ÙRÙM 16
16
Paùlùt en it apùnì Ùrùm mene aike inebe lopok hai warinapike wene
1He ninerei Pebe atì ebe hinelurogo yakùlhisak. At oabùt hanoma re, Ala againapùrì o Kekerea mene leberisikerek mene hinoba waga atì, 2hit ninoe Etagepogot hinom hutik logolìk, Ala againapùrì nen wanusak higit hogoat, at ebe wanuageip en ìlùk yogohisìgì o. At agarok yì mene tì mene lek halok he, hit mene aike wogotì logoino o. At en he, apùnì apigat leberisìgìk, an nebe mel lebe'nììgìk, ìkì lagaikesi'mo re, hit en at ebe wanino o.
3Nen, aike re, he Perisikila agùn Akwila eperak ninom Karìsùt Yesùt hesik hagatì lagosik wagaika mene a'naga Paùlùt en hai wathinape ìlùk yogoisano o. 4It an telnabuogolùk laganem, inoa'lep atì nen,
“Netawìlak e,” ìlùk an enek hai warinapì lagì hùk. It apùnì Ala againapùrì etakwe mene mel, inebe obogat ninom enat hai warinapì lago o. 5Ala againapùrì it Perisikila Akwila eperak inaua atogorì'lùgì mene inomat,
“Paùlùt lak en hai wathinapa,” ìlùk yogoisanoat o.
Nen, aike re, ap Epenetùt netawì mene atì,
“At en hai wathape,” ìlùk yogo'noat o. O Asia a'loma re, at atì tak etaùken Karìsùt oba hìpìrethesikesi'mo nen, it aike hobuk hìpìrethesukwa. 6He Maria hit hesik seget apik hagatì lagaike a'nogo,
“At en hai wathape,” ìlùk yogo'noat o. 7At Ateronikùt, Yuniat eperak,
“At en hai wathinape,” ìlùk yogoisanoat o. It he, an ninom ninùkùl omakeat mene nineki hele ninom warek welagagusik Apùnì apigat negen Karìsùt en inayoko hìlìk laksa wagaike meneat he, inetagewerek he, irat o. It tak inetaùken Karìsùt oba hìpìrethesukwasi'mo nen, an hobuk hìpìrethesigi. 8Nen, aike re, an nagaiyak Apeliatùt neperak ninoe Etagepogot ninom hutik welago atì nen, ebe netawì o.
“At en hai wathape,” ìlùk yogo'noat o. 9At Ùrùpanùt atì ninomat Karìsùt hesik hagatì lagagu mene atì ho, Isitakìt netawì mene atì ho,
“At en hai wathinape,” ìlùk yogoisanoat o. 10At Apelet Karìsùt eperak hutik logolìk hùpùn hogo hagatenem oabùt hano palì'lùgì mene atì,
“At en hai wathape,” ìlùk yogotìk, Arisitobùlùt againapùrì atì,
“At en hai wathinape,” ìlùk yogoisìgìk, inoat o. 11At Herotion ap ninùkùl etage omakeat mene atì,
“At en hai wathape,” ìlùk yogo'noat. Nen, Narekìsùt againapùrì ninoe Etagepogot inom hutik mene atì,
“At en hai wathinape,” ìlùk yogoisanoat o. 12Nen, aike re, hìmì Teripena Teriposa eperak ninoe Etagepogot oba seget tegelì'lùgì mene,
“At en hai wathinape,” ìlùk yogoisìgìk, he Peresit hageat en ninoe Etagepogot oba seget apik tegelì'logo mene atì netawì e,
“At en hai wathape,” ìlùk yogotìk, inoat o. 13At Ùrùpùt atì ninoe Etagepogot en ayoko hesikomo hogoratarek atì. At agosa atì, an nagosa hakeat o. Eak eperagat,
“At en hai wathinape,” ìlùk yogoisanoat o. 14At Asikeretùt mel, Pelegon mel, Heremet mel, Paterobat mel, Heremat mel, ninerùgì ninagaiya'lak Ala againapùrì aike it inom welagaikarek mene obogat inomat mel,
“At en hai wathinape,” ìlùk yogoisanoat o. 15At Pilologùt, he Yulia eperak, Neriùt erei eperak, Olipat inomat, Ala againapùrì it inom welagaikarek mene obogat inomat he,
“At en hai wathinape,” ìlùk yogoisanoat o. 16Nen, aike re, hinebe Ala againapùrì welagep atì, hai hinape saluk wat-wat ìlìk lano. Ala againapùrì Karìsùt agoromì o ya ta atogorì'lùgì mene nen:
“Hai warinapo,” ìlùk yogonetama nen yogohisìgìat o.
