Wahyu 20
20
Mulinggi dagigik wusigik kagako nggorlek 1.000 tahun dogogun wene
1Esigit diluk iyigirik oba nen, yabunggane, at malaikat omanggi mbogot oba nen su kunci wema paga akoni watlatluk wusiligogoma etoma mende inom, kerle nggombi mbisuwe omanggen anggineyak mende inom, inggimo wolok wusa wagonem lakigi. 2-3Esigit diluk wolok wusa wagasik, at warlo negen nggok paganeat nen welagike mende endaga Iblis yigik, Setan yigik, yiligogi mende etnogo, paʼbiluk inggi kerle warogo wema paga akoni watlatluk wusiligogoma etoma wusako dogolik,
“Yi akoni ndi akoni nukerinako lagan eti kak nuket diyigidek 1.000 tahun kerle warek dogono,” yiluk u saʼbit warogo ʼbiligogi eti kak su kunci larogo wusa ʼbeke kigi. Etoma dogoluk nen, piyalogo liya ʼbi wisusak obaat omanggi pasigat piyalek dogowagaluk piyalogo liya ʼbi wisigin werek o.
4Esigit diluk kigirik oba nen yabunggane, ap nggokndek inobalik dogalegat werekma etoma inebe dogalegat inobalikmo etoma nggok dogolik, akoni amberek inapma ʼbiyalok pagisek dogolik wene inoba ʼbigik, nggokik, kagako dogowagaluk indewerek ʼbiyegama iyigi. Nen, omanggi kigi yi. It akoni kelo yengge negen nggok mende etnogo inom, ngganengge at ebe negen alino kagarek etnogo inom, pogorinakidek endaga salek kolal mbalek etnogo inakla enggerlogo inil kawak oba a? Ininggi paga a, mbalkidek togot diyalok, Yesus kagako lagike mende yogisilik lago laguka pasik inom, Allah wene pasik inom, inarlonggop ade ʼbogokogo mbalogo inakuka mende yomenogo arat suguluk inilugurogo mendiyekesik nen, at Kristus inom akoni amberek inapma ʼbiyalok pagisek, mulinggi dagigik wusigik kagako nggorlek, 1.000 tahun welagaka iyigi. 5It akoni watlaguka mende alebagik etiat inilugurinakesik mendiyeke iyigi. Esigit diluk mende, it akoni watlaguka mende pelaknggeat, o mulinggi dagigik, wusigik, kagako nggorlek, suguluk inilugurinakidek 1.000 tahun kagasuwagaluk ʼbiyekemo werekma iyigi. 6It akoni alebagik watlaguka mende suguluk yabunggane warek mondok dogowagaluk wene inoba ʼbiluk inasumo watlasugun. Mende, it amberek alebagik suguluk inilugurinabiluk nen, inebe Allah ake ʼbiyagin mende eti arlek, inakla arlenggen mondok kugun o. It eti yabunggane watlagidek dogolik, inebe Allah inom, Kristus inom, imbisak indewerek atluk, o mo dagigik, wusigik, kagako nggorlek, 1.000 tahun oba, it Kristus inom akoni inapma ʼbiyalok pagisek dogogun iyigi.
Iblis obatne deget diluk kali aikmo laʼbigin wene
7Esigit diluk iyigirik oba nen, yabunggane, o mulinggi dagigik, wusigik, kagako nggorlek, 1.000 tahun arat dogoluk nen, ilugun nggobokogo Iblis inggi kerle warek etnogo kerle piyalogo liyaʼbi wisigin. 8Esigit diluk liyaʼbi wagonem, wim abuwogoluk, akoni inunggulowak endaga dombok mbogot erlomangge 4 paga ombongge, wemangge, elomangge, yomangge dogoligogi mende nukerinabigiluk inakla nggagalik lago laga kigi. Lago dogolik, o endaga Gog mende inom, Magog mende inom, inoba wim yonggo lagasik, inebe mondok dogalegat lelaga i laut yenggelek yimbitlangge werek eti kak dogalogo ʼbiyekemo welagaka iyigi. 9Esigit diluk dogal diluk, akoni Allah aʼburi o Allah ago unggul endainggen kunik mende etnogo dogal diluk werekma, o nda sebelogo inasuwogoluk nggerlekogo unggi wagaka mende, kindu mbogot oba nen wusa wago dogolik, inebe taʼbokogonat kali nasi lagaka iyigi. 10Esigit diluk kali nasi nggorlek, at kelo yengge negen etnogo inom, at omanggi nen,
“An Allah wene yokisaligogo,” yiluk enggalat nuket diyaligogo mende etnogo inom, i laut kindu mende yenggelekma kondali al negen obasi weyak mende endaga belerang inom-inom amulok nasi mondok werekma etoma mbo wukogo wusa ʼbiyeke. Wusa ʼbiyekemo etoma werekma, Iblis etnogo yabunggane inoba mbo wukogo wusa ʼbekemo inom etoma dogolik, dinggagane kibanggone kenet wako mondok-mondok dogogun iyigi.
O ilugun oba wene inoba ʼbigik, nggokik, kagasigin wene
11Esigit diluk kigirik oba nen, yabunggane, Allah nggok dogoligogo mende obalik nggok nggut mende werekma, at ebe etoma nggok werek kigi. Esigit diluk werekma mbogot, agat, taʼbokogonat, agorlerogo dek atlukmo nogo nen, yabunggane inilenggen kausak degat ago laga kigi. 12Esigit diluk dek ago nggorlek, akoni watlaguka mende inendaga werek mende inom, inendaga dek mende inom, at nggok obalikmo korek werek etnogo elokoma mendek werekma iyigi. Esigit diluk werek nggorlek, buku taʼbokogonat ʼbunggakigik, buku omanggi akoni iniluk mondok dogowagaluk panorinabigin mende inendaga kolal mbalek mende ʼbunggakigik, kagako laga. Esigit diluk ʼbunggal diluk, it akoni watlaguka mende inobabut kagako laguka mende buku etoma paga kolal mbalek mende ndak-ndagat wene inoba ʼbigik, nggokik, kagako laga kigi. 13Eti kak, akoni pelakngge watlagukasik, i laut yenggelekma dogoligogo mende, i laut nen ponggologo wula ʼbiya wagik, akoni watlatluk wema paga wusasuka mende, at watlarigogi erlo inom, wema paga inom, indewerek dogoligogo mende etnogo nen liya ʼbiya wagik, kagakonem, at Allah nen it inebe dombok inobabut kagako laguka ndak-ndagat wene inoba ʼbigik, nggokik, kagako laga kigi. 14-15Wene esigit diluk inoba ʼbigin eti buku it akoni inebe dombok iniluk mondok dogowagaluk panorinabigin mende, inendaga kolal mbalek etnogo paga mbalkidek mende kalok, esigit diluk i laut kindu mende yenggelekma etoma mbo wukogo wusa ʼbiyasi dogolik, wema paga inom, watlarigogi erlo inom, inomat mbo wukogo etomaat wusa ʼbiyasi laga kigi. Esigit diluk wusa ʼbiyasi laga eti, alebagik elalma ake watlatlukmo nen, yabunggane mondok-mondok watlasugun mende i kindu mende yenggelekma wusa ʼbiyaginat o.
Currently Selected:
Wahyu 20: DNA
Highlight
Copy
Compare
Share
Want to have your highlights saved across all your devices? Sign up or sign in
