Nappiigak 12
12
Piyak-payak eerogo inoorit nagak mban eeko nogogwaarak wone
1Ira wogo nogogwaarik nogome wonogwe me, aap endagembogut Keroret nogo nen it Ala apuri kuwak eekwi ando mondok inoorikit nduk piginabit nage logonet, 2“At Yaya owe Yakobut nogo, tege wooluwak paga wa'nip o,” yinuk, yoragagerak wako mbareegwa, kambeegerak. 3Yakobut wareegwaarak ti paga it Yakuri iniki ale'nggen mbakwi iige nagagerik, at Peterut kunduk, keele maarikit nduk mugurok nagagerak. (It Roti Piika'lek Mendek laago lakwi iigak aret eereegerak.) 4#Wund. 12:1-27 Mugurok piga nage nagagerik, keele maarogo mambiigo menggam mambunuk, laago Obaga Mbo Nagagerak larak nenok, nggwok paga awone amburu mbaniyak mbake logonet, it aap yigin unde 4 aago ineebe 4 leenak nogo mban arum logowak nduk piyareegerak.
5At Peterut nogo keele maarogo mambiigo menggam nogome arum wonogwe iigak kwe, it Ala apuri kuwak eerit nogwe nogo nen, “Abet aret wundi woraagin,” mba'nuk, at ake tamban mban eeko nogogwaarak.
Peterut piinogo wumbi wagagerak wone
6At Keroret nen ko'lu awone amburu mbaniyak nduk at Peterut oonikiya mbuti keele eenggi peenok-peenok maarak nogo yege kagak, it aap yigin unde eeben peenok-peenok wonogwe, it ando tungga ambe paga arum wonogwe, eekwi iigak, 7Ala yonggo nappiya wage menggerak malayikat ambi ko ogoorak it wonogwe me nogome, aberak lek me mi'nari unggunuk, eya abinak pindanggage nagagerik, uum paga eenggi puk-puk eeke logonet, “Peterut wae. Mbet-mbet mi'naru o,” yinuk, awo yoge kagak, eenggi mbuti keele paga maarak nogo piyok togon wambeegerak.
8Piyok togon wangge mbareegi, malayikat nogo nen at yoge logonet, “Kayum yikkolage, kiyogogut yikkolage, eeru o,” yoge mbareegi, yikkolagagerak. Yikkolage mbareegi, “Kambogoyum endekem mendek yikkolage logomenggendik, nimbirak nawok nduk omok o.”
9Yoge mbareegi, wundi nage nagagerik, imbirak nagagerak. At malayikat nogo nen abet aret eeppege kagak, Peterut iniki nen, “We nabinggaanggo kage agarik kulik?” mbakak imbirak nagagerak. 10#Nap. 5:19 Akenggwe tum wakwi iigak, wundi nogwe, endekenggwe tum wakwi iigak, wundi nogwe, eerit o kota unggwogo menggam mbuti tu narak me taa'nogo wok yi nogwe iigak, abut aret paa'nage kagak, wundi nogo nogogwaarik, tu nggwok paga ari nanuk, at malayikat nogo ta'nen aret lek agagerak.
11 #
Nda. 34:7, Ndan. 3:28; 6:22 Lek age mbareegi, at Peterut nogo iniki liippege nagagerik, “Ie!” yinuk, “It Yakuri mendek inom, Keroret nogo inom, ee'naburak mbakaarak nogo abok aret awo ee'naka'lek iigak, at Ala yonggo nappiya wage menggerak malayikat ambi nappi wage nagaarik, nagap ndakerak abet aret kagi o,” yinuk, mbareegerak.
12Mbake nagagerik, at Yaya endage ambi toonak Marakut nogo, agalo Mariya ame aakumi ambik kuwak eeppunuk, tamban eekwi wonogwe me iya wagagerak. 13Iya wage nagagerik, tu endekem nggwe narak nogo eenggi puk-puk eeke mbareegi, kolaga inayeloman endage Orore nogo, “Ta wage nagaarik, eeke?” yinuk, pekka wundeegerak. 14Pekka wungge nagagerik, “Peterut oone ari kagi,” yinuk, iniki ale'nggen nen tu paakkaga'lek, “Peterut nogo endekem wonage o,” yinuk, yora unggwagagerak.
