Roma 9
9
Allah nen akoni Israel mende miginakike wene
1-3An nagarlagi inom nirugi inom ninunggulowak endaga omanggiat mende weyak werek eti paga, nakla weyak agik, nggorlo agik, kagarigogo,
“Allah nen, an Kristus nimbisak kunik welago mende eti nggolelogo togot daniluk, it inobalikmo nalem ʼbanilep a, ambasi lagi eti paga it woginabilep a,” yiluk Kristus nimbisak kunik dogolik yigi eti, eberogonat yigi. Nenggalat yigi dek o. Allah Agurengge nakla dogolik,
“Wene eti eberogonat,” yiluk yoknikik, nenggaerek nakla nen,
“Eberogonat kigi,” yiluk ambigik, yiligogo. 4It akoni Israel mende inebe Allah nen miginakike mende eti paga, at aʼburi asuwagaluk woginakik, at Ebe pogorarigogo mende eti irat yanggul isigik, wene warogo irat woginakik, wene ninasuk wakike wene etnogo irat wogisigik,
“An yigit diluk pogot nako dogoni o,” yiluk irat yanggul isigik,
“Yabunggane esigit diluk kagat inabigin,” yiluk abok irat yogisigik, kagakike. 5Nit ninakombalak nen, it eti endago mende. At Kristus ebe nit akoni endak larigogi kak endak lagike eti, it eti nen endakuka mende, ebe Allah mendeat o. Yi mende ndi mende taʼbokogonat, wema paga arlek mende, arat, ombo paga siyakogo dogoligogo mende eti paga, at arligat pogorako dogogun eti, ebeat asuwak, yiluk yu kak, amin yisi doguwok o.
6Allah nen it abok yogisasike eti,
“Ebe dek aga o,” yiluk yigi ʼbuk. It Israel nen endago mende eti taʼbokogonat, inebe Israel Allah nen miginakike mende ʼbuk. 7At Allah nen wene Abraham men yogokike,
“An nen at Ishak nen endago mende arlek kat kaʼburi yiluk yisi dogogin o,” (Kej. 21:12)
yiluk yogokike eti paga, Abraham nen endago mende taʼbokogonat, Allah aʼburi yiluk yusak ʼbuk. Dek o. 8Esigit diluk yisike eti ebe men yiluk yisike. It inebe nen endago mende eti, Allah aʼburi yiluk yusak ʼbuk. Allah nen abok yogisasike mende kalok, at aʼburi yusak o. 9At Allah nen Abraham abok yogokike eti yisi dogolik, men yogokike,
“An yabunggane koba wisusak ndak wisigin o. Wagonem nen, kwe Sara eyak abat endasigin o,” (Kej. 18:10)
yiluk yogokike. 10Mende, wene eti arligat ʼbuk. At kwe Ribka eyagi inombae Ishak ninakomba omanggiat eti nen, ap inebe mbere endaginakike. 11It ap inebe mbere eti, endak lagidek inobabut pano kagakik, weyak kagakik, kagakidek werek nggorlek, at Allah akla nen ambalok pulogo ʼbiyasike eti ebeat atluk dogowagaluk, 12inagoya Ribka wene men yogokike,
“Kat keyagi endaginabigin eti, alebagik endak lasigin mende eti, ebe yabunggane endak lasigin mende apma dogogin o,” (Kej. 25:23)
yiluk esigit diluk abok yogokike. Esigit diluk yogokike eti, it nen yi mende ndi mende kagakuka paga pulinakike ʼbuk. At te, at Allah akla ambalok pulinakike o. 13Wene eti kak omanggi men yisike,
“At Yakub eti ebe an nendainggen kunik. Mende, at Esau eti naʼit o,” (Mal. 1:2-3)
yiluk yisikemo, kolal mbalogo ʼbisuka. 14Eti paga, nit nen ninggit diluk yugun. At Allah obabut nggorlo kagakike yusak nogo? Mondok dek o. Allah obabut mot o. 15At nen Musa men yogokike,
“An nenat inaʼbuwa mende kalok inaʼbuwa kigik, nendainggen mende kalok nendainggen agik, kagasigin o,” (Kel. 33:19)
yiluk yogokike. 16Allah nen esigit diluk yiligogo eti, akoni inakla nen pano yiluk ambalok, it nen inobatnerogo kagatluk nen, inaʼbuwa kiligogo dek. At Allah obabut pano nenat inaʼbuwa kalok inebe woginabigogo o. 17At Allah nen nggok Firaun men yogokike,
“An nen yi pasigat mendagagi o. Akoni nen an nobatne inilu agik, nendaga o yi ai ndi ai yogisilik lagik, kagasuwagaluk mendagagi o,” (Kel. 9:16)
yiluk yogokikemo Allah wene kolal mbalek etnogo paga kolal mbalogo ʼbisuka. 18At Allah nen,
“At yi aʼbuwa,” yiluk akla ambaligogo mende kalok, inaʼbuwa kigik, nen,
“At eti endainggen aʼberet digin,” yiluk akla ambaligogo mende kalok endainggen aʼberet digik, kagarigogo mende o.
