Markus 14
14
O Yahudika manga roriri imatekefakati o Yesus witooma
(Matius 26:1-5, Lukas 22:1-2, Yohanes 11:45-53)
1Midirika de o Paskah ma Wange ma Rarame imasidiado komagena lo o Roti ma Ragi Ihihiwa ma Rarame gena isitodaaka. O imamka ma bi sahe de o bi guru agama manga edekati ma ngeko gena isipongoka, ma ngale o Yesus witago de witooma. 2Duma ona magena itemo, “Upa lo paaka ma orasi o rarame ma rabaka, sababu done o gangamo posigoko.”
O Yesus de o gososo dabobou
(Matius 26:6-13, Yohanes 12:1-8)
3Ma moiku o Yesus woodo o Betania ma dokuka, kagena o Simon awi tahuka, una magena idodoma wipapado. Kagena asa o ngopedeka moi mahino o Yesusno, de o gososo dabobou de ihahali o rube moi o teto ihahalino maaho, o gososo magena yaaka o bi ngutu dabobouno. Gila-gila o rube ma tolo magena mapolote so o gososo dabobou gena moguse Awi saheku de mowisidahu. 4-5Magegena de o nyawa yamuruo naga kagenadahu asa yatoosa so itemo moi de moika, “Ce! O gososo dabobou magena dapoosa!” O nyawa ona magena mingamo, “Kiaso nofuma komagena!” De itemo kali moi de moika, “Ce! Dadoohaso muna mapoosa. We, ma ngale ka maumo! Nakoso o gososo dabobou magena posiija, de ma ija pahali-haliku la ma pipi de asa o nyawa isususaka pahike.”
6Duma Una wotemo, “He! Nimidohaka. Muna maakaka o manara daloloha-loha moi Ngohika. Duma ngini ka nimisisusa. Boloka! 7O bi nyawa isususa, o wange isigeto-geto nako niadupa de ngini aku niariwo isususa ona magena, sababu ona salalu kanaga igoge to ngini nia sidongirabaka. Duma Ngohi de ngini asa pomakangaho iteka kawa. 8O manara ilalamo moi o ngopedeka muna magena aku maaka, o gososo dabobou magena mosidahu Ai saheku, so muna asa Ai rohe mosidailako dabolo ma ngale Ngohi done bilasu tosone de ipoosu. 9Ngini tinisingangasu igogou, o ngopedeka ami manara manena lo done asa ka yapetoka maro o sosininga moi munaka, kekiaka bato o Gikimoi Awi habari daloloha asa isihabari o dunia manena ma rabaka.”
O Yudas wosimote o Yesus wisiija
(Matius 26:14-16, Lukas 22:3-6)
10La o Yudas Iskariot o muri moi, o Yesus Awi muri yamogiowo de sinoto manga dongirabano, awi edekati datorou. So wotagi o imam ma bi saheka la wasibicara ma ngale o Yesus iwisiija. 11So ona magena manga sininga imore de danali de witolabutu, de wisijaji asa o pipi wihike unaka. So de kagena de una wosolano o ngeko wosisari la o Yesus wisiija.
O Yesus de Awi muri-muri o Paskah ma ino yaodo
(Matius 26:17-25, Lukas 22:7-14,21-23, Yohanes 13:21-30)
12O wange ma nonomaka o Roti ma Ragi Ihihiwa ma Rarameka, orasi magena o Paskah ma duba-duba ma goho yatola. O Yesus Awi muri-muri yosano Unaka, “Baba, kiaka mitagi la ngomi misidailako to ngone nanga Paskah ma ino.”
13So Una wosulo o muri yasinotoka, “Nitagi kadoka o dokuka done o nyawa moi niwimake o rube de ma akeka waaho. Una magena niwimote, 14o tahu kiaka wowosa de nitemo o tahu ma duhutu magenaka, ‘Baba Guru wosano, o ngihi kiaka Una de Awi muri-muri asa iodo o Paskah ma ino.’ 15So o nyawa una magena asa wasidumu kadaku ma dokuka o ngihi moi ilalamo. Nako ma ngihi magena isidiahi de isidailako daboloka, ma meja de ma bako lo isifatoka. Kagena o ino nisidailako ma ngale ngone inangodu.”
