IMAAMATI 22
22
Omantali lodewo
1 Eeya lopoa̒hu olei Musa 2mopo tunggulao̒ palenta botie odelei Haruna wau mongo walai̒o, “Pohutua mao̒ lou̒ patuti wolo upodewo bangusa lo Isirai̒lu tolomodu ode Olau̒, alihu timongoli diila mopoleeto tanggulu-U̒ umantali. Wau̒lo Eeya. 3Wonu ngotaalio monto walimu mai todelomo owowoluwoalio najisi mohimbideo̒ dedee-wowaalo mantali u potolomodu mao̒ bangusa lo Isirai̒lu ode Olau̒, yi tio diilalo mowali momaya tomesba. Wuu̒du boito pohu-pohutu u o hiheo-hiheolo mao̒. Wau̒ Eeya.
4Ngotaalio lo wali lei Haruna taduto-dutolaa ngongoto lo alipo umoo̒ topotala, meaalo taa mongongoto lotilalua tilunggula mopo lualao̒ heeheto, dini-dini molamela dewo mantali wonu tio diipo pilo ilaalo belesi. Ngotaalio li iimamu mowali najisi wonu tio modedeta hitua-tuawua unajisi sababu ilotuhata lomilate. Tio olo najisi wonu manilio humeheto, 5meaalo modedeta binatangi meaalo taa unajisi. 6Ngotaalio li iimamu u wolo dudelo upenu boli woloolo mowali najisi, debo najisi dilumutu dulahee tumolopaa mota. Wau lapatao̒ dulahee tulumolopaa mota tio diipo mowali molamelao̒ u podewolo ode Eeya wonu tio diipo lolihu. 7Lapatao̒ dulahee tulumolopaa mota tio belesi wau mowali molamelao̒, sababu ui-uitolo ua̒alolio. 8Tio dini-dini molamela tapu uilate lohilhilo, meaalo uilate dilangapo binatangi mongantau. Wonu tio molamelao̒, yi tio mowali najisi. Wau̒lo Eeya.
9Ngoa̒amila iimamu musi modungoheo̒ wuwuu-uduwaalo uilohi-U̒ mai. Wonu diila, timongolio ototala wau maamate, sababu molambanga wuwuu-uduwaalo umantali boito. Wau̒lo Eeya, wau Wau̒lo talo poheetu olimongoli ode Olau̒.
10Dewo u piloheetu ode Olau̒ bo mowali tamelola longaalaa̒ li iimamu boito lohihilao; taa wewo diila mowali, eleponu tau boito ngobele woli iimamu boito meaalo taa hewuupalio. 11Bo mongo wato tatilali li iimamu boito wolo doilio lohihilao meaalo tapilotutu todelomo belelio, mowali molamela ua̒alo tayadi iimamu boito. 12Walao̒ taabua lo ngotaalio li iimamu tamonika wolo ngotaalio lo tadiila iimamu, diila mowali molamela dewo boito. 13Bo walao̒ taabua li iimamu tamaa lowali janda meaalo tatilalaki wolo diila loo̒tapu walao̒ lapatao̒ luli lohualinga ode bele liyamolio wau lowali banta-banta olio, mowali molamelao̒ ua̒alo tayadu liyamolio. Bo ngaalaa̒ li iimamu wambai̒o tamowali molamela dewo boito.
14Wonu ngotaalio tadiila pongawaa̒ longaalaa̒ li iimamu wolo diila lolunggai lomela ua̒alo upilodewo ode Eeya, tio musi mongohi mao̒ poluloo̒ odeli iimamu wau duhengalo dulopulu poloseni. 15Mongo iimamu diila mowali moponajisi dewo upoheetu ode Olau̒ 16wolo mopoluli mao̒ lamelo lo ngotaalio tadiila ohaku molamelao̒. Sua̒li boito mopowali totau boito ototala wau moo̒toduo mai hukuumani to olio. Wau̒lo Eeya wau Wau̒ tamopo mantali mao̒ dewo boito.”
17 Eeya lopoa̒hu olei Musa 18-19mongohi mao̒ odelei Haruna, mongo walai̒o wau ngoilanggubu bangusa lo Isirai̒lu wuwuu-uduwaalo botie. Wonu bolo ngotaalio taulo Isirai̒lu meaalo ngotaalio tau deli tabilu-biluloa̒ motitatapu to Isirai̒lu mopodewo bake yilalango u pomayali loi̒ya meaalo duo̒lo bake iloheela lohilao, binatangi boito musi ulai̒ wau diila mowali otailio alihu mowali tolimoolo. 20Diila mao̒ podewowa binatangi u otailio, sababu Eeya diila mohuto mololimo uito. 21Wonu tahingota-ngotaawa mopodewo ode Eeya bake lo polodame u pomayali loi̒yalio meaalo duo̒lo bake iloheela lohilao, yi binatangi boito diila mowali otailio, alihu mowali tolimoolo. 22Diila mao̒ podewowa ode Eeya binatangi upitoo̒, uboli-boli tulalio meaalo upali-pali, u obohe wau olala, uduto-dutolaa ngongoto lo alipo meaalo kukudu. Binatangi u odito diila mao̒ podewowa duo̒lo bake lou̒ aalo toitaato mesba. 23Duo̒lo bake iloheela lohilao timongoli mowali mopodewo mao̒ binatangi udiila wimu-wimumuto pongawaa̒lio; bo pomayali loi̒ya, binatangi u odito diila mowali tolimoolo. 24Diila mao̒ podewowa ode Eeya binatangi ubotu lohutulio loruusa leihupeto, iloloto, pali lobubuhu meaalo tilapilio. Sua̒li boito diila mowali motoduo mai tolipumu.
25Bibiahe u motapu mai monto tau deli diila mowali podewolo duo̒lo bake lou̒ aalo. Binatangi boito anggapuwola oa̒abu wau diila mowali tolimoolo.
26-27Walao̒ sapi, walao̒ himba meaalo walao̒ batade u boheli pilotutu mai musi tolaalo to oliilolio ngotilonggadu pitu hui mola. Bolo lapatio mao̒ binatangi boito mowali tolimoolo duo̒lo bake lou̒ aalo. 28Diila mao̒ podewowa hitua-hituawua odelo bake lobatade pee-pee̒enta wolo walai̒o todulahee u tutuuwauwa. 29Wonu bolo timongoli mopodewo bake sukuru ode Eeya, pohutua mao̒ uito modudua̒ wuu̒du, alihu bakemu tolimoolo. 30Tameela mao̒ bake boito todulahee boito olo, wau diila mao̒ polabita penu boli bo ngoi̒di duo̒lo loombulio mola.
31 Eeya lotahuda mai, “Dungohi mao̒ totoonulalo palentaa-U̒; Wau̒lo Eeya. 32Diila mao̒ pokootoroa tanggulu-U̒ umantali. Ngoilanggubu bangusa lo Isirai̒lu musi molubo ola-U̒ odelo Taa Laba-labaalo mantali. Wau̒lo Eeya wau Wau̒ mopowali mai olimongoli mantali. 33Wau̒ lodelo olimongoli yilumualao̒ lonto Masiri, alihu Wau̒ mowali Allahu Taa̒ala limongoli. Wau̒lo Eeya.”
Currently Selected:
IMAAMATI 22: LAIGOR
Highlight
Copy
Compare
Share
Want to have your highlights saved across all your devices? Sign up or sign in