15Yora unggwage mbareegi, it nogo nen, “Kolaga yi, kumili negen nonggop ari agandik?” yinuk, yogo mbareegwa, at kolaga nogo nen, “Lek o. Abet aret wagaarak kagarak o,” yinuk, yoragak mban eeke mbareegi, “Ti kenok, malayikat ambi at arum logowak nduk nappi wagaarak kagandak kwa?”
16Yogwe iigak, at Peterut nogo tu puk-puk nabenak mban eeke mbareegi, tu paakkogo nogogwaarik, at eebe aret kenok, “Ia!” yinuk, pi wareegwaarak. 17Pi wako mbareegwa, at nogo eenggi paga nen, “Puk logonip o,” yorage nagagerik, ogoba Ala nen keele maarogo mambiigo menggam nen wonok wundi wagaarak nogo mbininogo yoragagerak. Yorage nagagerik, “At Yakobut inom, ninoreewi ando inom, wone ti, yora nanip o,” yorage nagagerik, lambembiinok, o alik me nagagerak.
18Ko'lu o weege mbareegi, it aap yigin unde nogo nen, “Peterut nonggop aga o?” yinuk, kwaarit-mberaarit nugu mbareegwa, 19at Keroret nen, “Liirogon kwaari nanip o,” yorage mbareegi, kwaarit nogogwaarak mendek, lek kenok, we wogo mbareegwa, “Nano eekwi kiigak, wunggi o,” yinuk, yoragagerak mendek, “Abu lek kenok, wogo o,” yogo mbareegwa, Keroret nen, “Ti kenok, kit aret kinoorogo pinagawak o,” yinuk, yorage mbareegi, inooruwak nduk wogoren nogwe iigak, at Keroret o Yureya nen o Kayitareya logonuk woraakit nduk time nagagerak.
At Keroret kambeegerak wone
20 #
1End. 5:9
At Keroret nogo time wonage logonet, anini wu agan nage mbareegi, it aakumi o Tirut mendek inom, Tiron mendek inom, mberirage nagagerik, inom ogoorak wonogogwaarak me, it nogo nen Keroret inom lambunuwok nduk, kuwak ari wogo nogogwaarik, at Keroret yori ungguwak nduk, awot ambi yi eeriyak ndi eeriyak lengganinake menggerak endage Mbelatut nogo yogo logonet, “O Keroret unde menggim mbi inoba onggo kuni wogo monggoorak me, ogoorak logorak lek lambunuwok nduk, wogoorak yoru o,” yinuk, yogo mbareegwa, “E o! Yorikit o,” yoragagerak.
21“Ndi eyom paga kuwak eeruwok o,” yinuk, koonogo pereegerak nogo eyom paga at Keroret nogo mbogoyum aap inendagembogut yikkologo menggaarak mendek yikkolage nagagerik, wone amburu mbangge menggim taa'nogo kwi'nari lagangge nagagerik, wone iya lombok aret yoragagerak. 22Yorage mbareegi, it aakumi nogo nen, “We aap nen ari lek o. Agugi oone aret ari kogo o,” yinuk, inale'nggen nen keekok piyanggogogwaarak. 23Keekok piyanggogo mbareegwa, at nen Ala wogoppuulik, “An iya neenok, yaga,” yinuk, wogoppake mbareegi, Ala yonggo nappiya wage menggerak malayikat ambi abera'lek me wage nagagerik, warogo nggimbereegerak. Warogo nggimbege mbareegi, puuron nen inikime nggebenogo nunggwi iigak, kambeegerak.
24Ninogoba Ala wone nogo nggwok aret wiganinuk nage kagak, it aakumi ambik abet mba'nuk, waganggo nogogwaarak.
25Ndi, at Mbaranabat Tawulut imbirak o Yerutalem eeriyak nduk nappiya wogogwaarak nogo, abu aret eeko nogogwaarik, at Yaya endage ambi toonak Marakut nogo wonok wogogwam iniyok paga aret nogogwaarak.
