MONGO HAKIMU 19
19
Ngotaalio lo Lewi wau pipiaalio
1Tou̒ Isirai̒lu diipo o olongia, woluo ngotaalio lo Lewi tabilu-biluloa̒ tokambungu, tomadala hihui̒-hui̒dea lo Epraim. Tio malohama taabua ngota lonto Betlehemu Yehuda lowali pipiaalio. 2Bo lapatio mao̒ taabua boito loingo to olio, tilinggula tio luli lohualinga ode bele liyamolio to Betlehemu. Lapatao̒ taabua boito lotibiluloa̒ mola teto wopato hula mola hiheolio, 3taulo Lewi boito lonao̒ mola lohunuhe olio luli lomiyo lohualingai ode olio. Tio lonao̒ mola lodelo wato ngota wau kolodai mohelu duluo. Tou̒ leidungga mola odito, taabua boito lodelo olio ode liyamolio. Tou̒ tiyamo lotaabua boito loo̒onto olio, tio lolutulao̒ olio lou̒ wenga-wengahu, 4wau helo huntulao̒ olio alihu diila mohualingo. Sababu uito, tio malo tibiluloa̒ notilonggadu tolo hui mola wau lolamela longilu wau lotitihui mota teto wolo pipiaalio boito. 5Todulahee opatio, timongolio lobongu didimodupo daa̒ lapatao̒ lotidapa-dapato u lomonggato. Bo tiyamo lotaabua boito loloi̒ya mao̒ ode taulo Lewi boito, “Polamelopo alihu molotola mola. Timongoli mowali momonggato lapatio mao̒.”
6-7Yi lotihuo̒olo taulo Lewi boito tulusi lolamela pee̒-pee̒enta woliyamo lotaabua boito. Bo tou̒ tio tilimihula mola mamo monggato, tiyamo lotaabua malomiyo olio alihu diila monao̒. “Potiwenga-wengahupo,” ualio mao̒, “wau potihuipo tewe.” Yi loti tolaapo taulo Lewi boito teto ngohuipo mola.
8Todulahee olimolio, didimodupa daa̒, tou̒ tio mamo monggato, tiyamo lotaabua boito luli loloi̒ya mao̒, “Ntali, polamelopo, ngopee̒epo bolo momonggato.” Yi timongolio duduulota malo lamelo pee̒-pee̒enta wau hiboyua tunggula dulahee mahe tumolopa mota.
9Lapatao̒, tou̒ taulo Lewi boito wolo pipiaalio wau watolio mamo monggato tiyamo lotaabua luli loloi̒ya mao̒, “Dulahee mamembideo̒ lou̒ hui, bolo ngopee̒ mola mamo dio̒lomai. Lebe mopiohe motihuipo tewe wau motisana-sanangi. Lombu timongoli mowali mobongu didimodupo u momonggato wau mohualingo.”
10-11Bo taulo Lewi boito diilalo lohuto lotitihui teto. Tio wau pipiaalio lomonggato, pee̒-pee̒enta wolo watolio wau kolodailio mohelu duluo u osaali. Tou̒ dulahee mamembideo̒ lou̒ hui, timongolio leidungga mola totili lo Yebus (deu̒yito-yito Yerusalemu). Lapatao̒ wato boito loloi̒ya mao̒ odeli tuanilio, “Tuani, duloolo ito mohepitao̒ wau motitihui to kota taulo Yebus botie wambai̒o.”
12-13Bo tituanilio lolametao̒, “Diila! Ito diila tamohuheli totambati ulipulio diila taulo Isirai̒lu. Dulo ito mopo tolonga mola lo nonaoonto lononao̒onto ngopee̒epo wau de motitihui to Gibea meaalo to Rama.” 14Sababu uito timongolio lonao̒ tulusi wau diila lohuheli to Yebus. Dulahee maa tilumolopa mota tou̒ timongolio leidungga mola to Gibea tomadala losuku Benyamin. 15Timongolio lohepita mola teto u lotitihui, lapatao̒ tilumuwota ode kota wau lotihuloa̒ to tanalapa. Bo diaaluo penu boli ngotaa mao̒ tahe loloduo olimongolio ode belelio u motitihui.
