YIA̒APO 33
33
Nonao̒ lonto Masiri ode Moab
1Lapatao̒ bangusa lo Isirai̒lu lololaa mao̒ Masiri, todelomo baliisani lodudua̒ suku lobangusa ngota-ngota to tau̒wa lei Musa wolei Haruna, timongolio malo hepita tongoolo tambati. 2Eeya lomrentao̒ olei Musa u lodaputali mao̒ tanggulo timii̒du tambati u pilohepita limongolio.
3Bangusa lo Isirai̒lu lololaa mao̒ Masiri todulahu opulaa limolio hulala bohulio, ngohui lapatio mao̒ Paska u bohulio. To tibawa duo̒la lo Eeya timongolio lololaa mao̒ kota Ramses wau silakusia bangusa lo Masiri, 4tadonggo hipo lobungawa walai̒ mongolio mohuhula daa̒ tamaa pilate lo Eeya yila-yilateelo mao̒. Wolo huhutu boito, Eeya lopo bukuti mai deu̒ Tio lebe molotolao̒ wolo ila-ila lo Masiri.
5Lapatao̒ bangusa lo Isirai̒lu lololaa mao̒ Ramses, timongolio lotikema to Sukot. 6Lapatao̒ timongolio luli lomonggato wau lotikema to Etam, tobiihu huta datahu wau luasi udelita. 7Lonteto timongolio luli lohualinga ode Pi-Hahirot, to ambahu tiimuru lo Baal-Jepon, tulusi lotikema totili lo Migdol. 8Lapatao̒ timongolio lololaa mao̒ Pi-Hahirot, malo balango deheto wau tilumuota ode huta datahu auhu delita lo Etam; lapatio mao̒ tolo hui mola to nonao̒, timongolio lotikema to Mara. 9Lonteeto timongolio tulusi wau lotikema to Elim; mota teto woluo mopulaa duluo butu lotaluhu wau pitu lopulu bungo lohuruma.
10Lapatao̒ timongolio lololaa mao̒ Elim wau lotikema totili lo Wulungo Sues. 11-14Wumbutio mola timongolio lotikema tohuta datahu wau luasi udelita lo Sin, lapatao̒ totili Dopka, lapatao̒ uito to Alus, wau lapatao̒ to Rapidim, bo mota teto diaaluo taluhu u yilumolo.
15-37Lonto Rapidim timongolio tulusi ode Hui̒dee Hor wau lotikema to tataa-mbatiyalo botie: uta datahu wau luasi udelita lo Sinai, Kibrot-Taawa, “Kuubulu Ololanggamu”, Hajerot, Ritma, Rimon-Peres, Libna, Risa, Kehelata, Hui̒dee Syaper, Harada, Mekhelot, Tahat, Tarah, Mitka, Hasmona, Moserot, Bene-Yaakan, Hor-Gidgad, Yotbata, Abrona, Ejion-Geber, huta datahu wau luasi udelita lo Sin, wau Hui̒dee Hor, to sipatana lohuta Edom.
38-39To palenta lo Eeya, ti Iimamu Haruna lotao̒dee mola ode Hui̒dee Hor. Mota teto tio yilate tobohulo dulahu hulala olimolio todelomo taunu u opato pulu lapatao̒ umati lo Isirai̒lu lololaa mao̒ Masiri. Tou̒ yilate, tei Haruna ou̒umulu ngohetuto dulo pulaa tolo taunu.
40Tou̒ boito ti olongia lipu lo Arad, to Huta lo Negeb, Kanaa̒n Huliaalio, loo̒tapu mao̒ habari deu̒ umati lo Isirai̒lu donggo dulu-dulungai ode lipulio.
41-49Todelomo nonao̒ mai lonto Hui̒dee Hor ode datahu lo Moab, taulo Isirai̒lu helotikema to tataa-mbatiyalo botie: Jalmona, Punon, Obot, beelea lo Abarim tomadala lo Moab, Dibon-Gad, Almon-Diblataim, Hui̒dee Abarim totili lo Hui̒dee Nebo, wau todatahu lo Moab tobiihu lo Dutulaa Yordan, totili lo kota Yerikho, towolota lo Bet-Yesimot wau Lumbaya Sitim.
Papaa-lentawalo tou̒ diipo lobalango Dutulaa Yordan
50Todatahu lo Moab boito, tobiihu Dutulaa Yordan, totili lokota Yerikho, Eeya longohi mai palenta odelei Musa 51papaa-rentawalo botie ode bangusa lo Isirai̒lu, “Wonu timongoli mobalanga Dutulaa Yordan u tumuwota mota ode lipu lo Kanaa̒n, 52timongoli musi mopolahi mao̒ ngoa̒amila tuango lipu tolipu boito. Pobinasawa mao̒ ngoa̒amila balaahala limongolio monto botu wau logamu wau tataa-mbatiyalo poibaatia limongolio. 53Huta boito musi wahuwola wau huloa̒a mao̒ limongoli, sababu wohi-U̒ mai olimongoli. 54Lapatao̒ musi tayade mao̒ limongoli mowali miliki pusaka lo kakaa-wumuwaalo limongoli wolo dalala momahutao̒ undi. Tokaumu uleidaa̒ musi wohia mao̒ limongoli tayadu uleidaa̒, wau tokaumu ungoi̒di, musi wohia mao̒ limongoli tayadu ungoi̒di olo. 55Bo wonu tuango lipu boito diila polahio mao̒ limongoli, yi tau-tauwalo tahi biluloa̒wa mota teto mamo posuusa olimongoli debo odelo hungayo to matomu meaambo duhi to oa̒atumu. De timongoliolo tamamoluhu olimongoli. 56Wonu timongoli diila mopolahi mao̒ olimongolio, Wau̒ mamopo binasa mai olimongoli debo odelo u yilanjana-U̒ mao̒ olimongolio.”
Currently Selected:
YIA̒APO 33: LAIGOR
Highlight
Copy
Compare
Share
Want to have your highlights saved across all your devices? Sign up or sign in
