MONGO HAKIMU 3
3
Babaa-ngusawalo tadebo hibiluloa̒wa tolipu lo Kanaa̒n
1U motesi tau-tauwalo Isirai̒lu tadiila pee̒enta mao̒ heloo̒ laasa popaatea to Kanaa̒n, Eeya lopoluli mao̒ demohelu ngoolo bangusa lotibiluloa̒ tolipu boito. 2Eeya lohutu mai uito bo wolo makusudu mongaajali timii̒du hilaide lo Isirai̒lu u mopaatea, tolomodulio timongolio tadiila pee̒enta mao̒ lodudua̒ helo tuuhua. 3Babaa-ngusawalo tadonggo hibiluloa̒wa tolipu boito yito: bangusa tahi poo̒oyonga todelomo olimo kota Pilistin, ngoa̒amila bangusa lo Kanaa̒n, bangusa lo Sidon, wau bangusa lo Hewi tahi biluloa̒wa to hihui̒-hui̒dea lo Libanon, tumulalo mao̒ monto Hui̒dee Baal-Hermon demola dalalo udulu-dulunga ode Hamat. 4Timongolio woluo mola teto u mowali odelo botu potesiyalo duo̒lo bangusa lo Isirai̒lu. Lou̒ odito mamowali otaawa wolo bangusa lo Isirai̒lu modudua̒ papaa-lentawalo umailohi mai lo Eeya odeli nenemoya limongolio lotimbulude olei Musa. 5Uitolo sababuulio tau-tauwalo Kanaa̒n, Het, Amori, Peris, Hewi wau Yebus debo hibiluloa̒wa tolipu boito pee̒-pee̒enta wolo umati lo Isirai̒lu. 6Umati lo Isirai̒lu helonika lou̒ulauwa wolo babaa-ngusawalo boito, wau lodudua̒ helolubo dedeewaalo limongolio.
Tei Otniel
7Umati lo Isirai̒lu ilodusa to Eeya, Allahu Taa̒ala limongolio. Timongolio helo malonga Olio, tilinggula timongolio malo ibaadati to babaa-laahalaalo Baal wau Asyera. 8Yi Eeya malo muluka to umati lo Isirai̒lu, wau helo poluli mao̒ ilolaahe li Olongia Kusyan-Risyataim lonto Mesopotamia. Walu lotaunu mola ti olongia boito helo ngawaasa olimongolio. 9Lapatao̒ umati lo Isirai̒lu helo ngiibode lei̒ tulungi to Eeya, tulusi Eeya longohi mai olei Otniel u lopo lopata olimongolio. (Tei Otniel yito walao̒ lonto Kenas, tawali-yali lei Kale.) 10Rohu lo Eeya helo ngawaasa olei Otniel tilinggula tio lowali tau̒wa umati lo Isirai̒lu. Tio mota lopaatea, tulusi Eeya helo poo̒haama olio toli olongia lo Mesopotamia. 11Yi mai̒laamani lipu boito wopato pulu lotaunu mola hiheolio. Lapatao̒ tei Otniel yilate.
Tei Ehud
12Umati lo Isirai̒lu luli ilodusa poli to Eeya, tilinggula Eeya lohutu mai olei Eglon, olongia lo Moab, lowali lebe molotolao̒ wolo umati lo Isirai̒lu. 13Ti Olongia Eglon malo panggala wolo bangusa lo Amon wau Amalek, lapatao̒ lopo olaaheo̒ taulo Isirai̒lu, tulusi lohama Yerikho, kota lohuruma boito. 14Walu lotaunu mola hiheolio umati lo Isirai̒lu kiluwaasa lei Eglon.
15Bo tou̒ umati lo Isirai̒lu helo ngiibode lei̒ tulungi to Eeya, Tio longohi mai olei Ehud u lopo lopato olimongolio. Tei Ehud ngotaalio taa̒hingo; tio walae̒e Gera lonto suku Benyamin, wau tiolo tabiasaalio hemo depitao̒ odeli Olongia Eglon doi hulawa wau uwewolio uwajibu pomayali lo umati Isirai̒lu. 16Todulahee tuwau tei Ehud lohutu mao̒ wamilo tuwau omato duluo u hayai̒o ngopee̒ ngoputu lomeeteri. Tio longanunao̒ womilo boito to wohutalio ambahu olowala todelomo boo̒lio, 17lapatao̒ tio lonao̒ mota lohudu doi hulawa wau uwewolio uwajibu pomayali lonto umati lo Isirai̒lu odeli Olongia Eglon. Ti olongia boito molingohe daa̒. 18Lapatao̒ lohudu mao̒ doi hulawa wau uwewolio uwajibu pomayali boito, tei Ehud lopoa̒hu tau-tauwalo tahi potaala doi hulawa wau uwewolio uwajibu pomayali boito lohualingo. 19-20Bo tei Ehud lohihilao lohuheeli tou̒ leidungga mota to boboo-tuwaalo u hiu̒ukilia totili lo Gilgal, lapatao̒ luli lohualinga odelei Eglon. Tou̒ boito tei Eglon woluo tohuwali u mohuhulo nyaamani tobele-belea toitaato lo Yilaidialio. Ualei Ehud mao̒ odelei Eglon, “Paduka Taa Molamahu! Watotia malodelo mai habari hitua-hituawua u milakusudu hetuuo̒lo alihu diila otaawa lotaa wewo odeli Tuaniu̒.”