Allah akla agaga akoni inoba ʼbigik, inaʼbuwa kigik, kagarigogo wene
19Esigit diluk kagarigogo eti paga, kat omanggi nen an men yoknisusak ambaligogo,
“At Allah akla ambalok kagarigogo mende eti, ta nen,
Naʼit, yiluk deget dusak nogo. Esigit diluk deget dusak erlok dek mende, nenaluk wene ninoba ʼbiligogo,” yiluk yusak ambaligogo. 20Iya! Nagot yi. At Allah wene yisinem, kat kane onggo dagakogo yogosusak nogo? Erlok dek o. Akoni nen iyak agat nggaʼbok mende kagakonem, agat nggaʼbok eti nen, at kagarigogo mende eti yogoko dogolik,
“Kat nen an yigit diluk nenaluk kagat naken,” yiluk yogosusak nogo? Erlok dek o. 21Agat nggaʼbok eti omanggiat mende, at kagarigogo eti inde weregatma, omanggi panorogo kagarogo ʼbigik, omanggi yugunat kagarogo ʼbigik, kagasusak dek nogo? Kagasusagat o.
22Eti kak, at Allah akla ambasi dogolik,
“Akoni an nen waliyasigi mende, it amberek nakla agaga liyabigogi eti, weyagarinabigiluk, nakla agaga dagasike mende eti, it nen naren mbalkik, nobatne werek eti, inilu agik, kagasuwak o,” yiluk endainggen sebekogo dogoligogo mende. 23It eti ake esigit diluk endainggen sebekogo dogolik, nit pasik men ambiligogo,
“It inaʼbuwa mende panorinabigiluk ebe-alep waliyasigi eti, pano mondok kagarinabigin mende inilu asuwak o,” yiluk ambaligogo. 24Esigit diluk ambaligogo mende eti, nit akoni Yahudi mende inarligat mik ninakikesik ninayonggo ʼbisike ʼbuk. It sikmangge mende ninomat mik ninakikesik inayonggo ʼbisikeat o. 25Esigit diluk yiluk at Allah nen wene omanggi men yisike,
“Akoni werlek mende an naʼburi dek welaguka mende, an naʼburiat o, yiluk yigik, inebe inaʼbuwa kigidek mende, inaʼbuwaat o, yiluk yigik, yigin o,” (Hos. 2:23=TB 2:22)
26“An nen akoni o omanggi mende ake,
Kit, an naʼburi dek o, yiluk yisigi mende, yabunggane it o etoma mende pasigat,
O yoma an niluk dogoligogo mende naʼburi o, yiluk yigin,” (Hos. 1:10)
yiluk yisikemo at Hosea nen kolal mbalogo ʼbisike. 27-28Nen wene omanggi Allah nen men yisike,
“Akoni agat oba mende yoma wene ibat inoba mondok ʼbigin eti paga, akoni Israel nen endago mende inebe lelaga i laut nggok yenggelek yimbitlangge dogoligogo mende eti kak werek. Mende, inebe mbererlagat ndil inabigin o,” (Yes. 10:22-23)
yiluk yisikemo Yesaya nen kolal mbalogo ʼbisike. 29Esigit diluk yiluk Yesaya nenat wene omanggi alebat men yisike,
“Ninombae Endaganggok obatneyak etnogo, nit nen endago mende amberek togot diyigidek mondogat inako dogolepma, Sodom, Gomora ndak-ndak kagatlatlep o,” (Yes. 1:9)
yiluk Yesaya nen kolal mbalogo ʼbisike.
Akoni Israel mende nen inendainggen Yesus oba panggot digidek kagako laguka wene
30Eti paga, nit nen ninggit diluk yugun? Men yusak. It akoni sikmangge mende nen wene inoba mende Allah nen nggorogo ʼbiluk, suguluk inom kunogo ʼbiyawagaluk kagasusak mende inobatnerogo kagakidek. Mende, inendainggen Yesus oba panggot disukama, Allah nen wene inoba mende nggorogo ʼbisikesik, yabunggane suguluk inom kunogo ʼbiyasike. 31Esigit diluk mende, it Israel mende nen, Allah nen wene inoba mende nggorogo ʼbiluk, yabunggane suguluk at inom kunogo ʼbiyausak wene kologo kagako doguwogoluk walkasuka mende, erlok dek agike. 32Nenaluk nen esigit diluk erlok dek agike. Eti inendainggen Yesus oba panggot digidek, inenggaerek inakla ambalok kagako laguka eti paga o. Akoni kolagarlem lago dogolik nggit oba iniyok aʼbit dikogo wariligogi kak, nuk aguka o. 33Wene eti pasik Allah nen men yisike,
“Lakani! An o Sion etoma nggit salek omanggi ʼbigin o. ʼBumo nggit eti paga akoni iniyok aʼbit dikogo waralok wara lago dogogun o. Mende, inendainggen at oba panggot dugun mende inenggarli asugun mondok dek o,” (Yes. 28:16)
yiluk yisikemo kolal mbalogo ʼbisuka.
Currently Selected:
Roma 9: DNA
Highlight
Share
Compare
Copy
Want to have your highlights saved across all your devices? Sign up or sign in
