YOSUA 18
18
Totayadu labito huta u pilodanti mai lo Eeya
1Lapatao̒ lopo taa̒aluku mao̒ madala u pilodanti mai lo Eeya, ngoilanggubu umati lo Isirai̒lu lotia̒mbu to Silo, lapatao̒ timongolio lopohuli Kema Owoluwoa lo Eeya. 2Donggo woluo pitu suku bangusa lo Isirai̒lu tadiipo lololimo tayadu huta. 3Oditolio, tei Yosua loloi̒ya mao̒ ode umati lo Isirai̒lu, “Timongoli ohilaa mohima tunggula omolua poli, bolo timongoli mota motihuloa̒ao̒ madala u wohi mai lo Eeya, Allahu Taa̒ala loluuhurumu, olemu? 4Tulaotilo toulota monto timii̒du suku. Watia mamopoa̒hu olimongolio u momilo-miloheo̒ ngoilanggubu madala botie u moluladeo̒ sisii-patanawalo madala u otohilaa milikio limongolio. Lapatao̒ uito timongolio musi muli mohualingai ode laatia. 5Huta boito musi tayadulo mowali pitu lotayadu. Tei Yehuda madebo to madalalio ambahu huliaalio, wau tei Yusu to madalalio ambahu tilayo. 6Gaambali sisii-patanawalo opitu tayadu huta boito musi pohutuwola, wau wuduo mai olaatia. De watia tamo mahutao̒ u pongotaalo wolo utilantu mai lo Allahu Taa̒ala ode limongoli. 7Bo suku Lewi diila tamololimo tayadu huta pee̒-pee̒enta woli mongoli, sababu tayadi mongolio yito mowali mongo iimamu u momaya to Eeya. Wau tomimbihu suku Gad, Ruben wau ngotayadu suku Manasye, memangi timongolio malo lolimo tayadio to ambahu tiimuru lo Dutulaa Yordan. Tei Musa, wato lo Eeya, malongohi huta boito ode limongolio.”
8Yi tei Yosua longohi popoo-tuhatawalo u wumbutio mola botie ode tau-tauwalo boito, “Ponao̒lo mota momilo-miloheo̒ ngoilanggubu lipu botie wau pohutua mao̒ gaambali sisii-patanalio; lapatao̒ uito muli pohualingai ode laatia. De watia tamo mahutao̒ tewe to Silo u pongotaalo wolo utilantu mai lo Eeya olimongoli.” Lapatao̒ lololimo mao̒ popoo-tuhatawalo boito lonto olei Yosua, timongolio malonao̒ mota lomilo-miloheo̒ huta boito. 9Ngoilanggubu lipu boito yilontale limongolio, lapatao̒ helo luladeo̒ sisii-patanawalo opitu tayadu huta boito wau lodaputali mao̒ olo kokoo-tawaalo uwoluo todelomio. Lapatao̒ timongolio luli lohualingai odelei Yosua to pilo tikemawa to Silo. 10Lapatao̒ u pongotaalo tei Yosua malo mahutao̒ wolo utilantu mai lo Eeya ode limongolio. Lapatao̒ uito tei Yosua longohi mao̒ tayadu huta ode timii̒du suku bangusa lo Isirai̒lu ode tadiipo heloo̒tapu tayadu.
Madala utilunu mao̒ ode suku Benyamin
11Bohulo totayadu huta yito duo̒lo ngangaa-laa̒awaalo todelomo suku Benyamin. Tayadi mongolio boito dudutuulio towolota huta losuku Yehuda wau huta lo wali mai suku lei Yusu. 12To ambahu tilayo, sisii-patanawalo limongolio tumula mao̒ to Dutulaa Yordan, tulusi mobotula ode binggi ambahu tilayo lo Yerikho, lapatao̒ ode otolopa molibaya madala hihui̒-hui̒dea demola ngoilamingo madala huta luasi udelita lo Bet-Awen. 13Pilito sipatana boito tulusi poli ode binggi to ambahu huliaalio lo Lus (umasa-masaahulu odelo Betel), lapatao̒ motuhuta mola ode Atarot-Adar tohui̒dee ambahu huliaalio lo Bet-Horon-Hilir. 14Monto ambahu otolopa lohui̒dee boito, pilito sipatana boito mobale ode huliaalio dulu-dulunga ode Kiryat-Baal (deu̒yito-yito Kiryat-Yearim). Kiryat-Baal yito miliki losuku Yehuda. Uitolo pilito sipatana boito to ambahu otolopa. 15Sisii-patanawalo to ambahu huliaalio tumula mao̒ monto biihu Kiryat-Yearim tulusi ode bubuu-tuwaalo Taluhu Me-Neptoah, 16lapatao̒ motuhuta mola ode bungo lohui̒dee u tataalua wolo Lumbaya-Hinom tohuudu tilayo lo Lumbaya-Repaim. Lapatao̒ uito pilito sipatana boito ode huliaalio molibaya Lumbaya-Hinom ambahu huliaalio lo bibii-nggiyaalo hui̒dee tolipu lo Yebus, tulusi dulu-dulunga ode En-Rogel, 17mobale ode tilayo ode En-Semes, lapatao̒ ode Gelilot to ngotuali Potao̒odelo Adumim. Lapatao̒ uito pilito sipatana boito motuhuta mola ode Botu Bohan (Bohan yito walae̒e Ruben), 18tulusi molibaya ambahu tilayo bibii-nggiyaalo hui̒dee u tataalua wolo Lumbaya Yordan, lapatao̒ motuhuta mola ode lumbaya boito, 19molibaya tilayo lo bibii-nggiyaalo Bet-Hogla, wau mopulita towimbihu tilayo lo Lau Mate totambati bunto lo Dutulaa Yordan. Uitolo sipatana wimbihu huliaalio. 20Dutulaa Yordan debo odelo sipatana to ambahu tiimuru. Odi-odieelo mola sisii-patanawalo uilohi mao̒ ode ngangaa-laa̒awaalo todelomo suku Benyamin u lowali miliki limongolio.
21-24Kokoo-tawaalo u mililiki lo ngangaa-laa̒awaalo todelomo suku Benyamin, ngoa̒amilalo maito mopulaa dulo kota wolo kakaa-mbunguwalo topalitio, deu̒yito-yito: Yerikho, Bet-Hogla, Emek-Kejis, Bet Araba, Jemaraim, Betel, Haawim, Para, Opra, Kepar-Haamonai, Opni, wau Geba. 25-28Wau olo mopulaa pato kota u wumbutio mola wolo kakaa-mbunguwalo topalitio, deu̒yito-yito: Gibeon, Rama, Beerot, Mispa, Kepira, Mosa, Rekem, Yirpee̒l, Tarala, Jela, Yebus (deu̒yito-yito Yerusalemu), Gibea wau Kiryat-Yearim.
Uitolo huhuu-tawaalo uilohi ode ngangaa-laa̒awaalo todelomo suku Benyamin u lowali miliki limongolio.
Currently Selected:
YOSUA 18: LAIGOR
Highlight
Copy
Compare
Share
Want to have your highlights saved across all your devices? Sign up or sign in