16Kagena de Awi muri yasinoto yotagi o dokuka, de kadoka ona yamake maro o kia Una wotetemo. So ona asa isidailako o Paskah ma ino magena.
17La daputuku Una de Awi muri yamogiowo de sinoto yahino. 18So kagena ona imatamiye iodo, de Una wotemo onaka, “Ngini tinisingangasu igogou, o orasi manena o nyawa moi to ngini nia sidongirabano, Ai dateka de woodo dede Ngohi, done asa Ngohi woisiija.”
19O demo magena yoise, so Awi muri-muri manga sininga isusa so ona moi-moi imasano Unaka, “Baba, ngaroko lo ngohiwa o kia notetemo gena!”
20So kagena de Una wosango, “Una magenena nimogiowo de sinoto nia sidongirabano, naguuna awi roti o lelengaku asa wotono dede Ngohi, una magenena asa Ngohi woisiija. 21Igogou, Ngohi o Nyawa ma Duhutu manena asa tosone maro o kia isilelefo o Gikimoi Awi Jaji ma Buku ma rabaka. Duma naguuna woisiiija Ngohi o Nyawa ma Duhutu manena, kodo, o nyawa una magena awi bodito datubuso! Lebelaha o nyawa una magena upa lo wisibuo.”
O Jou Awi odo datetebi
(Matius 26:26-30, Lukas 22:15-20, 1 Korintus 11:23-25)
22De ma orasi ona imatamiye yoodo, o Yesus o roti wadehe so Awi sukuru watide o Gikimoiye. Dabolo de o roti magena watepi-tepi de to Una Awi gia, de gila-gila Awi muri-murika wasitoku de wotemo, “Niadehe. Manena to Ngohi Ai rohe.”
23Kagena de Una o anggur ma udo-udo wadehe de Awi sukuru idola o Gikimoiye. De o udo-udo magena wahike Awi muri-murika, de ona magena moi-moi o anggur magena yaudo. 24Yaudo dabolo de Una wotemo, “Manena to Ngohi Ai au, inisinako igogou o Gikimoi Awi jaji la Ai au ikokopola manena ma meta o nyawa yadadalaka ma ngale o dorou ma apongu. 25Duma o orasi manena ngini tinisingangasu igogou, Ngohi done o anggur manena taudo kawa, sidago ma orasi imasidiadoka o Gikimoi wodadi o kolano o dunia damomuane ma rabaka, de asa Ngohi o anggur damomuane taudo kali.”
26Dabolo de ona yangodu yonyanyi wigiliri o Gikimoika. So dabolo de ona isupu de itagi o Zaitun ma Talaka.
O Yesus wosingangasu o Petrus asa womanosu Unaka
(Matius 26:31-35, Lukas 22:31-34, Yohanes 13:36-38)
27Kagena yahika de o Yesus wotemo Awi muri-murika, “Ngini ningodu manena done niloda so Ngohi nidongosaka, sababu kanaga o Gikimoi Awi Jaji ma Buku ma rabaka asa isilefoka wotemo,
‘Ngohi asa ma sowohi towitooma
so ma duba iloda imakokitingaka.’ 28Duma ma orasi Ngohi manena tooho kali isosone manga sidongirabano, de Ngohi asa totagi todoma o Galilea ma tonaka.”
29De o Petrus wotemo, “Hiwa, Baba! Ngaroko ai dodiao ona Ngona nidolodaka, duma ma bati tosone ngohi tonidongosawa, Baba.”
30So kagena de o Yesus wotemo o Petruska, “Ngona tonisingangasu igogou, o putu manena o toko isore ma sinoto waasi gena, ngona he ma para ma saange nomanosu notemo Ngohi noinakowa.”
31O Petrus wosango de wotemo, “Hiwa, Baba! Ngaroko ngohi tosone dede Ngona, duma igogou ngohi tomanosuwa.” De Awi muri-muri ma binuka lo manga demo komagena.
O Yesus wosumbayang o Getsemanika
(Matius 26:36-46, Lukas 22:39-46)
32Ona imasidiado o doro moika ma ronga Getsemani, de o Yesus wotemo Awi muri-murika, “Kanena nigogeku la totagi tosumbayang.”
