TINGULI 19
19
Kokoo-tawaalo potiduo̒lalo
(Yi. 35:9-28; Yos. 20:1-9)
1“Lapatao̒ babaa-ngusawalo boito pobinasa lo Eeya Allahu Taa̒ala limongoli wau lipulio wuduolio olimongoli, wau lapatao̒ timongoli mohama mao̒ kokoo-tawaalo wau bebee-leyaalo limongolio wau motibiluloo̒ teto, 2-3lipu boito musi tayadu mao̒ limongoli mowali tolo tayadu, tinggai wolo kota tuwau potiduo̒lalo u gambangi aatoolo alihu timii̒du tamoomatea mate-mateelo mao̒ mowali mopolahi batanga odito mola. 4Wonu tahingota-ngotaawa lou̒ diila sangaja malomate yila-tilateelo mao̒ taa wewo tadiila musuulio, tio mowali mopolahi batanga ode tala tuwau lokota boito wau debo moo̒ tumulo. 5-6Humayaalio duulota pee̒-pee̒enta tumuwota ode oa̒yuwa u moluwode ayu. Sambela tangotaalio moluwode bungo lo ayu, lunggongo buliingio molopato monto dihumalio wau tuhata to sahaabatilio tilinggula yilate. Yi taa u malomate yila-yilateelo mao̒ lou̒ diila sangaja boito diila ototala wau mowali tumeteo̒ ode tala tuwau lo tolokota potiduo̒lalo boito alihu moa̒ahu. Humayaalio bo woluo tala tuwau lokota potiduo̒lalo, tanu walahio odito mola molaminga daa̒, wau pongawaa̒ lo ngaalaa̒ tatihu-tihula u molontuli polomatea mate-mateelo mao̒ boito, mowali mohilapita olio wau todelomo oyiyingolio momate mateelo mao̒ taa udiila ototala. 7Sababu uito wau̒ momalentai olimongoli u mopo dapato tolokota.
8Wonu bolo Eeya Allahu Taa̒ala limongoli malopo tanggalao̒ madala limongoli upilo danti-Lio ode loluuhuru limongoli, wau ngoilanggubu lipu boito mailohi mai ode limongoli, 9timongoli musi muli molulaoto totolu kota potiduo̒lalo. (Lipu boito mawuduolio mai ode limongoli wonu mohutu mao̒ totoonulalo upilo malentai lowatia ode limongoli todulahee botie, wau wonu timongoli motolia̒nga to Eeya Allahu Taa̒ala limongoli wau modudua̒ pongaajali-Lio.) 10Pohutua mao̒ uito alihu timongoli diila mao̒ odusa sababu mopoluli taa udiila ototala pilatelio yila-yilateelo mao̒ tolipu uilohi mai lo Eeya Allahu Taa̒ala limongoli ode limongoli.”
11“Bo wewo sua̒liilio wonu tahingota-ngotaawa momontoa̒a musuulio wau wolo sangaja wau laasa molonuo̒ momate olio mate-mateelo mao̒, lapatao̒ mopolahi batanga ode tala tuwau lokota potiduo̒lalo u moo̒tapu mao̒ poloduo̒la. 12Todelomo sua̒li boito mongo tau̒wa lo kotaalio musi motiangai tau boito tulusi mohudu mao̒ olio ode pongawaa̒ ngaalaa̒ tatihu-tihulo u molontuli polomatea mate-mateelo mao̒ boito, alihu tio mowali pateelo mate-mateelo mao̒. 13Diila mao̒ podehu hilao to olio. Lopataalo Isirai̒lu monto polomatea mate-mateelo mao̒ boito, alihu timongoli aamani sontosa wau maa̒amulu.”
Didini u mongiideo̒ siipati lohuta
14“Wonu bolo timongoli malei dungga mola tolipu uwohi mai lo Eeya Allahu Taa̒ala limongoli ode limongoli, diila mao̒ iide siipati lohuta lo tiheedi mongoli u matilantu mao̒ to jamani muloololio mai.”
Wuu̒du pasali losakusi
15“Ngotaalio losakusi wambao̒ diila motuuu̒de u mopoi̒laalo mao̒ ngotaalio potu-potuludu ototala; ngoi̒dilio duulota sakusi palaluwola to sua̒li boito. 16Wonu tahingota-ngotaawa ohilaa mopodehu taa wewo wolo potuludu upaluti to bubutoo̒, yi 17duduulotalo musi monao̒ mota ode tambati lo ibaadati utilantu mao̒ lo Eeya alihu aadilio lomongo iimamu wau hakimu tadonggo otuugasi. 18Mongo hakimu musi motulete mao̒ palakala boito wolo ulintapo, wau wonu moi̒laalo tau boito mopitana timongotalio taulo Isirai̒lu, 19tio musi mololimo hukuumani u milakusudu duo̒lo tuwaliilio boito. Lou̒ odito timongoli mopodiaaa̒ ololeeto boito. 20Ngoa̒amila tau mamo dungoheo̒ tomimbihu losua̒li boito mamowali moohe, tilinggula diilalo woluo tamohutu ololeeto debo odelo uito. 21Diila mao̒ podehu hilao todelomo papaa-lakawaalo debo odelo uito. Hukuu-manilio debo odelo: Nyawa towoliyala lonyawa, mato towoliyala lomato, dungito towoliyala lodungito, uluu̒ towoliyala lo uluu̒ wau oa̒to towoliyala lo oa̒ato.”
Currently Selected:
TINGULI 19: LAIGOR
Highlight
Copy
Compare
Share
Want to have your highlights saved across all your devices? Sign up or sign in
