YEHESKIEL 23

Taduulota tawali-yali wau tamohuhula tai̒lodusa

1 Eeya lotahuda mai odelaatia, tahuda lo Eeya, 2“Wuu manusia panaa, woluo mongobua duulota, tamohuhula wau tawaliyali. 3Tou̒ timongolio donggo humula mai, timongolio lotibiluloa̒ to Masiri. Mola teto timongolio iloolia lo tadulahulio, lapatao̒ lowali suuntali. 4Tamohuhula ilunte Ohola; tio mopobayaheo̒ Samaria. Tawali-yaliilio ilunte Oholiba; tio mopobayaheo̒ Yerusalemu. Wau̒ lonika woli mongolio wau loo̒tapu walao̒ lonto olimongolio duduu-lotaalo. 5Penu boli ti Ohola malowali dile-U̒, tio debo hemoti suuntali, wau ohilaa daa̒ hemololimo mongo tilantahio lonto Asyur. 6Timongolio boito yito suludadu tahipakea ngotumba meela lailoumu, tahi bangusawa wau tahidihuma pantungo lailaio̒; ngoa̒amilalo mongo polowila lo pasuukani owadala tahi gaagawa lakulio. 7Wolo taduduulaa̒ lo ulipu boitolo ti Ohola helojina. Donggo poli sababu malo odito bilahilio, tio helo ponajisi batangalio wolo hemolubo babaa-laahalaalo limongolio. 8Tio tulusi wambai̒o hemo tisuuntali debo odelo u muloololio mai hepilo hutulio to Masiri, tou̒toonu tio iloolia lo tadulahulio. Tumulalo u kikiii̒o mai, tio matiluuluhe wau hepilohutu lotau odelo tasuuntali. 9Sababu uito yiludu-U̒ tio ode mongo tilantahio, tau-tauwalo Asyur talaba-labaalo moo̒woloolo olio boito.

10Tio pilopolaala limongolio wolo bangganga, lapatao̒ pilatelio yila-yilateelo mao̒ wolo wamilo, wau mongo walai̒o yilamabatio. Penu boli tou̒toonu paladio boito hepo bibii-salaawa lo mongobua.

11Ti Oholiba, tawali-yaliilio heloo̒onto u lotoduo boito, bo tio lebe onapusu mojina woli Ohola. 12Ti Oholiba olo ohilaa daa̒ totau-tauwalo Asyur boito, deu̒yito-yito mongo bohulotau tahi gaagawa monto pasuukani owadala, tahi bangusawa wau tahidihuma pantungo lailaio̒, wau suludadu tahipakea ngotumba meela lailoumu boito. 13Wau̒ loo̒onto deu̒ ti Oholiba boito otutu maloruusa daa̒, tutuuwauwa debo odelo tahulangio.

14-15Helebe hihiiheo mola helebe loruusaalo mola ti Oholiba. Tio iloa̒anga daa̒ lo gagaa-mbaliyalo u pilaisaka to dingingo meeseli, wau tilumbai̒o wolo ceti debo odelo weela loduhu. Gagaa-mbaliyalo boito mopo bayaheo̒ tomongo polowila lo Babel wolo bintolo wohuta u gaaga wau sulubani u hilooloa̒. 16Tou̒ ti Oholiba loo̒onto gagaa-mbaliyalo boito, bilahilio lomalitutuo̒ wau tio lolao mota totoduo tomongo polowila boito to Babel. 17Yi lonao̒olo mai timongolio wau lotuluhe wolio. Timongolio helo pokootolo olio odito rupalio tilinggula pulitio tio molonua̒ olimongolio. 18Lapatao̒ uito wolo diila tuua̒ao̒-tuua̒ao̒ tio lotisuuntali wau lopobilohe batangalio totalu lotaa dataata. Wau̒ molonuo̒ moo̒onto olio, debo odelo molonuo̒ to tahulangio. 19Helebe hihiiheo mola helebe tilolongalio lojina, diila ohiihedio tou̒ tio donggo muda mai tou̒ tio helo tisuuntali to Masiri. 20Tio malo ilohilaa daa̒ tomongo lolai̒ uwali-walihuhu napusu bilahilio, wau umangowa bilahilio debo odelo udaa̒ lonapusu wadala ulai̒. (21Wuu Oholiba, yio̒ motohilaa moponguli mai huhutu ukootolo u hepilo hutumu tou̒ yio̒ donggo humulaamu mai, tou̒ taulo Masiri helo papaaluta tohilao wolemu.)”

