TINGULI 14
14
Dudelo lo motilimi udinidini
1“Timongoli yito umati lo Eeya Allahu Taa̒ala limongoli. Oditolio tou̒ timongoli motilimi duo̒lo taamate, diila mao̒ palia batanga limongoli meaalo monguluhe to ambahu tau̒ lo lunggongumu debo odelo hepohutuo lo babaa-ngusawalo wewo. 2Timongoli yito miliki lo Eeya Allahu Taa̒ala limongoli; monto totoonulalo bangusa totudu lodunia, timongolilo tatilulaoto Allahu Taa̒ala u mowali umati-Lio.”
Binatangi uharamu wau uhalale
(Im. 11:1-47)
3“Diila mao̒ polamela binatangi poilaalo mai lo Eeya haramu. 4Timongoli mowali molamela bibii-natangiyalo botie: sapi, himba, batade, 5buu̒lu, himba lo oa̒yuwa, batade lo oa̒yuwa, kijangi 6wau ngoa̒amila binatangi u luo̒bio hibutaa̒ wau hemoheede. 7Timongoli diila mowali molamela binatangi u luo̒bio diila hibutaa̒ wau diila hemoheede. Diila polamela unta, kolinci meaalo udu lowalanta. Binatangi boito haramu sababu penu boli hemoheede, luo̒bio diila hibutaa̒. 8Diila mao̒ polamela boi. Binatangi boito haramu, sababu penu boli luo̒bio hibutaa̒, boi boito diila hemoheede. Tapulio diila mowali tameloolo, patelio diila mowali dedetolo.
9Timongoli mowali molamela totoonulalo tola obulihu wau otolitio̒ u hidala-dalaala. 10Binatangi u hitumula todelomo taluhu bo diila obulihu wau otolitio̒ ytio haramu, oditolio diila mowali tameloolo.
11Timongoli mowali molamela totoonulalo bulungi hidala-dalaala udiila haramu. 12-18Bo dengolo dalaala bulungi udiila mowali tameloolo, deu̒yito-yito bulungi: angga-angga, maluo̒ moluluwola, totoonulalo bulia u hidala-dalaala, nasari, paao̒, bulungi unta, camar, bitubitua wau totoonulalo duayo u hi dala-dalaala, undan, kasa wau abuhu.
19Ngoa̒amila buhudu u opolipio̒ yito haramu, oditolio diila mowali tameloolo. 20Binatangi opolipio̒ udiila haramu mowali tameloolo.
21Binatangi u yilate wolo hilaalio diila mowali tamelo limongoli, bo mowali tamelo lotau deli tabilu-biluloa̒ towolota limongoli, meaalo potaali ode bangusa wewo. Timongoli yito umati tapilohetu ode Eeya Allahu Taa̒ala limongoli.
Tapu lowalao̒ himba meaalo walao̒ batade diila mowali tubuolo wolo taluhu susu liilolio.”
Wuu̒du pasali lodewo ngotayade mopulu
22“Timii̒du taunu timongoli musi mopowiwi mao̒ ngotayade mopulu monto ngoa̒amila tilapulo huta limongoli. 23Totalu lo Eeya Allahu Taa̒ala limongoli, totambati u tilulaoto Eeya, duo̒lo tambati poi̒baatiyalo, timongoli musi molamelao̒ dewo ngotayade mopulu monto pale, taluhu angguru, winulo jaitun wau walao̒ sapi wau batade himba limongoli ubohulo pilotutu mai. Pohutua mao̒ sua̒li boito alihu u ohiheo-hiheolo mao̒ timongoli mobalaajali mohulumati to Eeya Allahu Taa̒ala limongoli. 24Wonu tambati u tilulaoto Eeya Allahu Taa̒ala limongoli boito laba-labaalo molaminga monto bele limongoli, tilinggula ngotayade mopulu monto tilapulo huta limongoli uilohi mai lo Eeya Allahu Taa̒ala limongoli diila mowali deloo mota limongoli odito, yi 25potaalia mao̒ tayade monto tilapulo huta limongoli boito, wau delowa mota doilio ode tambati u tilulaoto Eeya Allahu Taa̒ala limongoli. 26Pobalanjawa mao̒ doi boito penu towolo wambai̒o u otohilaa limongoli – sapi meaalo ngaalaa̒ limongoli musi molamela pee̒-pee̒enta wau motisana-sanangi.
27Diila mao̒ polulia iloloihia taulo Lewi tahi biluloa̒wa to kokoo-tawaalo; eelai mao̒ deu̒ timongolio boito diila ohuta lohihilao. 28To motii̒du pulito lotaunu u otolulio, timongoli musi modelo mota ngotayade mopulu tayadio lo tilapulo huta limongoli wau mohimoa̒ao̒ to kokoo-tawaalo limongoli. 29Ua̒alo boito ode taulo Lewi sababu timongolio diila ohuta, wau ode tau deli, walao̒ tadidu otiilo otiyamo wau tahi jaandawa tatumu-tumulo to kokoo-tawaalo limongoli. Timongolio mowali monao̒ mai wau mohama mao̒ totoonulalo upalaluo limongolio. Wonu timongoli mohutu mao̒ odito, yi Eeya Allahu Taa̒ala limongoli mamo balakati mai ngoa̒amila kelakela limongoli.”
Currently Selected:
TINGULI 14: LAIGOR
Highlight
Copy
Compare
Share
Want to have your highlights saved across all your devices? Sign up or sign in
