Wahyu 22
22
1Esigit diluk yanggul nekemo kigirik paga nen yabunggane, Allah inom, Domba Eyak inom, imbisak nggok mondok dogoligogi mende inobalikmo nen, i inilugurinabigogo mende elokonggen mirliyak pano wukagi salek mende elesi punalogo duki witluk nen, 2o kota etoma kolagarlem abel pelak-pelak liligogoma werekma, i etnogo ndumo liligogoma kigi. Esigit diluk lago nggorlek, i aik pelak-pelak o ai yago werekma kigi. O eti enggen nasinem inilugurinabigogo mende etnogo, sut omanggi paga enggen amberek yikik, sut omanggi paga enggen amberek yikik, yiko nggorlek o mulinggi dagigik, wusigik, kagako nggorlek tahun omanggi paga enggen kurli 12 paga yirigogo mende welaga o. Nen, engga paga, yi akoni ndi akoni inunggulowak endaga dombok panorinabigogo mende kigi. 3Nen, alep Allah nen akoni inom, yi mende ndi mende inom, inalem ʼbiyasike mende etnogo nggorogo ʼbiyalokma nogo nen, yabunggane o eti paga inalem nggorek welaga kigi. Allah inom, Domba Eyak inom, imbisak nggok mondok dogoligogi mende inobalikmo etnogo, o kota etoma ndumo werek nggorlek, it akoni Allah anduwanengge mende inendainggen at oba panggot diluk dogolik, at ake kagako dogogun iyigi. 4Esigit diluk kagako dogolik, Allah endaga it inil kawak oba kolal mbalekma, it nen at elokonggen inilenggen kasi dogogun o. 5Nen, Allah ebe aʼbigil it inebe liyarinako nggorlek nogo nen, o kibanggo degat, nen isagal inom, mulinggi inom, yako dogusak degat, werek nggorlek, it nggokndek inendaganggok dogolik, akoni amberek inapma ʼbiyalok pagisek mondok-mondok dogogun iyigi o.
Yesus wisigin wene
6Esigit diluk iyigirik werekma, at malaikat etnogo nen yabunggane yoknoko dogolik,
“Yi wene ndi wene kagat lagonem lakilik wagan eti, akoni nen,
Wene eti eberogonat yiluk didusak mende o. Wene eti il omanggi dogoluk dek, ibat-ibat kagat lasigin mende o. Kagat lasiginma, at ninombae Endaganggok Allah Agurengge it ap at ane yogisiligogi mende wogisaligogo mende etnogo nen, at anduwanengge mende yogisawagaluk an malaikat laʼbani wagama wagi o,” yiluk yokneke. 7Esigit diluk yoknokonem, at Yesus nen men yokneke,
“Lakan! An ibat-ibat wisigin o. Esigit diluk wagonem ta nen yi wene ndi wene kolal mbalek mende yi asuk kologo motogo kagako dogogin kalok, Allah nen panot disinem akla arlenggen kigin o,” yiluk yokneke.
8Esigit diluk yoknekemo, yi wene ndi wene taʼbokogonat yi, an Yohanes yoknokonem nasuk kolkik, nilenggen kigik, kagaki o. Esigit diluk nasuk kolkik, nilenggen kigik, kagakirik nen, at malaikat wene eti an nilenggen lakowagaluk yanggul noko laga mende etnogo, nindibagal yunggulogo pogorasigiluk kagaki. 9Esigit diluk mende, at nen men yokneke,
“Puk asin! An esigit diluk pogot nabusak dek o. An nebe, kat inom, kagarlagi amberek at Allah wene yogisiligogi mende inom, it amberek inebe taʼbokogonat wene kolal mbalek yi inasuk kologo motogo kagako dogogun mende inom, ninom ndak-ndak, ninebe at Allah anduwanenggeatma, kendainggen at Allah oba panggot diluk, at arligat pogorasusak o,” yiluk yokneke. 10Esigit diluk yoknekesik oba nen, yabunggane yoknoko dogolik,
“Yi wene ndi wene Allah nen yeke mende yi ibat kagat lasigin eti paga, sirlo ʼbiligogi eti kak,
Akoni yogisausak dek, yiluk wene kakla atluk togot digidegat yogisasi dogono o. 11Yogisasinem ta nen, obabut weyagat kagako dogogin ambasi kalok, weyagat kagarasi dogowak o. Nen, ta nen weyak inalilo mendeat kagako dogogin ambasi kalok, eti mendeat kagarasi dogowak o. Nen, ta nen Allah akla ambaligogo mendeat kagako dogogin ambasi kalok, etiat kagako dogowak o. Nen, ta nen ebe Allah ake ʼbiyalok dogogin ambasi kalok, ebe Allah akeat ʼbiyalok dogowak o,” yiluk yokneke.
