MONGO HAKIMU 10
10
Tei Tola
1Lapatao̒ tei Abimelekh yilate mao̒, tei Tola walae̒e Pua, lowali tau̒wa u lopo lopato taulo Isirai̒lu. Tio yito woombu lei Dodo lonto suku Isakhar. Biluloa̒lio to Samir tolipu hihui̒-hui̒dea lo Epraim. 2Dulo pulaa tolo taunu mola hiheolio tio helo titau̒wa to umati lo Isirai̒lu, lapatao̒ tio yilate mao̒ tulusi yilobungio to Samir.
Tei Yair
3Lapatao̒ tei Tola, Isirai̒lu tilau̒wa lei Yair dulo pulaa dulo taunu mola hiheolio. Tei Yair asaliilio mai lonto Gilead. 4Walai̒o mongo lolai̒ woluo tolopulu lota. Timongolio okolodai tolopulu u hetae̒alio wau tolo pulu kambungu tolipu lo Gilead. Kakaa-mbunguwalo boito donggo unte-unte kakaa-mbunguwalo lei Yair. 5Tei Yair yilate olo, wau yilobungio to Kamon.
Tei Yepta
6Umati lo Isirai̒lu luli ilodusa poli to Eeya. Timongolio diila lomandungi Eeya wau diilalo lolubo o-Lio. Timongolio helolubo bubuu-iyaalo Baal wau Asytoret, wau bubuu-iyaalo bangusa lo Siria, Sidon, Moab, Amon wau Filistin. 7Sababu uito Eeya lomuluka to umati lo Isirai̒lu, tunggula Tio lopoluli mao̒ bangusa lo Filistin wau bangusa lo Amon longawaasa olimongolio. 8Mopulu lotaunu mola hiheolio oluo bangusa boito helodeehe ngoa̒amila taulo Isirai̒lu tahi biluloa̒wa to Gilead, deu̒yito-yito madala taulo Amori to ambahu tiimuru lo Dutulaa Yordan. Timongolio helo pohutu tau-tauwalo Isirai̒lu wolo diila omanusia. 9Taulo Amon tumbao̒ helo balango Dutula Yordan u lonao̒ loluhu suku Yehuda, Benyamin wau Efraim tunggula umati lo Isirai̒lu helo dutolaa daa̒.
10Lapatao̒ umati lo Isirai̒lu helo ngiibodu mola ode Eeya, ualio mao̒, “Mongowatotia mailodusa to Eeya, mongowatotia diila lomandungi to Eeya, oo Allahu Taa̒ala lo mongowatotia. Mongowatotia helolubo bubuu-iyaalo Baal.”
11-12 Eeya lolametai, “Omoo̒omolu timongoli hekiluwasa wau hepilalenta lo bangusa Masiri, Amori, Amon, Filistin, Sidon, Amalek wau bangusa Maon. Lapatao̒ tou̒ boito timongoli helo ngiibodu lei̒ tulungi ola-U̒ diila odito? Nte eelaimola wolo Wau̒ diila lopoa̒ahu olimongoli lonto okokawasa limongolio? 13Eleponu odito, timongoli tumbao̒ debo helo bulemenga ola-U̒, lapatao̒ lonao̒ helolubo bubuu-iyaalo. Botia Wau̒ diilalo mohuto molopata olimongoli. 14Ponao̒lo wambao̒ ode bubuu-iyaalo u tilulaoto limongoli boito. Pongibodulo toli mongolio! Huliilo mao̒, timongolio tamo tulungi tou̒ timongoli odungga lou̒ suusa.”
15Bo umati lo Isirai̒lu loloi̒ya ode Eeya, “Mongowatotia mai̒lodusa, Eeya. Pohutuwalo mai wolo wambao̒ u kahandakia lo Eeya, asali Eeya motulungi mai olo mongowatotia todulahee botie.” 16Lapatao̒ timongolio malolapi ngoa̒amila bui̒ baalahala, lapatao̒ lolubo Allahu Taa̒ala. Yi Allahu Taa̒ala olo malodehu hilaa-Lio loo̒onto olimongolio todelomo suusa.
17Tou̒ boito suludadu lei Amon donggo dapa-dapato u mopaatea. Timongolio lotikema to Gilead. Umati lo Isirai̒lu olo malo tia̒mbu wau lotikema to Gilead. 18Mola teto ulipu wau mongo tau̒wa lonto susuu-kuwaalo Isirai̒lu boito tinggai hemo hihiintua wolo woluo towolota limongolio tabuheli momintaa̒a tingolo moluwali bangusa lo Amon. Tau boito mapo waliyola tau̒wa to ngoilanggubu ulipu lo Gilead.
Currently Selected:
MONGO HAKIMU 10: LAIGOR
Highlight
Copy
Compare
Share
Want to have your highlights saved across all your devices? Sign up or sign in
