TINGULI 17
17
1Diila mao̒ podewowa sapi meaalo himba u otailo ode Eeya Allahu Taa̒ala limongoli, sababu oloonuo̒ Eeya uito.
2Wonu bolo timongoli moo̒dungohe deu̒ to talatuwau lokota limongoli woluo taa u odusa to Eeya Allahu Taa̒ala, sababu helo lambanga daantia 3wau palentaa-Lio wolo lolubo wau lotiwato to ila-ila wewo meaalo ode mato lodulahu, hulalo meaalo popoo-liyamaalo, 4yi timongoli musi motulete mao̒ wolo ulintapo. Humayaalio ololeeto boito otu-otutuulo mao̒ malo toduo to Isirai̒lu, 5yi taa u ototala boito musi deloolo ode bulemengo kota wau pai̒yola lobotu tunggula mate. 6Bo tio bo mowali hukuu-maniyolo mate wambai̒o wonu osakusi duulota meaalo lebe; tahingota-ngotaawa diila mowali hukuu-maniyolo mate bo patopatoa̒a to katalaangani losakusi ngota wambai̒o. 7Mongo sakusi musi momai̒ mao̒ lobotu ubohulio ode tau boito, lapatao̒ dudua̒ lo ngoilanggubu ulipu. Lou̒ odito timongoli mopodiaa̒a ololeeto boito.
8Wonu bolo woluo palakala udiila mowali putuusanio lomongo hakimu ngotambati sababu mototolo daa̒, humayaalio palakala polomatea mate-mateelo mao̒ u silangaja meaalo diila silangaja, polo hulinggila pasali lo motolo miiliki meaalo mopapaalia wawao̒, yi timongoli musi monao̒ mota ode tambati u tilulaoto Eeya Allahu Taa̒ala limongoli. 9Podudula mao̒ palakala limongoli boito ode mongo iimamu lo Lewi wau ode hakimu tadonggo otuugasi, lapatao̒ polulia mao̒ olimongolio u momutuusani mai. 10Timongoliolo tamongohi putuusani, wau timongoli musi moponao̒ mao̒ wolo ulintapo tou̒ wolo u mailoi̒ya limongolio ode limongoli boito. 11Tolimowalo putuusani limongolio wau pohutua mao̒ wolo u pilopo tatapu mai limongolio tunggula tosua̒li ukekeei̒ daa̒. 12Tatoonu wambai̒o tabuheli moluwali hakimu meaalo iimamu tadonggo otuugasi, musi hukuu-maniyolo mate; lou̒ odito timongoli mopodiaa̒a ololeeto boito to Isirai̒lu. 13Ngoa̒amila tau mamo dungohe pasali lou̒ motoduo mai boito wau mamoohe, tilinggula diduu̒ tabuheli u mohutu mao̒ odito.”
Wuwuu-uduwaalo pasali li olongia
14“Wonu bolo huta uwohi mai lo Eeya Allahu Taa̒ala limongoli ode limongoli malowali miliki limongoli, wau timongoli malo tibiluloa̒ mota teto, tanu timongoli o hilao ngotaalio li olongia debo odelo babaa-ngusawalo wewo tahi biluloa̒wa topalito limongoli. 15Poo̒tuota mao̒ tio̒otutua alihu taa u puduo̒ limongoli mowali olongia limongoli yito taa u tilulaoto Eeya Allahu Taa̒ala limongoli. Tio musi ngotaalio lobangusa limongoli lohihilao; diila mao̒ pomuduo̒ ngotaalio lotau deli mowali olongia limongoli. 16Olongia diila mowali motolo miliki wadala dadaata duo̒lo suludadulio wau diila mopoa̒hu bangusa botie muli mohualinga ode Masiri mola matali mai wadala, sababu Eeya malo tahuda mai deu̒ umati-Lio diila mowali muli mohualinga mola ode lipu boito. 17Olongia diila mowali odile dadaata, alihu tio diila mao̒ momulemengo to Eeya. Tio olo diila mowali mopokaya batanga wolo talaa̒ wau hulawa. 18Wonu ngotaalio puduo̒lo mowali olongia, tio musi wohiyalo buku utua-tuanga bubuu-too̒owalo Allahu Taa̒ala uwamiyolo monto buku pulua utilahu lomongo iimamu Lewi. 19Buku boito musi laito woluo totiliilio, ngotupa lo tutumulo tio musi mobaca mao̒ alihu mobalaajali mohulumati to Eeya Allahu Taa̒alaalio wau wolo tatapu wau molotolo hilao modungohe totoonulalo palenta utula-tuladee todelomio. 20Wonu tio mobaca mao̒ wolo tio̒otutua, tio diila tamo nganggapu batangalio lebe mopioheo̒ wolo tau-tauwala ngobangusa wolio, wau diila tamo lambanga palenta lo Eeya penu boli wolo dudelo woloolo mola wamabi̒o. Lapatao̒ tio wau waliilio mamo malenta bangusaalio tunggula wawaalia mola.”
Currently Selected:
TINGULI 17: LAIGOR
Highlight
Copy
Compare
Share
Want to have your highlights saved across all your devices? Sign up or sign in
