Yakobus 3
3
“Akoni inaʼbi eti nenat inebe weyagarinabigogo,” yiluk yogisasike wene
1Nagarlagi nirugi o. Nit akoni yanggul isaligogi mende weyak kagako kalok, Allah nen yabunggane akoni amberek inendema waganogo inoba wene ʼbugurlagat negen ʼbiyagin mende, nirat, wene nggogat ninoba ʼbinanigin o, yiluk kinilu eti paga, kinebe dogalegat akoni yanggul isiligogi mende asuwogoluk ambagup. 2Nit akoni taʼbokogonat pano kagarigogi salek, yi mende ndi mende pasik, weyagat karigogi o. Mende, ta nen ane paga nen wene weyak mende omanggi yigidek dombokogonat yiligogo kalok, inggi iyok ebe taʼbokogonat dombokogo pago dogolik, endainggen ʼbogokogo korleat werek o. 3Eti kak, nit nen kuda ambe nggutmo kerle yirlel diluk, nit kolak etingge lausak yiluk, ambasi kalok, kerle etnogo likasinem, ebe etingge liligogo o. 4Nen, nggu i yenggelekma liligogo mende eti, ebe nggok mende, kwiyakne nen obatnerogo wolok liligogo mendeat, ap nggu wolok liligogo mende eti, akla nen,
“Kolak etingge ligin,” yiluk akla ambalok, unggul moret diligogo mende ʼbugurlagat eti nomokasi kalok, etinggeat mot wolok liligogo eti didini o. 5Eti kak, ninaʼbi ebe ʼbugurlagat mende, akoni inenggaerek nen pogorakiligogi kak, ninaʼbi eti nen wene kusumbiat nggogot dakaligogo o.
Nen, kindu enggen ʼbugurlagat mende selokogo wusalok onggama o nggokndek mende inom nilik liligogo eti, didiniat o. 6Ninaʼbi eti, ebe kindu negenat o. Nit akoni agat oba yoma yi weyak ndi weyak kagarigogi kak, nininggi niniyok yi werek nggorlegat, ninaʼbi yi nen ninebe abirat weyagat ninabigogo o. Esigit diluk weyagat ninabigogo eti, kindu eti erlo, weyakma kindu aikmo dogogunmo eti mendeatma, ninaʼbi paga kindu negen kun diluk, ninebe werek yi abirat kali niligogo o. 7Akoni nen, yi ʼbagi ndi ʼbagi, yi sewe ndi sewe, yi warlo ndi warlo, yi ikan ndi ikan, inilkigi weyak mende erlok inil wasumo inil ena arigogi o. 8Esigit diluk mende, ninaʼbi eti ta nen il wasusak ambegep. Mondok erlok dek o. Ninaʼbi eti asuk warek degat o. Warlo aik nen akoni liʼbilinakonem watlarigogi kak, ninaʼbi eti paga weyak mende nggerlekogo dogolik, it amberek inebe inarigogo o. 9Ninaʼbi eti paga ninombae Endaganggok Allah pogorakik, akoni at ebe negen winamet dinanggike mende inalem ʼbiyigik, kagarigogi o. 10Erlo ninambe omanggiat eti paga, Allah pogorakik, akoni inalem ʼbiyigik, kagarigogi o. Nagarlagi nirugi o. Esigit diluk kagasusak dek mendeat kagarigogi o. 11I elesi omanggiat mende nen pano mende inom, arle werek mende inom, dambukogo dukusak nogo? Erlok dek o. 12Nagarlagi nirugi o. Sarluka erlo nen enggen saik yisusak nogo? Nen, saik erlo nen sarluka enggen yisusak nogo? Dek o. Eti kagat, iluge elesimo nen, i werlek i mende omanggi dukusak nogo? Mondok erlok dek o.
“Allah nen inakla nggagalkonem, inakla nggagukogo kagarigogi,” yiluk yogisasike wene
13Kit amberek kinakla nggagalek dogolik, yi wene ndi wene nggogat kinilu kalok, akoni nen enggagat didinaguwagaluk kinobabut sebekogo dogolik, kinakla nggagalogo panorogo kagako dogono o. 14Mende, kinakla weyak atluk uwa mbalkik, kinenggaerek kinake arlek ebekik, kagako dogolik, kinenggaerek nen,
“An pano,” yiluk pogorakasi dogogup o. Esigit diluk kagasugun kalok, Allah wene ebe wene eti mende sagalogo kinenggalat yugun eti yusak degat o. 15Esigit diluk kagarigogi eti, Allah nen inakla nggagalkonem kagarigogi ʼbuk. At te, erlo at Iblis nenat inakla nggagalkonem akoni agat oba mende inobabut inikogat dogolik, warlok ambaligogi mende kagarigogi o. 16Inakla weyak atluk uwa mbalkik, inenggaerek inake arlek oba ebekik, kagakonem inaneyak nggogat sagalkik, yi weyak ndi weyak kagakik, kagarigogi o. 17Esigit diluk mende, Allah nen akoni inakla nggagalkonem, inobabut nggok kagarigogi, ebe yi. Weyak omanggi kagakidek inilaga iyokogo werek o. Esigit diluk dogolik, akoni inom panorogo welagik, inobabut enago welagik, inane kologo kagakik, akoni inaʼbuwarogo mondok welagik, o enggen pano mende yirigogo kak, panorogo kagakik, akoni amberek inelokomangge ʼbiyigik, amberek inomborlikngge ʼbiyigik, kagakidegat inendainggen mbere welagidegat, panorogo kagarigogi o. 18O pano mende ai yakonem, enggen pano yirigogo kak, akoni inobabut panorogo dogolik, it akoni amberek inom panorogo dogowagaluk dambul inakonem, inobabut motogo pano kagarigogi o.
Currently Selected:
Yakobus 3: DNA
Highlight
Copy
Compare
Share
Want to have your highlights saved across all your devices? Sign up or sign in
