TINGULI 10
10
Tei Musa u oluolio lololimo Mopuulo Palenta lo Allahu Taa̒ala
(Pilot. 34:1-10)
1“Lapatao̒ Eeya lotahuda mai ode laatia, ‘Musa, pahaatia mao̒ duluo botu dembela molipa debo odelo u bohulio, wau pohutua mao̒ olo bulua lo ayu tuwau u podutualio, lapatao̒ ponao̒lo mai ode ola-U̒ to bolitutuo̒ hui̒du. 2To boboo-tuwaalo boito mapolulade-U̒ tataa-heyaalo u tutuuwauwa debo odelo tobotu u mapiloo̒mu; lapatao̒ boboo-tuwaalo boito potuwotomu mao̒ ode delomo bulua boito.’
3Lapatao̒ watia lohutu mao̒ bulua lonto ayu aakasia wau helo maahati botu duluo debo odelo u omoo̒omolu wau lodelo mola ode yitaato hui̒du. 4Tobotu boito Eeya loludeo̒ Mopuulo Palenta tutuuwauwa debo odelo ubohulio, deu̒yito-yito papaa-lentawalo uilohi-Lio ode limongoli, tou̒ Tio helo tahuda mai lonto huungo tulu todulahee timongoli hia̒mbua to bungo lohui̒du. Lapatao̒ uito Eeya longohi mai botulei boito ode laatia 5wau watia luli lotuhutaa mola lonto hui̒du. Lapatao̒ lotuuu̒de wolo palenta lo Eeya, botu duluo boito pilopo tuwotao̒ lo watia ode delomo bulua u mapilohutu mao̒ lowatia – wau tumulalo mao̒ tou̒ boito tunggula botia botulei dulopita boito donggo woluo mota teto.”
(6Lapatao̒ taulo Isirai̒lu lomonggato lonto aa̒a-liyaalo taulo Yaakan, wau lonao̒ ode Mosera. Mota teto tei Haruna yilate wau yilobungio. Tei Eleajar walai̒o lobuulota wolio odelo iimamu. 7Mota teto timongolio lonao̒ mota ode Gudgod, lapatao̒ lopotolonga mola lononao̒ ode Yotbata, madala udadaata taluhio. 8Tohui̒dee boito Eeya lopo-tolomodu mao̒ suku Lewi u mongulusi Bulua Daantia wau momaya to Eeya, wau lolapali mao̒ balakati to tanggu-Lio. Ui-uitolo tuugasi limongolio tunggula botia. 9Masababu uito suku Lewi diila lololimo huta pusaka debo odelo suku wewo, sababu Eeyaalo tayadu waliisani limongolio, debo odelo u tilahuda mai lo Eeya Allahu Taa̒ala limongoli ode limongolio.)
10“Wopato pulu hui wau dulahu watia bilu-biluloa̒ toitaato hui̒du debo odelo u pilohutu lowatia bohulio. Pee̒entapo Eeya lodungohei olaatia, wau Tio akolo u diila mopobinasa mai olimongoli. 11Lapatao̒ Tio lopoa̒hu olaatia u modelo olimongoli alihu timongoli mowali motolo miliki huta u pilodanti-Lio odeli nenemoya limongoli.”
Hihiile wolo moo̒ohuu̒ lo Eeya
12“Botia, Mongo wutato, poo̒tuotalo wolo upilohile wolo moo̒ohuu̒ lo Eeya Allahu Taa̒ala limongoli monto olimongoli: Hulumatia mao̒ Eeya Allahu Taa̒ala limongoli wau pohutuwalo ngoa̒amila palentaa-Lio. Tolia̒ngilo Tio wau potabiyalo to Olio wolo lealeaatu lo jiwa wau batangamu. 13Dungohilo totoonulalo palenta lo Eeya u todulahee botie potunggulai lowatia ode limongoli domi opopiohu limongoli lohihilao. 14Eeya Allahu Taa̒ala limongoli motolo miliki hulungo ulaba-labaalo molanggato; dunia olo milikii-Lio wolo totoonulalo uwoluo toitaatio. 15Bo ponu lo Eeya ode loluuhuru limongoli odito udaa̒alio, tilinggula monto totoonulalo bangusa timongoliilo tatilulao-Tio, wau tunggula botia olo timongoli umati-Lio tatilulaoto. 16Oditolio tumulalo mai botia timongoli musi modungohe to Eeya wau diilalo potibaa̒ngi poli. 17Eeya Allahu Taa̒ala limongoli woluo toitaato totoonulalo ila wau mongilabotao̒ totoonulalo kawasa. Tio Allahu Taa̒ala tau̒daa̒ wau okawasa umusi dungoheelo. Tio diila mohuto motiwambao̒ wau diila mohuto olo mololimo soloi̒. 18Tio mopoduulua haku lo tadidu otiilo otiyamo wau janda alihu timongolio pohutuwola wolo aadili; Tio momonu tau deli tatumu-tumulo wolo bangusanto wau mongohi mai ua̒alo wau pakeyangi ode limongolio. 19Yi timongoli olo musi mopo biloheo̒ tolia̒ngi mongoli ode tau-tauwalo deli boito, sababu muloololio mai timongoli olo tau deli to Masiri. 20Hulumatiaalo Eeya Allahu Taa̒ala limongoli wau poi̒baadatilo to Olio wamabo̒. Mamusi timongoli tatapu wau molotolo hilao to Olio wau motadia domi tanggu-Lio wambao̒. 21Pujiaalo mola Tio sababu Tio Allahu Taa̒ala limongoli. Wolo mato limongoli lohihilao timongoli maloo̒onto huhuu-hutuwaalo upolu-polutuo̒ wau u moo̒tihela u pilohutu-Lio ode limongoli. 22Tou̒ tinenemoya limongoli lonao̒ ode Masiri, jumulaa limongolio bo pitu lopulu lota. Bo Eeya Allahu Taa̒ala limongoli malohutu mai jumulaa limongoli debo odelo daatalio lo popoo-liyamaalo to hulungo.”
Currently Selected:
TINGULI 10: LAIGOR
Highlight
Copy
Compare
Share
Want to have your highlights saved across all your devices? Sign up or sign in
