IMAAMATI 10
10
Dusa lei Nadabu wolei Abihu
1Todulahee tuwau tei Nadabu wolei Abihu, mongo walae̒e Haruna, ngota-ngota helohama mao̒ tambati lotululio, wau loluangao̒ wolo bohu. Lapatao̒ timongolio lopodutu dupa todelomo tulu boito wau lopodewo mao̒ ode Eeya. Bo tulu boito diila halale, sababu Eeya diila lopoa̒hu olimongolio helo podewo uito. 2Yi Eeya malo podungga mai tulu ulomobu olimongolio tunggula yilate to Kema lo Eeya. 3Lapatao̒ tei Musa loloi̒ya mao̒ odelei Haruna, “Ui-uitolo u milakusudu lo Eeya tou̒ Eeya lotahuda mai, ‘Ngoa̒amila tamomaya ola-U̒ musi mohulumati omantali-U̒. Wau̒ mamopo ilaalo mai ololamahu-U̒ ode ngoilanggubu bangusaa-U̒.’ ” Bo tei Haruna wambao̒ lotipoo̒yo.
4Lapatao̒ tei Musa malo tiangai olei Misael wolei Elsapan, mongo walae̒e Ujiel, pou̒wama lei Haruna. Ualio mao̒ ode limongolio, “Ponao̒lo mai odia, hamawa mao̒ milate lo pohutatamu tutu monto Kema lo Eeya wau pobalata mao̒ to bulemengo kema.” 5Timongolio malonao̒ mai wau lodelo mimii-lateyaalo donggo hikaingia boito ode bulemengo Kema, debo odelo upilo malentao̒ lei Musa.
6Lapatao̒ tei Musa loloi̒ya mao̒ odelei Haruna wau mongo walai̒o wewo, deu̒yito-yito tei Eleajar wolei Itamar, “Diila mao̒ polulia huwou̒mu moa̒puto, wau diila mao̒ kaidinga pakeyangimu u mopo biloheo̒ deu̒ timongoli hisuusawa wau limilimi. Wonu timongoli mohutu mao̒ odito, timongoli maamate, wau ngoilanggubu umati lo Isirai̒lu muluka mai lo Eeya. Bo ngoa̒amila taulo Isirai̒lu wewolio mowali motilimi duo̒lo ilopatea lo taduulota uilate sababu tulu lonto Eeya. 7Diila mao̒ tolai Kema lo Eeya alihu timongoli diila mate, sababu timongoli mapilopo mantali wolo winulo upacala u momaya to Eeya.” Timongolio helohutu mao̒ debo odelo uiloi̒ya lei Musa.
Wuu̒du duo̒lo mongo iimamu
8 Eeya lotahuda odelei Haruna, 9“Lapatao̒ mongilu mao̒ angguru meaalo minumani umoo̒ huwoo̒, yio̒ wau mongo walau̒mu diila mowali tumuwoto ode delomo Kema-U̒. Wonu timongoli molambanga wuu̒du boito, timongoli maamate. Palenta boito musi dungohe mao̒ lo ngoa̒amila walimu mai. 10Timongoli musi mowali mopohiihedeo̒ wolota u pilohetu ode Allahu Taa̒ala wau diila pilohetu, wolota unajisi wau udiila najisi. 11Ngoa̒amila butoo̒ uilohi-U̒ mai olemu lotimbulude to olei Musa, musi mowali pongaajali mao̒ limongoli ode bangusa lo Isirai̒lu.”
12Tei Musa loloi̒ya mao̒ odelei Haruna wau ode walai̒o duulota, tei Eleajar wolei Itamar, “Hamawa mao̒ pale ulebelio lonto ua̒alo u pilodewo ode Eeya. Monto labu boito pohutua mao̒ roti udiila momake ragi, lapatao̒ tamela mao̒ uito totili lomesba, sababu bake boito mantali daa̒. 13Roti boito musi tamelola totambati u mantali, sababu monto ua̒alo upilodewo ode Eeya, roti boito mowali tayadumu wau mongo walau̒mu talolai̒. Ui-uitolo palenta mai lo Eeya to olaatia. 14Bo timongoli wau mongo walau̒mu talolai̒ wau taabua mowali molamelao̒ duhelo dewo poo̒taa wau bungolopa lodewo poheetu. Ui-uitolo tayadu lomongo iimamu monto bake lo polodame bangusa lo Isirai̒lu. Timongoli mowali molamelao̒ to utoonulalo tambati udiila najisi. 15Bungolopa lo dewo poheetu wau duhelo dewo poo̒taa boito musi deloolo pee̒-pee̒enta wolo tabo duo̒lo bake yilalango odelo dewo poheetu ode Eeya. Tataa-yadewaalo boito mowali hakuumu wau mongo walau̒mu u ohiheo-hiheolo mao̒, debo odelo upilo malentao̒ lo Eeya.”
16Lapatao̒ tei Musa lohintu mao̒ pasali lobatade duo̒lo bake pongambungualo dusa. Tio piloo̒taalio mao̒ deu̒ batade boito mailalango. Sua̒li boito maloo̒ yingo olei Musa to olei Eleajar wolei Itamar, tilinggula tio loloi̒ya mao̒ olimongolio, 17“Yilongola bake pongambungualao dusa boito diila tilameli mongoli totambati u mantali? Bake boito mantali daa̒; Eeya malongohi mai olemu, alihu dusa umati lo Isirai̒lu ambunguolo. 18Duhu lo batade boito diila deloolo ode Kema lo Eeya, oditolio patutilio bake boito tamelo mao̒ limongoli teto debo odelo u pilomalentai lowatia.”
19Tametao̒ lei Haruna, “Memangi todulahee botie umati lo Isirai̒lu malo podewo bake pongambungualo dusa wau bake yilalango ode Eeya. Eleponu odito, baala botie malo toduo to olaatia. Humayaalio todulahee botie watia lolamelao̒ olo bake pongambungualo dusa boito, wolo Eeya masanangi?” 20Tei Musa molaasa ilolulia lohilaa wolo totameto boito.
Currently Selected:
IMAAMATI 10: LAIGOR
Highlight
Copy
Compare
Share
Want to have your highlights saved across all your devices? Sign up or sign in