16Tou̒ timongolio donggo hihuloa̒ to tanalapa lokota, malonao̒ mai taa panggola ngota taboheli lohualingai lonto kalajaalio to halabolu. Tio tutuulio tutu asaliilio mai lonto madala hihui̒-hui̒dea lo Epraim bo botia bilu-biluloa̒ to Gibea. (Ulipu wewolio to Gibea yito taulo Benyamin.) 17Tou̒ taa panggola boito loo̒onto taulo Lewi boito to tanalapa, tio lohintu mao̒, “Wutato lonto utoonu, wau ohilaa ode utoonu?”
18Taulo Lewi boito lolametao̒, “Amiaatia boheli lonto Betlehemu to Yehuda, wau donggo todelomo nonao̒ hiwalinga ode bele tokambungu to hihui̒-hui̒dea lo Epraim. Asalimai lowatia mola lonteeto mai. Diaaluo penu boli ngotaa mao̒ lonto ulipu lokota botie ohilaa mololimo olamiaatia tobelelio u motitihui. 19Amiaatia diila momalalu wolo-wolo uwewo, tomeu̒ lamiaatia motuuheta. Woluo laato wau ua̒alo ode kolodai lamiaatia; woluo roti wau angguru olaatia wolo dile lowatia botie wau wato lowatia.”
20Lapatao̒ ualo taa panggola boito, “Diila mao̒ polawalo, de watia tamo tulungi mai. Sambelolo motitihui to tanalapa botie.” 21Lapatao̒ tio lodelo olimongolio ode belelio tulusi helongohi mao̒ ua̒alo ode kolodai limongolio. Wau lapatao̒ mongo tamulio boito longulo oa̒ato, timongolio lolamelo.
22Tou̒ timongolio donggo hisanangia, debolo bele boito bilaala lotau-tauwalo tahileeta lonto kota boito. Timongolio helo ngokoa̒a huhebu loo̒ohuu̒ wau loloi̒ya ode taa panggola boito, “Wuduwalo mai olami talolai̒ tadilelomu mai ode belemu. Ami ohilaa mopohuna olio!”
23Taa panggola boito yumualai wau loloi̒ya ode limongolio. “Keke, mongo wutato! Harapuo lowatia, diila mao̒ pohutua sua̒li u moleeto wau diila patuti debo odelo uito, sababu tio tamu lowatia. 24De mawohi mai lowatia pipiaalio wau walao̒ lowatia tadulahu ode limongoli. Mowali timongoli mopoluli hilaa limongoli toli mongolio. Bo, diila mao̒ pohutua wolo-wolo u moleeto ode tamu lowatia boito!” 25Bo kalana tau-tauwalo tahi ruusawa debo momakusa, yi taulo Lewi boito malo huntude pipiaalio boito ode bulemengio ode limongolio. Lapatao̒ he pilolokosaa limongolio taabua boito lou̒ diila ohuheliilio demola dimodupo.
26Tou̒ donggo subu taabua boito luli lohualingai, bo totalu huhebu lobele lotaa panggola boito, tambati pilotihuiya lodilelio, tio iloleeta lohilao. Tou̒ dulahee malobutu mai tio debo donggo woluo teto. 27Dimodupo boito, tou̒ dilelio lobongu mai wau momuo̒ huhebu u momonggato, tio loo̒dungga pipiaalio leipoloto totalu lobele boito wolo uluu̒lio dihudihu tohuhebu. 28“Pobongulo,” ualio mao̒ olio, “dulo ito mamo monggato.” Bo taabua boito diila lolameto sababu mailate. Lapatao̒, tio lomintaa̒ taabua boito wau lopotae̒ mola ode yitaato kolodai, tulusi lomonggato u lohualinga ode belelio. 29Leidungga mola ode bele, tio tilumuwotao̒ wau lohama pito tulusi helo ngolo-ngolongao̒ milate lo pipiaalio boito lowali mopulaa dulo olongo. Lapatao̒ uito, heilaolio oo̒o-longowalo boito ode mopulaa dulo suku bangusa lo Isirai̒lu, tinggai ngoo̒olongo. 30Ngoa̒amila taa uloo̒onto mao̒ uito malo loi̒ya, “Diipo pee̒enta mao̒ sua̒li debo odelo utie helo toduo, tumulalo mai umati lo Isirai̒lu yilumualai lonto Masiri tunggula todulahee botie. Ito diila mowali bo motipoo̒oyo. Ito musi modulohupa u mohutu mao̒ hitua-tuawua!”
Currently Selected:
MONGO HAKIMU 19: LAIGOR
Highlight
Copy
Compare
Share
Want to have your highlights saved across all your devices? Sign up or sign in
