PILOTIMUA̒TA 28
28
Pakeyangi li iimamu
(Pilot. 39:1-7)
1“Tianga mao̒ tei Haruna tamo huhulamu wolo mongo walai̒o lei Nadab, Abihu, Eleasar wolei Itamar, wau potolomoduo mao̒ timongolio alihu mowali momaya ola-U̒ odelo iimamu. 2Pohutua mao̒ pakeyangi iimamu odelei Haruna, alihu tio oontonga mao̒ hulu-hulumati. 3Tianga mao̒ ngoa̒amila tamoodetuma tamaa yilohiya-U̒ mao̒ ahali lou̒ modetu. Ahuli mao̒ timongolio mohutu pakeyangi lei Haruna alihu tio mowali poheetu u momaya ola-U̒ odelo iimamu. 4Ahuli mao̒ olo timongolio mohutu tau̒bu duhelo, boo̒ li iimamu, jumba, kameja okalawo, sulubani wau bintolo wohuta. Pakeyangi li iimamu boito musi pohutuo mao̒ limongolio odelei Haruna tamo huhulamu wau mongo walai̒o alihu mowali momaya ola-U̒ odelo iimamu. 5-6Pakeyangi boito musi pohutuo mao̒ limongolio monto lambuto himba wahue̒nte, lailoumu wau meela, pitolo hulawa wau lineni moa̒aluti. Ngopohia leeto boo̒ li iimamu musi polomuala wolo kalawo. 7Duluo tali lo binggungo polihuto boo̒ li iimamu musi detumolo tobiihio. 8Tuwau bintolo wohuta u kilalawo moa̒aluti monto baahani u tutuuwauwa musi detumolo to boo̒ li iimamu boito alihu mowali ngotayadu. 9-12Hamawa mao̒ dulobotu dalima. Lolohe mao̒ ngotaalio pani lohulawa taa ahali u monguukiri tobotu boito totaa-nggulaalo opulaa duulota mongo walae̒e Yako moduduo̒ toyunuto umululio, wolomo tanggulo totimii̒du botu. Lapatao̒ oluo lobotu polioto boito musi pohuliyola todelomo lesi hulawa wau dutuwola totali lobingungo loboo̒ li iimamu odelo tuoto poe̒ela mao̒ to mopulaa duluo suku lo Isirai̒lu. Wolo pohuli boito tei Haruna modelo tangguli mongolio to binggungio, tilinggula Wau̒, Eeya, laito moe̒ela olimongolio. 13Ngopohia lou̒ dulo lesi hulawa boito 14musi pohutuwola olo dulo lante monto hulawa tutu u tilulaoto debo odelo tali, u pohuliyola tolesi hulawa boito.”
Tau̒bu duhelo
(Pilot. 39:8-21)
15“Pohutua mao̒ odeli Iimamu Daa̒ tau̒bu duhela tuwau u pomake tou̒ tio motohilaa motota mao̒ kahandaki lo Allahu Taa̒ala. Baahani wau kalawo tau̒bu loduhelo boito musi tutuuwauwa wolo baahani wau kalawo boo̒ li iimamu. 16Moodelilio hitutu-tutuuwa wau piu̒wola duluo, tanggalo wau hayai̒o tinggai dulopulaa dulo senti. 17Popohulia mao̒ wopato baalisi botu polioto totau̒bu duhelo boito. Tobaalisi bohulio botu dalima, topas, wau baiduri sepa. 18Tobaalisi oluolio poliyoto moidu ohalaga daa̒, botu nilam, wau iintani. 19Tobaalisi otolulio botu lajuardi, botu akik wau botu kacubung. 20Tobaalisi opatio botu piirusi, yakut, wau ratna compaka. Polioto mopulaa duluo boito musi awadulo wolo hulawa. 21Totimii̒du polioto musi paisakalo mao̒ tala tuwau tanggula lo walae̒e Yako taa mopulaa duulota odelo tuoto poe̒ela ode susuu-kuwaala lo Isirai̒lu. 22Pohutua mao̒ ode tau̒bu duhelo boito lante duluo monto hulawa tutu u tilulaoto debo odelo tali. 23Pohutua mao̒ olo duluo pateda hulawa wau popohulia mao̒ toitaato huudio duuduluo lotau̒bu duhelo boito 24lapatao̒ potuwota mao̒ lante hulawa duluo boito ode delomo papaa-tedawaalo u engonti. 25Oluo huudu uwewo lolante boito musi poa̒wadulo to oluo lesi, alihu tau̒bu duhelo boito mowali powumbutolo wolo tali lo binggungo towimbihu talu lobinggungo loboo̒ li iimamu. 26Pohutua mao̒ olo duluo pateda hulawa, lapatao̒ popohulia mao̒ totau̒bu duhelo boito tohuudu lo walungo towimbihu delomio u ilotuhata loboo̒ li iimamu. 27Lapatao̒ uito, muli pohutua mao̒ pateda hulawa duluo, tulusi popohulia mao̒ towimbihu talu lo oluo tali lobinggungo epod totili wumbuta lo dudetumio ode walungo ngopee̒, towimbihu yitaato lobintolo wohuta u kilalawo moa̒aluti. 28Pateda lotau̒bu duhelo boito musi powumbutolo wolo tali wahue̒nte topateda loboo̒ li iimamu alihu tau̒bu duhelo boito debo woluo toitaato bintolo wohuta wau diila molopata.
