TINGULI 23
23
Tau-tauwalo tadiila hituwota to umati lo Eeya
1“Taa u mabilitua meaalo tai̒loloto tilalualio diila mowali pongawaa̒ umati lo Eeya.
2Taa u potutuolio mai to bulemengo nika wau ngoa̒amila waliilio demola wali u opitulio, diila mowali mali pongawaa̒ umati lo Eeya.
3Taulo Amon wau Moab wau wali limongolio demola u opitulio diila mowali mali walaga umati lo Eeya, 4sababu timongolio diila mohuto mongohi ua̒alo wau taluhu tou̒ timongoli todelomo nonao̒ yilumualai lonto Masiri. Tumbao̒ timongoli helongohi wuupa odelei Bileam, walae̒e Beor lonto kota Petor to Mesopotamia, u lolaa̒anati olimongoli. 5Bo Eeya Allahu Taa̒ala limongoli diila lohuto lodungohe olei Bileam. Bolii̒o mao̒ Eeya lomolio̒ laa̒anati boito wolo balakati, sababu Tio momonu olimongoli. 6Ngotilonggadu timongoli tumu-tumulo tunggula ohiheo-hiheolo mao̒, diila mao̒ potulungi to babaa-ngusawalo boito meaalo mohutu mao̒ olimongolio moa̒ahu.
7Diila mao̒ pomilohe dupa-dupapa taulo Edom sababu timongolio boito wutati mongoli. Diila mao̒ pomilohe olo dupa-dupapa taulo Masiri, sababu timongoli mapee̒enta lotibiluloa̒ tolipu limongolio. 8Tumulalo mai monto hilaide otolulio wau wumbutio mola wali mai limongolio diila mowali pongawaa̒ umati lo Eeya.”
Modaha obobelesi polokemawa lo suludadu
9“Tou̒ timongoli donggo hemopaatea, timongoli musi mohei mao̒ monto totoonulalo hitua-hituawua umoo̒ najisi olimongoli. 10Wonu ngotaalio mowali najisi sababu helo poheeheto mani tou̒ tuutuluhu, tio musi mololaa mao̒ polokemawa wau motibiluloa̒ to bulemengio. 11Tou̒ meidungga mai lolaango tio musi molihu wau tou̒ dulahee tumolopaa mota tio mowali muli mohualingao̒ ode polokemawa.
12Timongoli musi mopo dapato tambati to bulemengo polokemawa u pongiliyala loloyili. 13Wonu motohilaa odito mola, delowalo ngopohia powimumuti mongoli olo ayu ngoputu u pongakudelo huango pongiliyalo wau u molambulao̒. 14Eeya Allahu Taa̒ala limongoli pee̒-pee̒enta woli mongoli todelomo polokemawa limongoli u moduo̒lai olimongoli wau mongohi olimongoli u moo̒haama to mumuu-suuwaalo limongoli. Yi poo̒dahailo alihu polokemawa limongoli debo belesi. Diila bolo odungga u hitua-tuawua udiila patuti towolota limongoli, alihu Eeya diila mao̒ mololaa olimongoli.”
Wuu̒du u hidala-dalaala
15“Wonu bolo ngotaalio lowato mopolahi batanga monto lituanilio tulusi monao̒ mai ode limongoli mei̒ duo̒la, diila mao̒ pei̒ walinga tio. 16Tio mowali motibiluloa̒a totala tuwau lokota limongoli modudua̒ u tilulaotio, wau timongoli diila mowali mopohutu mao̒ olio wolo bangganga.
17Ngotaalio lo Isirai̒lu, mopio talolai̒ meaalo taabua, diila mowali mali tasuuntali to kukuu-wiliyaalo pomujaalo. 18Wau olo doi u motapu mai monto tilapulo posuntaliyalo boito diila mowali deloolo ode Bele lo Eeya Allahu Taa̒ala limongoli u pomaayali danti, sababu Eeya Allahu Taa̒ala limongoli molonuo̒ tasuuntali to kukuu-wiliyaalo pemujaalo wau tilapulo monto posuntaliyalo boito.
19-20Wonu timongoli mopo bulotao̒ doi ode tau deli, timongoli mohile mao̒ lente. Bo wonu timongoli mopo bulotao̒ doi meaalo ua̒alo meaalo balangi wewo ode tango bangusa woli mongoli, yi bubulota boito musi wohiyala lou̒ diila olente. Dongohi mao̒ palenta boito, yi Eeya Allahu Taa̒ala limongoli mobalakati mai totoonulalo hitua-tuawua u pohutuo limongoli tolipu u potibiluloa̒ limongoli.
21Wonu timongoli modaantia hitua-tuawua ode Eeya Allahu Taa̒ala limongoli diila mao̒ helohu-lohudua u moe̒elao̒ danti boito, sababu Eeya Allahu Taa̒ala limongoli debo mohile wolo moo̒ohuu̒ olio, wau timongoli odusa wonu diila mopoo̒polu mao̒. 22Timongoli diila odusa wonu diila modanti mao̒ ode Eeya. 23Bo wonu timongoli wolo iloheela lohilao mondaantia to Eeya Allahu Taa̒ala limongoli, timongoli wajibu moe̒elao̒.
24Wonu bolo timongoli donggo tononao̒ molibaya to ilengi lo angguru lotaa wewo, timongoli mowali molamelao̒ hungo lo angguru ngodaata u otohilaa limongoli, bo diila mowali mohimoa̒ao̒ todelomo kalanji. 25Wonu timongoli donggo tonanao̒ molibaya to halabolu lopale lo taawewo, timongoli mowali molamela pale u tilipu limongoli wolo uluu̒, bo diila mowali otolaalo wolo langgapa.”
Currently Selected:
TINGULI 23: LAIGOR
Highlight
Copy
Compare
Share
Want to have your highlights saved across all your devices? Sign up or sign in
