TINGULI 25
25
1Humaya mao̒ duulota taulo Isirai̒lu monao̒ ode bubutoo̒ u mopo duloheo̒ palakala tuwau, lapatao̒ tangotaalio piloi̒laalo diila ototala, wau tawewo ototala. 2Wonu tao̒totala dehuwalo, hukuumani buboa̒alo, ti hakimu musi mopoa̒hu mao̒ olio motibonggohuu̒. Jumulaa pomuboa̒ala olio modudua̒ tou̒ ololeeto umaa pilohutulio, 3bo diila mowali lebe lou̒ poo̒opato pulu. Wonu lebe, uito boliilio tau boito hilina totalu lotaa dadaata.
4Diila mao̒ tongguu̒mi tunggilo sapi u donggo hemoheede pale.”
Uwajibu ode ngotaalio lowutato tailate
5“Wonu tau-tauwalo tamohutato motibiluloa̒ pee̒-pee̒enta, lapatao̒ tala ngota limongolio mate lou̒ diila lololaa mao̒ walao̒ talolai̒, yi jandalio diila mowali monika wolo tawewo to bulemengo ngaalaa̒ lodile tailate boito. Wutato lo tailate boito musi monika mao̒ wolo janda boito. 6Walao̒ talolai̒ mohuhula daa̒ limongolio musi anggapuola walao̒ lowutato tailate boito, alihu tio owali towolota bangusa lo Isirai̒lu. 7Wonu tio diila mohuto monika wolo dile lowutato tailate, yi taabua boito musi monao̒ mota motaalua wolo tahimuloa lokota wau moloi̒ya mao̒, ‘Wipahu lowatia diila mohuto mohutu uwajibu olio u mongohi ode wutatio ngotaalio lo wali towolota bangusa lo Isirai̒lu.’ 8Lapatao̒ tahimuloa lokota musi motiangao̒ tau boito wau mobisala wolio. Wonu tio debo diila mololimo, 9dile lowutatio tailate musi mohimbideo̒ olio totalu lo tahimuloa lokota, momahutao̒ sandale lotau boito, monula loiyohu tobayalio wau moloi̒ya mao̒, ‘Odie mola umusi pohutuo mao̒ lotaa udiila mohuto mongohi wali ode wutatio.’ 10Ngaalaa̒ lotau boito mao̒onuhe to Isirai̒lu odelo ‘Ngaalaa̒ lotaa u pilomahuta sandalelio.’ ”
Wuwuu-uduwaalo uwewo
11“Wonu duulota mongo lolai̒ donggo hemoloohulua wau dile lo taa ngotaalio motolopani mao̒ motulungi dilelio wolo momitilao̒ tilalua tuwali lodilelio, 12yi pontode mao̒ uluu̒ lo taabua boito diila mao̒ potolia̒nga olio.
13-14Diila mao̒ pohimbulo wolo momake titimenga wau tuuu̒du udiila otutu. 15Pomakea mao̒ titimenga wau tuuu̒du u tuhaata alihu humayao̒ tutumuli mongoli tolipu uwohi mai lo Eeya Allahu Taa̒ala limongoli ode limongoli. 16Eeya Allahu Taa̒ala limongoli molonua̒ totaa motohilaa mohimbulo.”
Palenta u momate-mateelo mao̒ taulo Amalek
17“Eelai mao̒ woloolo mola taulo Amalek helo pohutu olimongoli tou̒ timongoli todelomo nonao̒ yilumualai lonto Masiri. 18Timongolio diila moohe to Allahu Taa̒ala wau heloluhu olimongoli lonto wulea tou̒ timongoli donggo hiwoongola wau ilopulita lo lotolo, tulusi helomate ngoa̒amila tau-tauwalo limongoli yila-yilateelo mao̒ u wolo tio̒opatea hinao̒wa towulea. 19Masababu uito, wonu Eeya Allahu Taa̒ala limongoli malongohi mai lipu boito ode limongoli wau timongoli aamani monto ngoa̒amila muusu tahi biluloa̒wa topalito limongoli, yi ngoa̒amila taulo Amalek boito musi pateelo mate-mateelo mao̒ limongoli alihu timongolio diilalo o eela. Diila mao̒ lipata!”
Currently Selected:
TINGULI 25: LAIGOR
Highlight
Copy
Compare
Share
Want to have your highlights saved across all your devices? Sign up or sign in