33De Una wasigaro ona yaruwange o Petrus, o Yakobus, de o Yohanes so ona itagi dede Una. O orasi magena de wamalo Awi raba itonga. 34Kagena de Una wotemo onaka, “Ai sininga ma sangisara datubuso, tamalo gena maro he tosone. Ngini kanena nigogoge la nimajaga.”
35La Una womatinga sutu ikuruka, de o tonaku wobukuku de wosumbayang. Awi gogolo ma rabaka tanu witide la iwisitilaku o sone ma ngeko manena. 36De wotemo, “Ya Baba, dangodu aku naaka de idadi, so tanu natide la noisitilaku o sangisara ma ngeko manena. Duma upa namote to Ngohi Ai sininga ma dupa manena, la tanu idadi de imaaka ka to Ngona Ani sininga ma dupa.”
37Dabolo de Una wokahino de wamake ona yaruwange yakioloka. De Una wotemo, “Petrus, o kiaso nikioloka, orasi moi bato de nomajaga naakuwa.” 38De Una wotemo onaka, “Nimajaga de nisumbayang la upa o babajaku nitura. Ngaroko nia siningaka igogou imode, duma nia rohe damomodoka.”
39Ma moili Una wotagi wosumbayang de Awi demo ka imatero de ma nonoma. 40Dabolo de Una wokahino Awi muri-murino, de wamake ona yakiolo kali, sababu ona ikakadu poli. So ona isimakewa itemo o kia Unaka.
41So kagena de Una wakahino kali ma para ma saangeka, de wotemo onaka, “He! So ngini nimasiwomasi de nikiolosi? Boloka! Ma orasi imasidiadoka, Ngohi o Nyawa ma Duhutu manena isidoa o nyawa ma dorou manga gia ma sohaka. 42Nimomi! Niakelelo, o nyawa Ngohi woisiiija una womasidiadoka. Hino la potagi pomakamake!”
O Yesus iwitago de Awi muri-muri yoloda
(Matius 26:47-56, Lukas 22:47-53, Yohanes 18:3-12)
43Ma orasi o Yesus wobobicarasi, de o Yudas, o Yesus Awi muri moi yamogiowo de sinoto manga dongirabano, womasidiado. Una magena wahino de o nyawa yadadala manga giaka o sumarangi de o gogipongo ilalamo. Ona magena o imamka ma bi sahe, de o bi guru agama, de lo o Yahudika ma roriri gena to ona manga nyawa yasusulo. 44Ma nonomasi una gena o nonako moi wahikeka, wotemo komanena, “O nyawa naguuna ngohi towihahame gena, Una magena dabolo. Una niwitago de niwingaho, de lo niwijaga nisidodiahi.”
45Ma orasi o Yudas womasidiado, gila-gila o Yesuska wotagi de wotemo, “Baba Guru!” De gila-gila wikololo de wihame. 46So kagena de o nyawa yadadala, de o Yudas imakokangaho magena, o Yesus iwitago de wipiliku. 47Duma o nyawa moi kagena manga sidongirabano awi sumarangi walia de wisioto ma Imam Wilalamo awi gilalo moika, so awi ngau lo waturaka. 48De o Yesus wotemo onaka, “Dadoohaso ngini niaka maro Ngohi o nyawa ma dorou, sidago niahino o gogipongo de o sumarangi nigaho la Ngohi nitago. 49O wange isigeto-geto Ngohi todoto o Gikimoi Awi Tahuka de to ngini nia simaka, de dadoohaso Ngohi nitagowa. Duma igogou bilasu komagena, sidago idadi de imaaka maro o kia isilelefo o Gikimoi Awi Jaji ma Buku ma rabaka.”
50Kagena de Awi muri-muri yamodo so yoloda de Una widongosaka. 51Cawali kanaga o gohiduuru moi o Yesus wimomote de o baro womasikolorono. So una lo o nyawa yadadala yodupa witago, 52duma to una awi baro waumo de woloda awi rohe ka imawatoka.
O Yesus o Mahkamah Agama manga simaka
(Matius 26:57-68, Lukas 22:54-55,63-71, Yohanes 18:13-14,19-24)
53O Yesus iwingaho ma Imam Wilalamo awi tahuka. Kagena de o imamka ma bi sahe, de o Yahudika manga roriri, de lo o bi guru agama yangodu imatolomu. 54O Petrus manga duduno wototuuru o Yesus iwimote sidago wowosa ma Imam Wilalamo awi tahu ma lolohaka. Kadoke una wogogeku, de wialo so womarahu womasicapuka de o bi jojaga.
