Oroma 16
16
Keyage wappiyareegerak wone
1Nit niniri kwe Pebe nogo nen Ala apuri kuwak eeppunuk tamban eeko menggam o Kenggereya time mondok iya negen yeenggwaarage menggerak me, kinom logobagip nduk, nappi wagi ti o. 2At kwe ti nen aakumi ambik yeenggwaarage logonet, an togon yeenggwaanege nagaarak me, at nen, “Yogop eeppaniyak o,” ari kenok, yeenggwaagwi, ndi, it Ala apuri alik leenak nen inoreewi abet mbakwi nogo keyage warogo wogonako mengga kwak, “Kwe ti ninowe abet mbareegerak me, nit mendek aret o,” yinuk, waganggwi, eeko logonip o.
3 #
Nap. 18:2
“At Akwila akweeluk Piritikila imbirak an ninom ndak-ndak Keritut Yetut ake eeko nogoorak nogo keyage wappiigi o. 4It nen, At ninom ninookwi iyo, mbaka'lek logonet, nagap ndareegwaarak me, Wa, yinuk, keyage wappiigi o. An nalik nen mban yorage lek o. Ata, it endekem konenggulik mendek Ala apuri kuwak eerit nogo menggaarak nogo abok aret an ninom nen, Wa, yinuk, keyage wappiigo ogoorik o.
5Ndi, it Ala apuri iname lombok kuwak eerit nogo menggaarak nogo inom keyage wappiigi o.
O Atiya yi awi ndi awi time Keritut wone awo abet mbaka'lek iigak, aa'nduk abet mbareegerak nore niniki kunik Epenetut nogo keyage wappigi.
6Aaninggin kagak kit kinake nggwiirit-nggwaarit eeke nagaarak kwe Mariya kunduk, keyage wappigi.
7It Andoronikut Yuniyat imbirak an awo Keritut abet mbaka'lek neegak, it aa'nduk abet mbakwi, it nappiigak inenggela'me inoweewi tiyanak aret wonogwe, ndi, it an ninom keele maarogo mambinaneegwaarak wonogwe, eereegurak paga, it an noreewi lombok aret me, keyage wappiigi o.
8Ninowe nimbirak kunik logonet, niniki kunik eeke at Ambiliyatut nogo, keyage wappigi.
9Keritut ninom kunik logonet, ake eeko monggoorak at Urabanu inom, niniki kunik at Itakit inom, imbirak keyage wappiigi o.
10Keritut iniki kunik logonet, liirogon eerit nage kage nagarak at Apelet nogo keyage wappege, at Aritobulut apurilogwe inom keyage wappiige, eeki o.
11An mendek at Keroriyon nogo keyage wappege, ndi, it ninowe wone waganeegwaarak at Narakitut apurilogwe inom keyage wappiige, eeki o.
12It kumi Teripena Teripota imbirak ninowe inom kunik logonet, ake eerit nogo menggaarak nogo inom, niriluk Peritit kunduk ninowe imbirak kunik logonet, ake nggwiirit-nggwaarit eeke menggerak nogo inom, keyage wappiigi o.
13 #
Mrk. 15:21
Ninowe imbirak kunik kenok, Ala nen leenogo pereegerak at Uruput inom, ndi, an nagalo negen menggerak at Uruput agalo nogo inom, imbirak keyage wappiigi o.
14At Atinikiritut togon, Pelegon togon, Keremet togon, Patorobat togon, Keramat togon, it inoreewi inom wonogwe Ala apuri nogo inom abok aret keyage wappiigi o.
15It Pilologut togon, Yuliya togon, Nereyut togon, at awuluk kolaga Olimbat togon, ndi, it Ala apuri alik leenak inom menggaarak nogo abok aret inom keyage wappiigi o,” yinuk, yegerak, yoraanip o.
