YOSUA 20
20
Kokoo-tawaalo potiduo̒lalo
1Lapatao̒ Eeya lopaa̒hu olei Yosua 2loloi̒ya mao̒ odie ode bangusa lo Isirai̒lu, “Wau̒ malo poa̒hu olei Musa alihu tio mopoo̒taa mai olemu pasali lo kokoo-tawaalo potiduo̒lalo, deu̒yito-yito kokoo-tawaalo tou̒toonu tau mowali mopolahi batanga u moo̒tapu potiduo̒lalo. Botia tulaotilo kokoo-tawaalo boito. 3Taa u momate taa wewo mate-mateelo mao̒ wolo diila milakusudu, mowali tumetea̒a mota ode kota boito alihu mohei monto taa u ohilaa moniyati olio. 4Tio mowali tumetea̒a mota ode tala tuwau lo kokoo-tawaalo boito, wau monao̒ ode tambati pomutoa̒lo tohuhebu hulubangi lokota boito, lapatao̒ motombangao̒ tomongo tau̒wa mota teto wolo u malotoduo. Mongo tau̒wa boito mamongohi olio tumuwotao̒ ode kota boito, wau mongohi olio tambati poti biluloa̒lo. 5Wonu taa u ohilaa moniyati boito mohilapita demota teto, yi ulipu lokota boito diila mowali mohudu olio ode tau boito. Timongolio musi moduo̒la olio, sababu tio lomate tau yila-yilateelo mao̒ lou̒ diila milakusudu, wau diila kalana molonuo̒. 6Tio mowali motibiluloa̒ tokota boito tunggula tio mabilutoo̒ totalu ulipu, wau tunggula taa u dihudihu Iimamu Daa̒ tomaasa boito mate. Lapatao̒ uito bolo tau boito mowali mohualinga mota ode kambungu pilohuluta loduhulio monto utoonu tio helo polahi mai batanga.”
7Yi tomadala ambahu otolopa lo Dutulaa Yordan umati lo Isirai̒lu helolantu mao̒ kokoo-tawaalo u wumbutio mola botie odelo kota potiduo̒lalo: Kedes to hihui̒-hui̒dea lo Naputali to Galilea, Sikhem to hihui̒-hui̒dea lo Epraim, wau Hebron to hihui̒-hui̒dea lo Yehuda. 8Tomadala ambahu tiimuru lo Dutulaa Yordan todatahu lengge-lengge tohuta ohungayo u luasi daa̒ ambahu tiimuru lo Yerikho, timongolio helolantu kokoo-tawaalo u wumbutio mola botie odelo kota potiduo̒lalo: kota Bejer tomadala Ruben, kota Ramot to Gilead tomadala Gad, wau kota Golan to Basan, madala Manasye. 9Uitolo ngoa̒amila kokoo-tawaalo potiduo̒lalo utilantu mao̒ ode ngoilanggubu umati lo Isirai̒lu wau ode timii̒du tau deli tabilu-biluloa̒ tohuungi mongolio. Timii̒du taa u momate taa wewo mate-mateelo mao̒ lou̒ diila milakusudu, mowali moo̒tapu poti duo̒lalo to kokoo-tawaalo boito monto yilapita taa u ohilaa momalasi ngongoto hilaalio to olio; tio diila pateelo mate-mateelo mao̒ wonu tio diipo bilutoi̒o totalu lo ulipu.
Currently Selected:
YOSUA 20: LAIGOR
Highlight
Copy
Compare
Share
Want to have your highlights saved across all your devices? Sign up or sign in
