MONGO HAKIMU 5
5
Lahu li Debora wolei Barak
1Todulahee boito lopolahu mola ti Debora wolei Barak walae̒e Abinoam. Odie mola ualio mao̒:
2Pujiaalo mola Eeya, sababu papaa-halawaniyalo Isirai̒lu mai̒lo teekati u mohipate,
wau ulipu wolo ihilasi monao̒ u mopaatea.
3Dungohilo mai wuu mongo olongia wau walai̒ olongia,
wau̒ mopolahu mola ode Allahu Taa̒ala lo Isirai̒lu, deu̒yito-yito Eeya.
4Tou̒ Eeya lomonggata lonto Seir, yaa Eeya,
wau madala lo Edom tilolaa mao̒ lo Eeya,
dunia hilumehela, papaa-njurawalo hulungo olo lohuo̒,
wau hehee-ngowaalo lopo tuhutai taluhio.
5Huhuu-ideyaala lolotau̒lo
totalu lo tamo ngawaasa Sinai,
totalu lo Eeya, Allahu Taa̒ala lo Isirai̒lu.
6Tomaasa lei Samgar, walae̒e Anat, wau tomaasa li Yael olo,
diaaluo kapila tolipu, diaaluo tahinao̒wa ode utoonulalo mao̒ to dalaala daa̒.
7Kokoo-tawaalo Isirai̒lu dia otuangio,
moliilo daa̒ tunggula yio̒ lonao̒ mai, Debora;
yio̒ lonao̒ mai odelo tiilo tai̒lo tolia̒ngo.
8Tou̒ Isirai̒lu lolumula helolubo dewa,
malo butulo mola popaatea tolipu limongolio;
towolota wopato pulu lolihu lota pahalawani lobangusa,
diaaluo penu boli ngotaa mao̒ tahe lomintaa̒ tingolo.
9Tomongo eyanggu lo Isirai̒lu tamongohi batanga wolo iloheela lohilao,
pilopo tunggulomu polo hulumatiu̒ u lodelo-delomolo mao̒.
Pujiaalo mola Eeya!
10Wuu timongoli tahitae̒a tokolodai hula,
timongoli tahi huloa̒a toitaato polomadani,
wau timongoli ngoa̒amila tahinao̒wa tolimbuta,
pohabariyalo wungguli u loo̒haama botie!
11Totili lo aa̒a-liyaalo odungohe tau hirameya hipo dendangia,
hipo hunggulia ohohaama lo Eeya wuwuulia mola,
ohohaama lo Isirai̒lu, umati lo Eeya.
Yi malo tibarisilo mola timongolio
hidulunga ode hulubangi lokota.
12Tihuloolo Debora, wau polahuwalo mola lahu.
Pobongulo Barak, delowalo tahi tahangia!
13Tagaaga boli buheli tai̒lo labita monao̒ mai ode tau̒walio,
timongolio monao̒ mai, wau dapa-dapato u mohipate to Olio.
14Timongolio lonao̒ lonto Epraim ode lumbaya,
lodudua̒ pasuukani lei Benyamin tahi baarisia totalu limongolio.
Lonto Makhir malonao̒ mai mongo eyanggu,
wau lonto Jebulon tilimihulo mongo polowila.
15Tahimuloa lolipu lei Isakhar lonao̒ mai woli Debora,
ooo̒, tei Isakhar lonao̒ mai, wau tei Barak lodudua̒ olo;
timongolio lodudua̒ olio lotuhuto lumbaya.
Bo suku Ruben diila lowali lolantu siikapu
sababu towolota limongolio diila o heeluma.
16Yilongola timongolio lotibiluloa̒ towolota lo hihii-mbawaalo?
Wolo u modungoheo̒ diti hemotianga bibiahio?
Memangi suku Ruben diila mowali molantu siikapu
sababu towolota limongolio diila o heeluma.
17-18Tou̒ tei Jebulon wolei Naputali donggo hemohipate tio̒opatea totambati lo popaatea,
suku Dan hihuloa̒a hia̒mbua tokaapali, suku Gad debo hibiluloa̒wa to tiimuru lo Yordan,
hiambola suku Asyer hipoo̒oyonga wau diila mohuto mohei
monto tambati limongolio to ngohilayaa̒ biihu pentadu.
19To Taanakh, membideo̒ lodutula to Megido, mongo olongia hemopaatea,
mongo olongia lo Kanaa̒n hemohipate,
bo diaaluo talaa̒ udilelo limongolio odelo yilambato.
20Popoo-liyamaalo olo lodudua̒ lohipate loluwali olei Sisera,
lonto tambati piloti heliilia limongolio todulente.
21Dutulaa Kison lomeamea lopo leelihu laawani.
Maju, pomajulo wolo gaaga buheli, wuu jiwaau̒!
22Wolo linggahe masele selepai̒o babaa-atowaalo wadala
yiluntula tumetea̒ molinggahe daa̒ lojokilio.
23“Laa̒anatiyalo Meros, wau tahi tomelea todelomio,” ualo Malai̒kati lo Eeya
“sababu timongolio diila lonao̒ mai helomantu
odelo pahalawani tahemo hipate ode Eeya.”
24Iluntungilo ti Yael, dile lei Heber taulo Keni;
lonto ngoa̒amila tahi tomelea to kema, tioolo talaba-labaalo bilalakati.
25Tei Sisera lohile taluhu, bo tio longohi mao̒ susu to olio,
pilohintalio susu todelomo manggo u patuti ode mongo olongia.
26Wolo paku upilohutu monto ayu wau duuduo̒ to uluu̒lio
ti Yael lomate olei Sisera tunggula loa̒antulu lunggongio.
27To oa̒ato li Yael tio loombahu diila onyawa
leipolota tohuta yilateelo mao̒.
28Lonto tataa-laliyaalo tutuloa tiilo lei Sisera lotitile, wau loloi̒ya,
“Yilongola karetaalio, diila hememei dungga mai,
yilongola diila odungohe selepao̒ lo wadalalio?”
29Taa̒aripu daa̒ towolota lomongo dulahu tahi pomayawa olio
helo lameto u malo tapulio lohihilao todelomo hilaalio:
30“Timongolio donggo hemolaya-layade upango yilambato,
ode timii̒du pajule, ngota meaalo duulota tadulahu.
Odelei Sisera, balangi boo̒ u ohalaga daa̒,
odeli olongia taabua, wolimomo okarao hidala-dalaala tumbai̒o.”
31Pohileaala dua̒ mumuu-suuwaalo Eeya, yaa Eeya, mate debo odelo tei Sisera,
bo ngoa̒amila sahaabati lo Eeya ilotilapulo debo odelo mato lodulahu to dulente!
Lapatao̒ uito, mai̒laamani lomola lipu boito wopato pulu lotaunu mola hiheolio.
Currently Selected:
MONGO HAKIMU 5: LAIGOR
Highlight
Copy
Compare
Share
Want to have your highlights saved across all your devices? Sign up or sign in