16Kit nen keyage wat-wat eeko logonet, “Ala apuri o,” yinuk, linggik-kambuk yogo logonip o. Ndi, it Keritut wone waganeegwaarak paga kuwak eeko menggaarak yime nogo nen abok aret keyage wappinagaga o.
Irip paga inaruk wareegerak wone
17Noreewi o. Kit wone waganeegutak nogo it aakumi nen woorak ineebi nen mbo punuk, aakumi iniki ogoorogo piinet nugwi, it aakumi abet mbareegwaarak nogo iniki abut laganogo piinet nugwi, eeginabit nugwi iyo, kinigen liippiigo logobagip nduk, an, “Ao,” mbake logonet, yokkirage agarik o. It aap ti, kinom lambungga'lek mondok ogoorak aret logonip o. 18It aap togop eerit nugu menggaarak mendek nogo ti, ninowe Keritut ayeloman logonet, ake eerit nugwi lek o. Ata, inaanogum ake mban kwaarit nogo logonet, “Yogop eeruwok, ndogop eeruwok,” yinuk, inoone yanggorogon amburu ndik-ndik paga pilit pugunogo it aap iniki ugun mendek nogo inambokan laganit nogo menggaarak me, kinom ogoorak aret logonip o. 19Kit obeelom wone woppunuk, mondok ndak-ndak eerit nogwe nogo it aakumi abok nen konenggaarak me, kit eekwi ti paga niniki ale'nggen ambik ee'nake kwe, “It iniki warak a'nuk, maluk eeriyak wone nogo kobak eerogo punuk, obeelom eeriyak wone kenok mban eerit nogo logowak,” kinomba'nuk, yokkirage agarik o.
20Nit niniki ugun tayenak obeelom logowok nduk, eeppinanege menggerak Ala nogo nen Ibilit kinabu'me tebenak logowak nduk, mbet-mbet aan lebenogo pigin o.
Ninowe Yetut iniki kunik nen obeelom eeppinanege menggerak me, kinarum aret logogin o.
21 #
Nap. 16:1
At nimbirak Ala eyabu eeko monggoorak Timotiyut nogo nen keyage wakkinake, ndi, an noreewi mendek Lukiyut inom, Yaton inom, Totipatet inom, it kunduk keyage wappinagaga o.
22At Pawulut nen, “Yogop mbanu o,” yo'nege kagak, liiru yi mbanggirage an Teritiyut nogo nen, ninowe nimbirak niniki kunik logonet, keyage wappinagagi o.
23 #
Nap. 19:29, 1Kor. 1:14, 2Tim. 4:20 An ka wagarak nimbirak wonage aap Nggayut nogo inom, it Ala apuri at ame inom kuwak eeko menggaarak inom, abok nen aret keyage wappinagaga o. It aakumi o kota yime menggaarak inake wu kuwak aago porogo menggerak aap Eratut ninore Kuwarutut imbirak nen keyage wakkinaka o.
(24Ninowe Yetut Keritut iniki kunik logonet, obeelom eeppinanege menggerak nen kinarum aret logogin o. Amin.)
Ala wogoppege logonet, irip paga tamban eereegerak wone
25Wone aakumi ineenggo'lek kiraarak kagak, aakumi nda'narit wundi wogo nogogwaarak kin agagerak wone nogo ndak-ndak, Yetut Keritut eereegerak wone yokkirage, wone obeelom wone yokkirage, eereegirak nogo waganggwi kiinok, kiniki nu'lek agago pinagarak Ala nogo alut eeko logonip o. 26Maan wone kiraarak wonagagerak kwe, yogondak at eenik itok menggerak Ala nogo nen yorage kagak, yoraga nen liiru mbanggo nogogwaarak paga, yi aakumi ndi aakumi abok aret iniki abet mba'nuk waganggo logomenggaarik, liirogon eerit nogo logowak nduk, pagak yereegerak me, yokkirage agarik o.
27At Yetut Keritut eereegerak paga at alik iniki warak lombok menggerak Ala nogo endage mondok-mondok tiyanak aret logowak o. Amin.
