Wahyu 9
9
1Esigit diluk malaikat inebe 4 nen inabinggon ane pukegasik oba nen, omanggi abinggon ane pukasinem, kusagal omanggi nen wema paga akoni watlatluk wusaligogoma etoma, su kuwaluwagaluk kunci wogokama mbogot oba nen agat oba wusa wagonem lakigi o. 2Wusa wagasik nen, wema paga akoni watlatluk wusaligogoma etoma su kuwalkonem kindu sode sakne ʼbisinem dogalegat dagaligogo kak, su kuwalekma etingge nen, sode dagasi dogolik, mulinggi inom, mbogot inom, amumerogo ʼbisi laga lakigi. 3Sode eti akla nen, yi yibirla ndi yibirla, ndune aik nen mbalinabigogo kak, inaik nen akoni mbalinako dogowagaluk, indewerek ʼbiyegama, sode aklangge nen dagi wago lagaka. 4It yibirla yomenogo yogisasi dogolik,
“O inom, ongga kerlengga inom, yi mende ndi mende ai yago ninat mende amberek inom, taʼbokogonat weyagat dusak mondok dek o. At te, akoni Allah asirlo negen inilkawak oba kolal mbalek dek mende kalok weyagarinabino o,” yiluk liyaʼbiya wagama iyigi. 5Esigit diluk liya ʼbi wago dogolik,
“Akoni inebe mondok minat inasusak dek. At te, warlo ndune aik nen mbalinakonem kenet weyak warigogi eti kak, sut 5 paga dogolik, kenet wako mondok dogowak o,” yiluk yogisegama iyigi o. 6Esigit diluk kagarinakonem u nen inowak kenet wako mondok dogolik,
“Ninebe ndirlipogo watlasu re,” yiluk watlasuwogoluk, inenggaerek nen yi walkigik, ndi walkigik, kagasugun mende, inebe ndirlipogo watlasusak dek, yiluk, yilukmo nogo nen, watlagidek kenerat wako mondok dogogun o.
7Nen, it yibirla eti, inebe kuda akoni nen ambot oba yasuk latluk wim abuwogoluk dogoligogi eti kak welagaka. It eti inelokonggen, akoni inelokonggen negen mende, inunggulowakma nggare-nggare negen emas mende yugu. 8Nen, inisi kumi inisi salek. Nen, inaik, kelo yengge negen endaga singa eti mende aik negen. 9Nen, inamigowak oba, sin yirigogi eti kak, mbisuwe omanggen mende yugu. Nen, inaʼbika ane, ap wim abi luwogoluk kuda dogalegat nen oto negen aga kunik mende endaga kereta mende liriyalok wogisek lagonem, iniyok amitmit ane nggogat yiligogo eti kak. 10Nen, inaga unggum, warlo ndune aga unggum aik werek mende negen werekma, sut 5 paga dogolik inaik nen akoni mbalinako dogowagaluk indewerek ʼbiyegama mbalinako lagaka lagiyigi. 11Nen, it eti inewe endaganggok pagisek werek mende, at malaikat Allah nen wema paga, akoni watlatluk wusaligogoma etoma wusa ʼbisikemo dogoligogo mende etnogoat. At eti endaga, nit ninane paga, weyagarinabigogo mende yu kak, it akoni Ibrani mende inane paga endaga Abadon yigik, nen, it akoni Yunani mende inane paga, Apolion yigik, yiligogi mende lakigi.
12Esigit diluk weyagarinabigin mende omanggi weyagarinakesik, yabunggane inggi mbere paga agake weyagarinabigin mende awan werek o.
13 Malaikat inebe 5 inabinggon ane esigit diluk pukegasik oba nen, malaikat omanggi abinggon ane pukasinem, yi mende ndi mende Allah ake kali kunigogoma obalik, ebe emas mende kagarek mende, nen, unggut pelak-pelak 4 oba sapi aik negen kagarek mende, Allah elokoma werekma etoma nen akoni inane negen yisinem kolki. 14At ane eti nen, at malaikat omanggi abinggon ane pukeke mende etnogo, esigit diluk ane pukekesik inggimo pago werekma, men yogoke,
“Malaikat inebe 4 oba i nggok endaga Efrat eragalilu kerle warek werek yomenaga kerle piyalinabi lan o,” yiluk yogoke. 15Esigit diluk yogoke eti, it malaikat eti nen akoni inebe 3 paga minggirlogo ʼbiyalok, mbere togot diyasi dogolik, omanggi tahun eti paga, sut eti paga, ininggi eti paga, jam eti paga, inebe mondok inarik lausak, yiluk paganeat Allah nen inayonggo ʼbisikemo nggagalek werekma, kerle piyal diyasinem nilenggen iyigi o. 16Esigit diluk lagiyigirik werekma, yabunggane yoknoko dogolik,
“Ap tentara agot dombok dogalek inakuda dombok ambot oba yasukogo werekma iyegen eti inebe dogalegat, 200 juta paga werek,” yiluk yanggul nokonem nasuk kolki. 17Esigit diluk kolkirik paga nen, yabunggane kuda inom, akoni ambot oba yasugu mende inom, naʼbingganggo paga lagiyigi. It eti su inamigowak oba sin yirigogi eti kak yugu werekma iyigi. Esigit diluk iyigi eti, it amberek iniyom elokonggen kindu amulok negen mende yugu, nen, it amberek, iniyom mbogot elokonggen mirli negen mende yugu, nen, it amberek iniyom elokonggen wi nggiaʼbut negen mende yugu, nen kuda it mende yomenogo inunggulowak yengge kelo yengge endaga singa eti mende unggulowak negen. Nen, inambema nen, kindu inom, sode inom, kondali al negen obasi weyak mende endaga belerang eti mende inom, duki wago laga. 18Esigit diluk kindu inom, sode inom, belerang obasi weyak eti mende inom, ebe 3 weyagarinabigogo mende eti, inambema nen duki wago dogolik, akoni inebe 3 paga minggirlogo ʼbiyalok, mbere togot diyasi dogolik, amberek inebe min mondok inarik lagaka iyigi. 19It inambema nen esigit diluk inakik, nen, inaga unggum warlo unggulowak werek mende negen esigit dilugat inakik, kagako lagaka iyigi. It kuda eti inobatne, inambe inom, inaga unggum inom, etiatma akoni inebe esigit diluk yi aik ndi aik inoba ʼbiluk inako lagaka o.
20Esigit diluk mende, it akoni pelakngge inakidek eti paga, kugi inobabut weyak mende oba panggot diluk dogolik, ininggi nen ngganengge emas mende inom, perak mende inom, tembaga mende inom, nggit mende inom, o mende inom, kagarogo ʼbiligogi o. Esigit diluk kagarogo ʼbiligogi eti, it ngganengge eti nen, inilenggen kiligogi degat, inasuk koligogi degat, kolak liligogi dek mendeat, esigit diluk kagarogo ʼbiluk, 21akoni inebe inakik, elo degat inakik, kumi yogot paʼbiyigik, ap nen paginabuwagaluk kagakik, ininggi abusak waganggik, kagako lagaka mende togot diyalok inobabut kwalagidek dogolik, weyak kunik mondok kagako lagaka iyigi o.
Currently Selected:
Wahyu 9: DNA
Highlight
Copy
Compare
Share
Want to have your highlights saved across all your devices? Sign up or sign in
