Nappiigak 16
16
Timotiyut nogo Pawulut Tilat inom nogogwaarak wone
1Yoranet nege logonet, o Nderebe unggwi nage, ti'nuk, o Litera unggwi nage, eereegerak. O Litera time aap ambi Yetut oone waganeegerak endage Timotiyut wonagagerak me, at agalo ti, Yakuri mendek kwe, abet mbareegerak, ndi, ogoba ti perak, Yunani mendek aret o. 2It ninoreewi Ala apuri o Litera wonogwe inom, o Ikoniyum wonogwe inom, nen Timotiyut aap obeelom wonage kogo nogogwaarak me, 3at Pawulut nen, “Timotiyut nimbirak nege logokit o,” mbake nagagerik, it Yakuri o time menggaarak abok aret Timotiyut ogoba ti, aap Yunani mendek ineenu me, Pawulut nen agabolo mbanuwak nduk yoragagerak.
4It Pawulut Timotiyut imbirak yi awi ndi awi o kota lombok nugu logonet, it nappiigak inom, o Yerutalem Ala apuri unde inom, nen wone kooneegwaarak nogo, it liippunuk eeko logowak nduk yoranet nugu nogogwaarak. 5Togop yoranet nugu nogogwaarak paga, it Ala apuri time kuwak eerit nogo menggaarak nogo iniki nu'lek age mbareegi, ko'lu-kii'me ambi nabennagak, ambi nabennagak, eeko logonet, Ala apuri ambik aret ogogwaarak.
O Torowat nen Pawulut abinggaanggo kagagerak wone
6Ti'nuk, at Aberiniki nen, “O Atiya time Ala wone yora nagup o,” yorage mbareegi, at Pawulut oreewi inom nogwe nogo, o Pirigiya nen o Nggalatiya nogo nogogwaarik, 7o Mitiya unggwi noorak kuli pugu paga panggo yi nogo nogogwaarik, o Mbitiniya ungguwok nduk eereegwaarak mendek, at Yetut Aberiniki nen, “Unggwi noorak,” yoroolik me, 8o Mitiya kagak nok-nok, o Torowat unggwi nogogwaarak. 9O Torowat unggwi nogo nogogwaarik, time nogo yogo logonet, at Pawulut abinggaanggo paga aap Makendoniya mendek ambi mi'ndak logonet, “Wulaga wae. Nit yeenggwaaniranok nduk, o Makendoniya yime wunda mok o,” yinuk, oone nabek togon yoge kagagerak. 10Kage nagagerik, “At Ala nen nit obeelom wone aap Makendoniya mendek yora nawak nduk, ninayonggo pegerak kogo o,” yinuk, mbet-mbet wunda nawok nduk eereegurak.
O Pilipi kwe Liriya abet mbareegerak wone
11O Torowat nen yiiro paga unggwogo nogogurik, nok-nok aret o Tamotarake wunda nogo nogogurik, ko'lu nen, o Neyapolit wunda nogogurak. 12#Pil. 1:1, 1Tet. 2:2 Wunda nogo nogogurik, o Makendoniya kota aa'nduk wureegwam Pilipi it aap Oroma mendek nen inabu'me piirogo wonogwam nogome, unggwi nogo nogogurik, time logonet, nogo mande negen yereegurak.
13Nogo mande negen yippunuk, it Yakuri tamban eekwi paga o kota nen wundi nogo nogogurik, “Yi aa'nggi paga tamban eeko menggam time wonage,” mba'nuk, nogo nogogurik, it kumi kuwak aago wonogome ninom kwi'nogo nogogurik, wone yorogogurak. 14Yorogogurak koneneegwaarak nogo, kwe o kota Tiyatira mendek ambi mbogoyum maa'ngga kunik kigirikwe lombok kungge menggerak endage Liriya nogo nen Ala alut eeke menggerak me, at Pawulut yoragagerak wone nogo waawak nduk nogoba nen iniki tu paarogo pereegerak. 15Iniki tu paarogo pereegerak paga wone wagangge mbareegi, kwe nogo at ame menggaarak inom yiime wuppiyareegerak. Yiime wuppiige mbareegi, at kwe nogo nen, “Kit nen, Kwe yi, ninogoba Yetut abet mbakerak o, nombakotak kenok, an name ninom logowok nduk woraanip o,” yinuk, nabenak mban yo'nirage mbareegi, “E o,” yinuk, ame aret unggwi nogogurak.
O Pilipi nen keele maarogo mambiyareegwaarak wone
16 #
Unde 19:31, Pel. 18:11, 1Tam. 28:3 Ne ambi paga tamban eeko menggam nawok nduk nogwe me, kolaga aap inayeloman ambi kugi inikime unggwagagerak nogo, tili pagangge paga wu nuurogo ogobamini wogorage menggerak me, tu paga ninom lambumbunuk, nogwe niigak, 17at kolaga nogo nen, “At Tiyanak Lombok Menggerak Ala ayeloman kinagap ndariyak wone yokkira wogwe yi, iyaanip o,” yinuk, kwa kunik agan Pawulut ninom ninambokan mu'neren wagagerak. 18Togop mban ari kagak, nogo apit yege mbareegi, ne ambi paga at Pawulut eebi mba'nuk, ena nomorogon kolaga nogo pekkage nagagerik, kugi nogo yoge logonet, “Yetut Keritut endage paga kolaga yi, inikime nen wundi nanok nduk, yokkigi o,” awo yoge kagak, kugi nogo nggigik togon wundeegerak.