Allahu Taa̒ala lomutoo̒ oli Oholiba

22 Eeya Taa Laba-labaalo molanggato lotahuda mai, “Wuu Oholiba, yio̒ malotolu wolo mongo tilantahumu, bo Wau̒ mamo popatu olimongolio alihu timongolio moingo olemu wau momaala olemu. 23Wau̒ mamongambu wau modelo mai ode olemu ngoa̒amila tilantahumu monto Babel, Pekod, Soa, Koa, Asyur, wau tau-tauwalo Kaldea. Deloo-U̒ mai ode olemu mongo bohulotau tahi gaagawa wau tao̒panggati lailaio̒, bangusawa, tadihudihu pantungo lipu upolohuna daa̒ wau mongo polowila lo pasuukani owadala. 24Timongolio mamoluhu olemu monto tilayo wolo suludadu uleidaa̒, wolo kakaa-letaalo popaatea wau kakaa-letaalo moodeloa tomeu̒. Wolo polanggu lo polisai wau hehee-lemuwaalo waja, timongolio mamomala olemu. Mapoluli-U̒ mao̒ timongolio momutoo̒ olemu modudua̒ butoo̒ limongolio lohihilao. 25Sababu Wau̒ muluka olemu, poluli-U̒ timongolio mopohutu mao̒ olemu wolo diila omanusia. Wulingo wau bulongamu mao̒yoodu limongolio wau mongo walau̒mu mahamaalio wau tumbilalio hitumula. 26Yio̒ mapo laalaalio wau ngoa̒amila pakemu malambatolio. 27Odieelo mola Wau̒ mamopo huheli napusu lo bilahimu wau totoonulalo polojina u hepilo hutumu tumulalo mai yio̒ to Masiri. Yio̒ diilalo motiwunela penu boli to balaahala toonu meaambo moo̒ eela mola to Masiri.”

28 Eeya Taa Laba-labaalo molanggato lotahuda mai, “Wau̒ mamohudu olemu ode tau-tauwalo tamoo̒jijio̒ wau yilonuu̒mu. 29Sababu timongolio molonua̒ olemu, ngoa̒amila tilapulo wolo bulemu tioopatea malambato limongolio. Yio̒ matolaalio laalaala sama-samaata odelo tasuuntali wau mowali pobibiilohe lotaa dadaata. Napusu bilahi wau ohulotoomulo 30u lopotoduo mai paladu mobulilo botie ode olemu. Yio̒ lowali suuntali ode babaa-ngusawalo, wau helo ponajisi lo batangamu wolo babaa-laahalaalo limongolio. 31Yio̒ lodudua̒ baa̒ato lo tahulangumu, masababu uito yio̒ mahukuu-maniyo-U̒ wolo hukuumani u tutuuwauwa.”

32 Eeya Taa Laba-labaalo molanggato lotahuda mai,

“Tuango manggo lo tamo-huhulamu musi tinggupomu.

Manggo boito hulinta wau modelomo.

Tuangio polupolu lo sosoo-lewowaalo wau henteo̒,

u musi bantaamu monto timii̒du tau.

33-34Manggo lo tamo-huhulamu Samaria,

tuatuango owoohe wau oa̒antulu.

Lapatao̒ yilumomu ngoa̒amilalo tuangio

yio̒ mahuwoa̒alo wau modutolo.

Wau wolo popoo-oowalo manggo boito

yio̒ mamongai-ngaidinga duhelumu.

Wau̒, Eeya Taa Laba-labaalo molanggato malo tahuda mai.”

