YOSUA 11
11
Tei Yosua lopoo̒laaheo̒ olei Yabin wau panggalio
1Tou̒ ti Olongia Yabin lonto Hajor loo̒dungohu tomimbihu ohohaama lo Isirai̒lu, yi tio malolao mota tau odeli olongia Yobab lonto kota Madon, ode mongo olongia lokota Simron wau Akhasap, 2ode mongo olongia to hihui̒-hui̒dea ambahu tilayo, to Lumbaya Yordan ambahu huliaalio lo Galilea, tomadala lobungo hihui̒-hui̒dea, wau tomadala biihio lopentadu membideo̒ lo Dor. 3Tio olo lolao mota tau ode taulo Kanaa̒n to ambahu otolopa wau ambahu tiimuru lo Yordan, ode taulo Amori, Het, Peris, wau taulo Yebus tomadala hihuu̒-hui̒dea, wau taulo Hewi to bungo lo Hui̒dee Hermon tomadala lo Mispa. 4Yi malonao̒ mai mongo olongia boito wolo ngoa̒amila suludadu limongolio u dadaata daa̒ debo odelo hungayo topentadu. Wadala wau kaleta lo popaatea limongolio olo dadaata daa̒. 5Ngoa̒amila mongo olongia boito malo panggala wau lonao̒ mai pee̒-pee̒enta lotimalakasi totili lo walao̒ Dutulaa Merom u moluhu taulo Isirai̒lu.
6 Eeya lotahuda mai odelei Yosua, “Diila mao̒ oohe toli mongolio. To saaa̒ti debo odelo odieelo mola loombu, timongolio ngoa̒amilalo mapilate-U̒ yila-yilateelo mao̒ domi Isirai̒lu. Wadala limongolio musi polupuhumu mao̒, wau kakaa-letaalo popaatea limongolio musi pobuwomu.” 7Yi tei Yosua wolo ngoa̒amila suludadulio loluhu wolo tilumahuo̒lo mola musu boito totili lowalao̒ dutulaa Merom. 8Wau Eeya helohutu umati lo Isirai̒lu loo̒haama toli mongolio. Taulo Isirai̒lu loluhu wau helo hilapita olimongolio demola ngoilaminga lo Misrepot-Maim wau Sidon to ambahu tilayo, wau ngoilaminga lo Lumbaya Mispa to ambahu tiimuru. Popaatea tulusi wali-walihuhu dilumutu diaaluo penu boli ngotaa mao̒ lonto musu tai̒lo labita – ngoa̒amilalo yilate. 9Tei Yosua lopohutu mao̒ olimongolio tutuuu̒de lou̒ wolo u mapilo malentai lo Eeya: tio malo polupuheo̒ wadala limongolio wau helomobu kaleta lo popaatea limongolio.
10-11Lapatio mao̒ tei Yosua luli lohualinga mota, tulusi malohama Hajor utou̒ boito yito laba-labaalo motoheeto towolota lo ngoa̒amila bele biluloa̒ saaha li olongia mota teto. Kota boito pilobulio, wau ti olongia wolo ngoa̒amila ulipulio pilatelio yila-yilateelo mao̒; diaaluo penu boli ngotaa mao̒ tailulia hitumula.
12Ngoa̒amila kokoo-tawaalo boito hilama lei Yosua, wau mongo olongiaalio yilau̒pio wau pilatelio yila-yilateelo mao̒ lotuuu̒de wolo palenta lei Musa wato lo Eeya boito. 13Bo kokoo-tawaalo u bilongulio toitaato huludu tuodu, diaaluo penu boli tuwau mao̒ upilobu lotau Isirai̒lu, ngopohia Hajor upilobu mao̒ lei Yosua lohihilao. 14Ngoa̒amila ulipu lo kokoo-tawaalo boito hepiltelio yila-yilateelo mao̒; diaaluo penu boli ngotaa mao̒ tailulia hitumula. Bo ngoa̒amila babaa-langilio u ohalaga wau bibiahio hilama taulo Isirai̒lu lowali miliki limongolio. 15Ngoa̒amila upilo malentai lo Eeya odelei Musa, wato-Lio, mapilo tunggulao̒ lei Musa odelei Yosua, wau pilohutu mao̒ lei Yosua; diaaluo penu boli tuwau mao̒ udiila piloponao̒lio.
Madala u hilama lei Yosua
16Tei Yosua malohama ngoilanggubu lipu boito – madala hihui̒-hui̒dea, madala tobungo lohui̒du, mopio u totilayo meaambo u tohuliaalio; wau olo ngoilanggubu madala lo Gosyen wau madala huta luasi daa̒ mohengu to ambahu huliaalio lo Gosyen, boli Lumbaya Yordan. 17-18Luasi lomadala boito tumula mao̒ monto hihui̒-Hui̒dea Dayato to ambahu huliaalio totili lo Edom, demola tilayo ngoilaminga Baal-Gad to Lumbaya Libanon ambahu hulilaalio lo Hui̒dee Hermoni. Lohiheo daa̒ tei Yosua helo paatea wolo mongo olongia lomadala boito, bo pulitio tio helo heu̒upo wau lomate olimongolio ngoa̒amila yila-yilateelo mao̒. 19Monto ngoa̒amila kokoo-tawaalo to ngoilanggubu madala boito, diaaluo penu boli tuwau mao̒ kota helohutu daantia u mosahabatia wolo Isirai̒lu, ngopohia Gibeon, kota lobangusa Hewi. Ngoa̒amila kota uwewo ilolaahelio todelomo popaatea. 20Eeya helohutu olimongolio baa̒ngiyolo lohilao u mopaatea wolo taulo Isirai̒lu, alilhu timongolio pobinasaalo, wau pateelio mate-mateelo mao̒ ngoa̒amila lou̒ diila o ambungu lotuuu̒de wolo palenta lo Eeya odelei Musa.
21To masa botie olo tei Yosua lonao̒ lopobinasa bangusa lo Enak, deu̒yito-yito bangusa rakisasa tahi biluloa̒wa tomadala hihui̒-hui̒dea – to Hebron, Debir, Anab, wau to ngoilanggubu madala hihui̒-hui̒dea lo Yehuda wau Isirai̒lu. Timongolio ngoa̒amilalo hepilate lei Yosua yila-yilateelo mao̒, wau kokoo-tawaalo limongolio pilobinasa. 22Diaaluo penu boli ngotaa mao̒ lonto bangusa lo Enak tai̒lo labita tolipu lo Isirai̒lu, bo to Gasa, Gat, wau Asdod donggo woluo.
23Ngoilanggubu lipu boito hilama lei Yosua tutuuu̒de wolo palenta lo Eeya odelei Musa, lapatao̒ yilohilio ode bangusa lo Isirai̒lu lowali miliki limongolio. Lipu boito hetilaya-tilayadio, wau timii̒du suku loo̒tapu ngotayadu.
Bangusa lo Isirai̒lu olo malo huheli lopaatea wau lipulio aamani wau sontosa.
Currently Selected:
YOSUA 11: LAIGOR
Highlight
Copy
Compare
Share
Want to have your highlights saved across all your devices? Sign up or sign in