Wene wùrep oba inasuk wasike wene
17Nerùgì nagaiya'lak. Hina'la kagalogo re, wene aike yì nane ning hogo yogohisak o. It apùnì aike hobuk wìrìk he, wene emakum yakùlhisasukwama wanhigip mene heraksìlìk he, hinebe mìkìlogo hikìgìk, hina'la weagathinapìk, iko halok he, hinepe hebelogo logolìk, inane hinasuk holhì'lek, heraksalùk kwanìrogo laga logoino. 18It atì re, ninoe Etagepogot Karìsùt awe a'ma logolìk, at hesik hagarì'lùgì hùk. We, inokawerek ina'la walok mene hagarì'lùgì o. Atì'nogo hagatì logolìk, inane hano ìgìk, lìok hogo ìgìk, ìkì logolìk he, it apùnì aike inoabùt,
“Ì o,” nek egarek mene atì lalinabì'lùgì atì. 19Mene re, hit Ala ane hologo hagatì lagep mene atì, it apùnì obogat en hinoabùt enagat palì'lùgì atì nen, an na'la hai hakìkì lagì o. Hit hano wene hesik hina'la kagalek welagìk, weak wene hesik hinepe morogo welagìk, umo re, hano. An na'la walok. 20At Ala apùnì inetaùken hapuguthikerek mene a'nogo nen, at Ibilit atì hinesok en al lebelogo heraksoagalùk hepogat hinawe a'ma hei wesigin werek o. Ninoe Etagepogot Yesùt oabùt hano a'nogo nen sethisek logouak o. 21At Timotìùt an nagaiyak neperak Ala hesik hagatì lago mene a'nogo nen:
“Hai warinapì o,” ìlùk yogonetomo nen yogohisìgì o. Ap nit mene Lùkìùt mel, Yason mel, Sosipatet mel, yoma nen:
“It hai warinapo,” ìlùk yogonetama nen yogohisìgìat o. 22An Teretìùt Paùlùt ane iko kolek helal yì wanhì mene nen, ninoe Etagepogot ninom hutik logolìk hai wathinapìat o. 23At Kayùt en an nebe wo'napìk, Ala againapùrì obogat at aua atogotì logouak en woginapìk, ike mene atì nen hai wathinapeat o. At Erasìtùt o kota yoma hesik uang hisikenem hesogo welagarek mene atì nen hai wathinapeat o. Nen, ninagaiyak Kawarìtùt en hai wathinapeat o. [24Ninoe Etagepogot Yesùt Karìsùt oabùt hano a'nogo nen, hakhisek logouak, ìlùk,
“Ebe asuak,” u hak,
“Amin,” ìgì atì.]
Wene elùgùn warogo Ala hogorasike wene
25Ala hogoratì logouok o! An nen hano wene Yesùt Karìsùt hagasike wene yogohisasigi hak, at Ala omame apik a'nogo nen hinetaùken wurigethinapì logousak elok o. Wene Ala a'la wene atì, holoat en hinago welagaike mane re, yogotak Ala nen weinamethesike. 26Atì re, it ap at ane yogoisìkì lagaukwa mene amanogo nen helal waganogo re, sele'mathesukwama were'ma an nen yogohisasigi atì. Yì ap tì ap inùkùl etage lopok obogat wene atì inasuk holìk inetauken Yesùt oba hìpìrethìlìk ane hologo hagatì logouagalùk, at Ala esok motok welagarek mene a'nogo nenat:
“Wene yì apùnì inelu asuak o,” ìlùk isike. 27At Ala aligat a'la motok kagauksek welagarek o. At Yesùt Karìsùt hagasike hesik Ala hogorato motok logouok o, ìlùk,
“Ebe asuak,” ìlùk u hak,
“Amin,” ìgì atì.
Currently Selected:
ÙRÙM 16: LAIDNI
Highlight
Copy
Compare
Share
Want to have your highlights saved across all your devices? Sign up or sign in