35 Eeya Taa Laba-labaalo molanggato motahuda mai, “Sababu yio̒ malo lipata ola-U̒ wau lobumelenga ola-U̒, yio̒ mamodutolo akiibati lo napusu bilahimu wau polo suuntalimu.”

Hukuumani lo Allahu Taa̒ala to taduulota tawaliyali wau tamohuhula

36 Eeya lotahuda mai odelaatia, “Wuu manusia panaa, malo tidapato yio̒ momutoo̒ oli Oholo woli Oholiba? Dinia mao̒ timongolio pasali lo ohihina u mapilohutu limongolio. 37Timongolio malohutu polojina wau polomatea yila-yilateelo mao̒; timongolio malojina wolo babaa-laahalaalo wau lomate yila-yilateelo mao̒ tau̒kekee-ingoo-U̒ tapilotutu mai limongolio. Tau̒kekeei̒ boito mapilodewo limongolio ode babaa-laahalaalo limongolio. 38Wau diila bo uito wambai̒o. Timongolio olo helo ponajisi Belee-U̒ wau dulahu Saabati u matilantu-U̒ mai boito. 39To dulahee timongolio lomate tau̒kekee-ingoo-U̒ wau helo podewo mao̒ ode babaa-laahalaalo, taduulota mohutato tamohuhula wau tawaliyali boito lonao̒ mai ode Belee-U̒ wau helo pokootolo mao̒!

40Timongolio tumbao̒ helolao totoduo ode mongo lolai̒ to lilii-puwaalo u molamingo, wau timongolio olo lopoo̒polu mai totoduo boito. U lolutulao̒ to tahe tiluduo boito, taduulota tamohuhula wau tawaliyali boito lolihu, wau lomake padeto topalito mato wau helomake papaa-keyaalo. 41Lapatao̒ timongolio lotihuloa̒a toitaato tambati potuluhelo ugaaga. To talulio omeja u polupolu wolo hepohinta, leituwoto totabu wau winulo jaitun u mailohi-U̒ olimongolio. 42Monto bulemengio odungohe suala buluhuto daa̒ lotaa dadaata tahe motisana-sanangi. Tau-tauwala boito matiloduo mai lonto huta luasi ohungayo Timongolio lopotuotao̒ linggito to polotodu lo taduulota tamohuhula wau tawaliyali boito, wau lopohuli mao̒ mamaa-kutawalo ugaaga to lunggongio. 43Lapatao̒ to pikiili-U̒ mola, ‘Tingga mohuto tau-tauwala boito moitohe sinta wolo tahi suuntalio tamalo lolante sababu helojina?’ 44Wolo bubuulota tau-tauwalo helonao̒ mai odeli Ohola woli Oholiba, tasuuntali duulota tamaloruusa daa̒ boito. 45Bo, tahi saalea mamomutao̒ tamohuhula wau tawaliyali boito dadaasari to polojinawa wau polomatea mate-mateelo mao̒, sababu timongolio memangi ototala.”

46 Eeya Taa Laba-labaalo molanggato lotahuda mai, “Tiangaalo ngopo-woomboa tau u moposikisa wau molambata tamohutata duulota taamohuhula wau tawaliyali boito. 47Polulia mao̒ timongolio wolo botu wau tuhuolio wolo wamilo. Polulia mao̒ tau̒kekeei̒ limongolio tambalolio wau bebee-leyaalo limongolio pobuolio. 48To ngoilanggubu lipu mainggilo-U̒ oruusa debo odelo uito. Huhutuu-U̒ boito mamowali poe̒ela ode timii̒du mongobua alihu diila mao̒ mojina debo odelo tamohutato duulota tamohuhuula wau tawaliyali boito. 49Wuu Ohola wau Oholiba, Wau̒ mamo hukuumani mai olimongoli sababu timongoli hipojinawa wau hipoluboa balaahala. Yi mao̒taawa mao̒ limongoli deu̒ Wau̒ulo Eeya Taa Laba-labaalo molanggato.”

Currently Selected:

YEHESKIEL 23: LAIGOR

Highlight

Copy