55Kagena ma Imam Wilalamo awi tahuka, o imamka ma bi sahe de o Mahkamah Agama yangodu o Yesus iwitailako de isisari ma ngeko la wisisala, sidago Una bilasu wisosone. Duma o sala moi lo yamakewa. 56O saksi yadala yahino yodedemo to ona manga gulai de manga damato, so moi-moi manga bicara imaketerowa.
57De o saksi yamuruo naga imaoko de isibicara to ona manga damato ma ngale Unaka, 58komanena yotemo, “Ngomi miiseka o nyawa Una magena wotemo, ‘Ngohi done o Gikimoi Awi Tahu manena de o nyawa manga gia isiaaka asa taruba de tabiau, de o wange saangeka Ngohi asa tosigoko kali damomuane, duma o nyawa manga gia isiaakawa.’ ” 59Duma o nyawa isasaksi magena manga demo moi-moi imaketerowa.
60So ma Imam Wilalamo manga simaka womaokoye de Unaka wisano, “To ona manga demo de manga sosano ma dala komagena Ngonaka, dadoohaso nasangowa.”
61Duma Una womarihika bato, dangodu wabisangowa. La ma Imam Wilalamo wisano kali Unaka, “Igogou, Ngona o Salamati ma Kolano de o Gikimoi Wilalamo ma Ngopa?”
62Kagena de Una wosango wotemo, “Igogou, Ngohi manena Una. De ngini asa nikelelo Ngohi o Nyawa ma Duhutu tomatamiye o Gikimoi Wokokuasa Awi girinaka, de lo asa nikelelo o sorogaka de tokahino touti o lobi-lobi ma rabaku.”
63-64So magena yoise, de ma Imam Wilalamo awi juba waraca de wotemo, “Ce! Ngini ningodu niise masirete, Awi demo-demo dangodu o Gikimoi wisikudahu! Upa he o saksi posari kali. Orasi manena o kia niodupa la ngone paaka Unaka.”
De yangodu itemo, “O Yesus de wisala!” De imatoore, “Bilasu Una wisosone!”
65Gila-gila ona yamuruo naga Una wihobi, de Awi lako yapoku de wingapo, de yotemo, “Hika nomisingangasu naguuna woningapo!” De o bi jojaga imasimote Una wipopoka.
O Petrus womanosu una o Yesus wimomote
(Matius 26:69-75, Lukas 22:56-62, Yohanes 18:15-18,25-27)
66Ma orasi magena de o Petrus ka o loloha kasi, de o ngopedeka moi moleleleani ma Imam Wilalamoka mahino kagena. 67De mowikelelo o Petrus o uku ma dateka womarahu. Muna mowikelelo de mowisibilatu awi jamani, de motemo, “He! Ngona manena lo igogou o Yesus, o Nazaret ma nyawa gena, nowimomote.”
68Duma una womanosu de wotemo moleleleanika, “Ngohi tanakowa de tasahewa o kia ngona notetemo gena!” Gila-gila una wotagi o loloha ma ngora ma dateka.
69Kagena de muna una mowikelelo de mosingangasu o bi nyawa kagenadahu motemoli, “Cedeke! O nyawa una magena lo to ona manga sidongirabano.” 70Duma una womanosu kali.
Itekawa, de o orasi magena o bi nyawa kagena itemo o unaka, “We! Ngona upa nomanosu! Igogou, ngona manena to ona manga dodiao moi, sababu ngona o Galilea ma nyawa.”
71Kagena de una gila-gila wosasi wotemo, “Ngaroko tosone, duma igogou ngohi towinakowa o nyawa Una magena maro o kia ngini nitetemo gena!”
72O orasi magena dabolo o toko isore kali ma para ma sinotoka. De o Petrus gena womasininga igogou ma nonomasi o Yesus asa wisitemo unaka, “O toko isore ma sinoto waasi, de ngona he nomanosu nosipara ma saange.” La una woari wosodu-sodu.
Currently Selected:
Markus 14: LAIGBI
Highlight
Copy
Compare
Share
Want to have your highlights saved across all your devices? Sign up or sign in