19 #
Yak. 2:6
Wungge mbareegi, kolaga nogo ogobamini nen, “Wu nuurogo wo'nirage logorak niniki lunik monggoorak nogo lek aga o,” mbako nogogwaarik, at Pawulut Tilat imbirak pippiinok, niigeren, mbi-mbiingga kunggo logonet ambi age kenok wone mbanggo menggam nogome inoweewi inowagam piya nogogwaarak. 20-21#Etet 3:8 It inoweewi o kota unde nogo inowagam piya nogo nogogwaarik, yorogo logonet, “Nit aap Oroma mendek nen eeko logorak mage yugu kagak, aap Yakuri yi, it eeko menggaarak mamunnirogo logonet, nit niname o kota yime naalop-kaalop eerogo pugwi iigo o,” yinuk, 22#2Kor. 11:25 yorogo nogogwaarik, aap apit aago pilak yogo logonet, inooruwok nduk eeko mbareegwa, inoweewi o kota unde nogo nen, “Inambogoyum nibinogo nappunuk, yawi inoo'nip o,” yorogo mbareegwa, 23yawi nggwi eerogo inooppunuk, niigogo o keele maarogo mambiigo menggam mbo mambiigo nogogwaarik, aap inarum waka nogo, “Inarum mondok liirogon logot o,” yinuk, aruk wareegwaarak. 24#Yer. 20:2; 29:26 Aruk wareegwaarak nogo konembunuk, o ko ogoorak oolo aken time mbo mambiige nagagerik, iniyok eyo paga mbet tebenogo piyareegerak.
25Mbet tebenogo piyareegerak time wonogogwaarak kwe, oonikiya nogo iniki paga it ando keele maarak nogo konenggwi iigak, it Pawulut Tilat imbirak tamban eekwi, Ala alut eeko logonet ndawi yogwe, eekwi me, 26abera'lek me mi nggwok nuk ari logonet, o wurik keele maarogo mambiigo menggam nogome o eyak panggonak abok nuk ari, tu paa'nage, mbuti keele maarak nogo piyo-piyo nage, eereegerak. 27Eeke mbareegi, at aap keele maarak inarum waka nogo nen eenik a'nuk, keele maarogo mambiigo menggam tungga paa'narit nagagerak enegen kage nagagerik, “It keele maarak abu mbaganggaarak kagi,” mba'nuk, paloowi nggigik togon agago wakkolaakit nduk eeke me, 28at Pawulut nen, “Wulaga. Wakkolaagun o. Nit abok aret wonogo ogoorik,” yinuk, oone nggwok paga yoreegerak.
29Yoge mbareegi, at keele maarak inarum waka nogo nen, “Ndi wonok wa'nip o,” yorage nagagerik, agabiti nen aganak nugirit nggarek togon Pawulut Tilat imbirak inabu'me ngginnari nagagerak. 30Ngginnari nage nagagerik, imbirak wogoren endekem wumbiige nagagerik, “Wologo wae. An nagap ndaruwak nduk, nonggop eeri o?”
31Yoge mbareegi, it nogo nen, “Lek o. Kiniki ninogoba Yetut oba panggombunuk abet mbake keenok, kat inom, kaakkapuri inom, kinagap ndarigin o,” yoreegwaarak. 32Yogo nogogwaarik, at inom, it aakumi at ame inom menggaarak inom, it abok aret Ala wone yorogogwaarak. 33Oonikiya ti eyom paga aret at keele maarak inarum waka nen it nogo wogoren nage nagagerik, inagabolo mbannarit nagagerak nogo koorinake mbareegi, at inom, at akwe-apuri inom, yiime wuppiyareegwaarak. 34Yiime wuppiigo mbareegwa, wogoren at ame unggunuk mbi wogorage nagagerik, at inom, at apuri inom, iniki Ala oba panggombunuk abet mbareegwaarak paga iniki ale'nggen ogogwaarak.
35O weege mbareegi, it o kota unde inoweewi nen, “Aap keele maarak inarum waka nen it aap mbere keele maarak nogo keele piinogo wumbiyaawak nduk, yori nanip o,” yinuk, it inawuri yigin unde nogo nappiya wogogwaarak.
36Nappiya wogogwaarak yori wogo mbareegwa, aap keele maarak mambiigo menggam arum waka nen Pawulut yoge logonet, “Ninoweewi o kota unde nogo nen Pawulut Tilat imbirak keele piinogo wumbiyet o, yinuk, yo'niri wagaarak me, wundi nogo logomonggotik, kinikiigun aret nanip o.”
37Yoragagerak kwe, at Pawulut nen it yigin unde yorage logonet, “Lek o. Nit Oroma mendek aret kwe, alom kwaaka'lek logonet, nggwok paga yawi ninooppunuk, keele maarogo mambiigo menggam mbo mambinanegaarak me, nit yogondak kote negen wumbinaniyak nduk yagaarak me, yogo ogotik ya? Lek o. It wogo logomenggaarik nen nit wumbinani woraawak o.”
38Yoragagerak nogo, it yigin unde nen it o kota unde inoweewi yora nogo mbareegwa, “Pawulut Tilat imbirak Oroma mendek aret o,” yoragagerak nogo inaruk konembogo nogogwaarik, “Nit eekoorak ia,” yinuk, inagabiti ogogwaarak. 39Inagabiti ogo nogogwaarik, it ineebe aret inowagam woraanuk, “Ai, ninoreewi! Maluk eekkinakoorak o,” yorogo nogogwaarik, wogoren, keele maarogo mambiigo menggam nen wundi nanuk, “O yime logorak lek. Nanip o,” yorogo mbareegwa, nogome nen, 40wundi nogo nogogwaarik, kwe Liriya ame nogome unggwi nogogwaarak. Unggwi nanuk, time inoreewi ando inom lambunggo nogogwaarik, iniki eyak wappiinok, nogogwaarak.