12-13Esigit diluk yoknekemo, at Yesus nen yoknoko dogolik,
“Erlo inom, enggaʼbu inom, anatma, ebe-alep erlo paga nen logat yabunggane ilugun oba nikok mondok dogogin mende nen, akoni inebe dombok inobabut kagarigogi mende ndak-ndagat onggo wogisagaluk wolok ibat-ibat wisigin o. 14Nen, it amberek iniyom panorogo sobalogo ʼbakalok dogogun mende dombok, Allah nen panorinakonem inakla arlenggen kalok, o enggen nasinem inilugurinabigogo mende etnogo enggen ninggik, nen o kota etoma su kambemangge unggisi dogusak indewerek atluk dogogun. 15Esigit diluk mende, it akoni amberek weyak inalilo mende kagarigogi mende inom, it imagare elo dek elalin inarigogi mende inom, it yogot paʼbiyigik, paʼbiyawagaluk kagakik, kagarigogi mende inom, it akoni inarigogi mende inom, it inendainggen ngganengge oba panggot diluk dogolik pogorarigogi mende inom, it inambe paga nen nuket diyigik, yi mende ndi mende kagako dogolik, nuket diyigik, kagarigogi mende inebe dombok inom, taʼbokogonat o kota eti abel sikmangge dogogun o,” yiluk yokneke. 16Esigit diluk yoknekesik, at Yesus nenat, yabunggane yoknoko dogolik,
“Yi wene ndi wene yi abok, an nagot malaikat nen kit naʼburi o yi ai ndi ai nandorligogi mende taʼbokogonat yokisawagaluk kinoba laʼbi wagi eti an Yesus nenat o. Nen, o anggu dukiligogo eti kak, ap Daud nen endago mende etnogo, an nebeat o. Nen, kusagal kubengge o mulinggi dagi wirigogo ndak-ndak, liyaʼbi wirigogo mende aʼbigil weyak etnogo anat o,” yiluk yokneke. 17Esigit diluk yoknekesikmo nen, yabunggane, men yokneke,
“Ta nen i abu nen nausak warlok kalok, i inilugurinabigogo mende onggo dek werlegat korlalok nowagaluk, Allah Agurengge inom, Domba Eyak age negen yikeke mende etnogo inom, imbisak nen yisi dogolik,
Na witni o, yiluk yogisasinem, it amberek inebe dombok it imbisak inane inasuk koligogi mende nen,
Na witni o, yiluk yisi dogusagat o,” yiluk yisinem kolki.
Wene ilugun oba arat yogokike wene
18An Yohanes nen kit amberek wene yabunggane kagat lasigin mende an yokneke mende eti, kinasuk kolugun mende kinebe dombok, wene omanggi yi ʼbukakogo yokisak,
“Ta nen wene kolal mbalki mende yi werek nggorlegat, wene ninat mende oba lambelko kalok, Allah nen akoni wene inoba ʼbiluk weyagarinabigin yiluk yeke mende kolal mbalogo ʼbigi mende yi ndak-ndagat, Allah nen at eti wene omanggi inom lambelogo oba ʼbiluk ebe weyagat digin o. 19Nen, ta nen yi wene ndi wene yabunggane kagat lasigin mende yokneke mende kolal mbalki mende yi werek nggorlegat, wene eti mende omanggi sebelogo wusako kalok, o enggen nasinem inilugurinabigogo mende eti enggen omanggi at nowagaluk werek mende, Allah nen,
Kat nausak dek, yiluk yogokik, nen, o Allah enggaerek ago o kota etnogo at eti indewerek atluk unggiluk dogowagaluk werek mende, Allah nen,
Kat unggusak dek, yiluk yogokik, yigin o,” yiluk yokisigi o. 20Nen, wene eti taʼbokogonat, eberogonat yiluk yiligogo mende, at Yesus etnogo nenat,
“An ibat-ibat wisigin o,” yiluk yiligogo. Esigit diluk yisinem, an nen,
“Yesus newe. Kat ibat-ibat wisigin eti ebeat asuwak yu kak,
Amin, witno,” yiluk yigi. 21Nen, kit Allah aʼburi o yi ai ndi ai nandorligogi mende taʼbokogonat, nagarlagi nirugi. Ninewe Yesus obabut pano etnogo nen kinanggorlem dogowak o.
Currently Selected:
Wahyu 22: DNA
Highlight
Copy
Compare
Share
Want to have your highlights saved across all your devices? Sign up or sign in