29Tou̒ tei Haruna tumuwotao̒ ode tambati mantali, tio musi modelo mao̒ tataa-nggulaalo susuu-kuwaalo Isirai̒lu u pai-paisaka totau̒bu duhelio, alihu Wau̒, Eeya, laito moe̒ela to umati-U̒. 30Podutua mao̒ Urim wau Tumim todelomo tau̒bu dehelo boito u pomake lei Haruna wonu tio motaalua wola-U̒. To sasaa-atiyaalo debo odelo uito tio musi laito momake tau̒bu duhelo, alihu mowali otaawalio kahandaki-U̒ ode umati lo Isirai̒lu.”
Pakeyangi uwewo odeli iimamu
(Pilot. 39:22-31)
31“Jumba upomake toitaato boo̒ li iimamu musi ngoa̒amilalo pohutuwola monto lambuto himba wahue̒nte. 32Bunggohu buloo̒lio poo̒tohetola wolo pita kilalawo alihu diila gambangi mokedengo. 33-34Tobiihu pali-palito towimbihu walungo musi pohutuwola polomu debo odelo hungo lodalima monto lambuto himba wahue̒nte moa̒aluti, lailoumu wau meela, pohihii-yangolo wolo maruwasi monto hulawa. 35Jumba boito musi pomake mao̒ lei Haruna wonu tio otuugasi odelo iimamu. Tou̒ tio modudulai ode talu-U̒ to Huwali Leidaa̒ Mantali meaalo mololaa mao̒ tambati boito, mao̒dungohe tingohu lo maruwasi boito, alihu tio diila mao̒ mate.
36Pohutua mao̒ polomu tuwau monto hulawa tutu wau paisakawa mao̒ tataa-heyaalo ‘Poheetu ode Eeya’. 37Potihuta mao̒ uito to sulubani wolo tali wahue̒nte. 38Polomu hulawa boito musi popohulia mao̒ lei Haruna totau̒lio alihu Wau̒, Eeya ohilaa mololimo ngoa̒amila dewo udilelo mai taulo Isirai̒lu ode Olau̒, eleponu tou̒ modelo mai dewo boito timongolio malohutu totala.
39Kameja lei Haruna musi hewoolo lolineni moa̒aluti. Pohutua mao̒ olo sulubani tuwau monto lineni moa̒aluti wau bintolo wohuta u hilewo.
40Pohutua mao̒ kameja, bintolo wohuta wau sulubani ode mongo walae̒e Haruna alihu timongolio oontonga hulu-hulumati. 41Popohulia mao̒ pakeyangi boito to olei Haruna wutatumu wau mongo walai̒o. Winuli mao̒ timongolio wolo winulo jaitun; woleeto timongolio pomantaliyolo wau pohetuwolo u momaya ola-U̒ odelo iimamu. 42Lapatao̒ pohutua mao̒ ode limongolio talaala ngoputu monto kaingi lineni, hayai̒o monto wohuta tunggula bungolopa u molanggu wimbihu ilangganga udiila patuti bilohelo. 43Talaala boito musi laito pomake mao̒ limongolio tou̒ tumuwotai ode delomo Kema-U̒ meaalo mohimbideo̒ mesba u moi̒baadati odelo iimamu to Huwali Leidaa̒ Mantali, alihu timongolio diila mate sababu iloontonga mimbihu ilanggangi mongolio udiila patuti oontonga. Wau̒du boito debo pohu-pohutu odelei Haruna wau waliilio mola.”
Currently Selected:
PILOTIMUA̒TA 28: LAIGOR
Highlight
Copy
Compare
Share
Want to have your highlights saved across all your devices? Sign up or sign in
