MONGO HAKIMU 17
17
Bubuu-iyaalo u hetilubo lei Mikha
1Woluo talolai̒ ngota tai̒lunte Mikha. Tio bilu-biluloa̒ tomadala hihui̒-hui̒dea tomadala lo Epraim. 2Tou̒ dulahee tuwau malo loi̒ya tio odeli maamalio, “Maama, tou̒ timaama iloolio lodoi talaa̒ ngolihu wau ngohetuto, ilodungohe lowatia timaama helo laa̒anati mao̒ potao̒lio. Utia, maama, doilio! Watiyaalo talotao̒ mao̒.” Ti maamalio lolametao̒, “Pohileaala dua̒ yio̒ balakatia mai lo Eeya, uuti!”
3Tei Mikha lopo walingao̒ doi boito odeli maamalio, lapatao̒ timaamalio loloi̒ya mao̒, “Alihu yio̒, walau̒uu̒, molopata monto laa̒anati u mailoi̒yau̒ boito, wau̒ mamopodewo ode Eeya talaa̒ botie u pomake pohutu bui̒ lo ayu u woludela lotalaa̒. Oditolio doi boito muli pohualinguu̒ mai olemu.”
4Lapatao̒ tei Mikha luli lopo walingao̒ doi boito odeli maamalio, wau timaamalio boito malohama dulo hetuto pita lonto doi boito, wau longohi mao̒ ode ngotaalio pani lotalaa̒. Lapatao̒ tio lopoa̒hu pani boito helohutu bui̒ lo ayu tuwau u yilolude wolo talaa̒ boito. Lapatao̒ bui̒ boito dilutulio tobele lei Mikha.
5Tei Mikha lohihilao maa otambati tuwau u hepo dewowalo. Tio helohutu mao̒ dengolo bui̒ balaahala wau ngopangge epod lapatao̒ lomudua̒ao̒ tala ngota lowalai̒o talolai̒ lowali iimamu. 6Tou̒ boito bangusa lo Isirai̒lu diila o olongia; ngota-ngota hipohutua wolo uhe lantobulio mopiohu.
7Tou̒ boito olo woluo tabohulotau ngota lonto Lewi. Bohu-bohulio mai tio bilu-biluloa̒ to Betlehemu tomadala lo Yehuda. 8Bo botia tio malo lolaa mao̒ kota boito wau donggo tononao̒lio hemololohe tambati u poti biluloa̒lo uwewo. Todelomo nonao̒lio boito tio malei dungga mola tobele lei Mikha tomadala hihui̒-hui̒dea tomadala lo Epraim. 9Tei Mikha lohintu mao̒ olio, “Wutata botie tau lou̒toonu?”
Tau boito lolametao̒, “Watia taulo Lewi lonto Betlehemu to Yehuda. Watia donggo hemo lolohe tambati poti biluloa̒lo.”
10Ualei Mikha mao̒, “Poti biluloo̒lo tewe wolau̒, alihu yio̒ mowali tamoo-nasehatia wau iimamu lami. De wau̒ mamongohi mai olemu mopuulo pita doi talaa̒ timii̒du taunu, wau olo pakeyangi wau ua̒alo.” 11-12Tabohulotau lo Lewi boito akolo, lapatao̒ tio piluduo̒ lei Mikha lowali iimamulio. Tio malo tibiluloa̒ tobele lei Mikha wau hepilo hutulio tio debo odelo walai̒o pulua lei Mikha lohihilao. 13Yi ualei Mikha mao̒, “Wonu odito, botia wau̒ yakini deu̒ Eeya mamohutu mai u mopiohe ode olau̒ sababu mawoluo taulo Lewi ngota talowali iimamuu̒.”
Currently Selected:
MONGO HAKIMU 17: LAIGOR
Highlight
Copy
Compare
Share
Want to have your highlights saved across all your devices? Sign up or sign in