Yi uali olongia mao̒, “Wolaatipo,” tulusi tio lomalentao̒ ngoa̒amila mongo watolio alihu lumualo wau mololaa mao̒ olio wolei Ehud tutuuwau.
Lapatao̒, tei Ehud lohimbideo̒ oli olongia tadonggo hulohuloo̒, tulusi loloi̒ya mao̒, “Woluo habari lonto Allahu Taa̒ala odeli Tuaniu̒!” Loo̒dungohe uito, ti olongia tilimihulo. 21-22Lolamemeto tei Ehud lomahuta wamilio wolo ului̒o oloihi lonto wohutalio ambahu olowala, lapatao̒ lopobetuo̒ lodelo-delomolo mao̒ ode ombongi olongia. Ngoa̒amila mato lowamilo boito tunggula pantungio olo tilumuwoto ode delomo tataa-bowaalo to ombongi olongia boito, tunggula lolaapata ode wulea. Tei Ehud lopoluli mao̒ wamilo boito teto, 23lapatao̒ yilumuala wau lolau̒ubeo̒ boli longunti mao̒ huhebu lohuwali boito, 24tulusi lonao̒.
Tou̒ mongo wato li olongia lonao̒ mai wau loo̒dungga huhuu-hebuwaalo lohuwali boito hiu̒ntia, yilantobi mongolio deu̒ ti olongia donggo todelomio wau donggo ode dibalaka. 25Lapatao̒ helohima odito hiheolio wau ti olongia debo diila lomuo̒ mai huhebu, yi timongolio malo lawalo wau tulusi lohama uu̒nti wau lomuo̒ huhebu boito. Yinta-yinta bililohi mongolio malo patatao̒ deu̒ olongia limongolio mailate bantibanti to wumbato huwali.
26Tou̒ timongolio donggo hipohimaawa, tei Ehud malo polahi batanga ode Seira loli boboo-tuwaalo u hiu̒ukilia. 27Lolamemeta tou̒ leidungga mola odelipu hihui̒-hui̒dea lo Epraim, tio malohiipa torompeti u lotingai taulo Isirai̒lu motuuhua. Timongolio lonao̒ mai lapatao̒ tio malodelo olimongolio lotuhuta mola lonto madala hihui̒-hui̒dea boito. 28“Dudui̒ mai watia,” ualio mao̒ olimongolio, “Eeya malo poo̒laaheo̒ tau-tauwalo Moab, musu limongoli boito ode limongoli.” Yi to tau̒wa lei Ehud, malo tuhuta mola tau-tauwalo Isirai̒lu boito lonto hihui̒-hui̒dea. Timongolio malohama tambati pobalanga taulo Moab to Dutulaa Yordan. Diaaluo penu boli ngotaa mao̒ lomusu boito yilulialio loa̒ahu lobalango. 29Todelomo polotuhua boito timongolio helomate yila-yilateelo mao̒ tanu mopulu lolihu lota suludadu lo Moab talaba-labaalo mopiohe; diaaluo taloo̒lahi. 30Todulahee boito Moab ilolaahe lo Isirai̒lu, yi oditolio maa ilaamanilo mola lipu boito walu lopulu lotaunu mola hiheolio.
Tei Samgar
31Tau̒wa tawumbutio mola yito tei Samgar walae̒e Anat. Tio olo helo hipate wau lopo lopato taulo Isirai̒lu. Wolo tunggudu polunuhe sapi, tio helomate yila-yilateelo mao̒ wolomo hetuto lota taulo Pilistin.
Currently Selected:
MONGO HAKIMU 3: LAIGOR
Highlight
Copy
Compare
Share
Want to have your highlights saved across all your devices? Sign up or sign in
