eeya mohutu mai tanggulumu mowali tadia laa̒anati towolota lo bangusaamu. Hinta Eeya mohutu mai bungo lo bungolopamu mou̒yuto wau ombongumu moomuyuo̒. 22Taluhu u mopotoduo mai laa̒anati botie matumuwota ode delomo ombongumu wau mohutu mao̒ moomuyuo̒ wau mopou̒yuto bungo lopamu.”
Taabua boito musi molametao̒, “Watia akolo; hinta Eeya mohutu mai odito.”
23Lapatao̒ ti iimamu musi moluladeo̒ laa̒anati boito tolilibu kalatasi wau molulutao̒ wolo taluhu mopaa̒to boito. 24Ti iimamu mopoa̒hu mao̒ taabua boito mongilu taluhu mopaa̒to u mopotoduo mai laa̒anati. Wonu yilumolo, taluhu boito moo̒sababu ngongoto. 25Ti iimamu musi mohama mao̒ dewo lolabu boito, wau pobilohulio ode talu lo Eeya, tulusi deloolio mota ode mesba. 26Lapatao̒ tio musi mohama mao̒ ngaau̒po labu odelo tuoto deu̒ ngoa̒amila labu boito maa pilopodewo, tulusi momobu mao̒ toitaato mesba. Pulitio mao̒ taluhu boito poyilumoolo ode taabua boito. 27Humayaalio taabua boito malojina, taluhu boito moo̒sababu olio molaasa mongongoto daa̒; ombongio moomuyuo̒ wau bungo lo bungolopalio mou̒yuto. Tanggulio mamowali tadia laa̒anati towolota lo bangusaalio. 28Bo humayaalio tio diila ototala, tio diila otuhata lolaa̒anati wau donggo mowali moo̒tapu mai walao̒.
29-30Odi-odieelo mola wuu̒dulio wonu bolo ngotaalio lodile talolai̒ mopotilibu wau molantobe deu̒ dilelio malohutu diila juujulu wau lopoo̒ leetao̒ batangalio. Talolai̒ boito musi mopotaaluo mao̒ dilelio boito ode Eeya wau ti iimamu musi moponao̒ wuu̒du boito to olio. 31Talolai̒ boito bebasi monto totala, bo dilelio, wonu mopatato ototala, musi momanta akiibatilio.
Currently Selected:
YIA̒APO 5: LAIGOR
Highlight
Copy
Compare
Share
Want to have your highlights saved across all your devices? Sign up or sign in
