PILOTIMUA̒TA 31
31
Allahu Taa̒ala helo lulaoto tau-tauwalo u mohutu Kema wau powimumutio
(Pilot. 35:30–36:1)
1 Eeya lotahuda odelei Musa, 2“Wau̒ malo lulaota olei Bejaleel walae̒e Uri, wombu lei Hur lonto suku Yehuda, 3wau lohudu mao̒ kawasaa-U̒ olio. Tio yilohiya-U̒ mao̒ ohuhama, pongotota wau mambo todelomo totoonulalo ilomata seni u hidala-dalaala: 4huna mohutu lanjana u momalalu ahaliilio wau mokalaja mao̒ monto hulawa, talaa̒, wau polunggu; 5u modumbata botu polioto u maa aatuluolo; u monguukiri ayu wau duo̒lo totoonulalo ilomata seni u hidala-dalaala wewolio. 6Tei Oholiab walae̒e Ahisamakh, lonto suku Dan, matilulaotu-U̒ olo u momantu olio. Yilohi-U̒ mao̒ olo ahali ulaba-labaalo ode papaa-niyaalo tamotota, alihu timongolio mowali mohutu penu boli wolo wambai̒o upilo malenta-U̒ mao̒: 7Kema-U̒, Bulua Daantia wau tau̒bio, ngoa̒amila pakaakasi lo Kema, 8deu̒yito-yito meja wau powimumutio, oa̒ato tohe monto hulawa tutu wolo powimumutio, mesba tambati pomobuwalo dupa, 9mesba tambati lo bake yilalango wau totoonulalo powimumutio, baki lotaluhu wolo wumbatio, 10pakeyangi lo ibaadati odelei Haruna wau mongo walai̒o, umusi pomake mao̒ tou̒ timongolio otuugasi odelo iimamu, 11winulo upacala, wau dupa moonu duo̒lo Huwali Leidaa̒ Mantali. Ngoa̒amila boito musi pohutuo mao̒ limongolio pasipasi modudua̒ potuhata uilohi-U̒ mai olemu.”
Saabati, dulahee pohuheliyalo
12 Eeya lomalentao̒ olei Musa 13u mopo malalumu ode bangusa lo Isirai̒lu, “Polameeya mao̒ dulahu Saabati, dulahee u matilantu-U̒ mai odelo dulahee pohuheliyalo. U ohiheo-hiheolo mao̒ dulahee boito mowali poe̒ela towolota limongoli wola-U̒, alihu otaawa mao̒ limongoli deu̒ Wau̒lo Eeya, wau deu̒ Wau̒ malo powali mai olimongoli, bangusaa-U̒ lohihilao. 14-15Dulahu pohuheliyala boito musi hulumatia mao̒ limongoli odelo dulahu u mantali. Timongoli wohiya-U̒ mai wolomohui mola u pokalajaalo, bo todulahu opitulio yi todulahee daa̒ u pohetuwola ola-U̒. Tatoonu tadiila mohulumati mao̒ dulahee boito, bo mokalaja todulahee boito musi hukuu-maniyolo mate. 16Bangusa lo Isirai̒lu musi mopolame mao̒ dulahee boito wawaalia mola odelo tuoto lo daantia. 17Todulahee boito yito tuwaulio poe̒ela u tatapu towolota bangusa lo Isirai̒lu wola-U̒, sababu Wau̒, Eeya, malohutu hulungo wau dunia todelomo wolomohui mola, wau todulahee u opitulio Wau̒ malo belenti lokalaja wau lohuheli.”
18Tou̒ yilapato helo tahuda odelei Musa toitaato Hui̒dee Sinai, Allahu Taa̒ala longohi mao̒ olio botu dulo pita umaa tiluladeo̒ lo Allahu Taa̒ala wolo papaa-lentaa-Lio.
Currently Selected:
PILOTIMUA̒TA 31: LAIGOR
Highlight
Copy
Compare
Share
Want to have your highlights saved across all your devices? Sign up or sign in
