Yakobus 1
1
Keyagi warinakike wene
1An Yakobus ninombae Allah ninewe Endaganggok Yesus Kristus imbisak inanduwanengge etnogo nen, wene yi kit kinunggulowak endaga 12 paga yi ai ndi ai sirlik-mbirlikogo lalok werek mende taʼbokogonat kinoba laʼbi wagi. Nagarlagi nirugi o.
Inendainggen korlerogo dogowagaluk yogisasike wene
2Nagarlagi nirugi o. Yi weyak ndi weyak kinoba asi wagonem kinakla arlenggen kasi dogono o. 3Esigit dilugat kinoba wagonem, Allah nen,
“Inendainggen an noba panggot diluk werek a? Dek a,” yiluk, kinaren mbaligogo eti paga, kinendainggen sebekogo kambukogo dogusak kagat kinabigogo eti kinilu o. 4Kinendainggen awan negen agake welagidek taʼbokogonat erlogat korle asuwagaluk, kinakla mbuk agidek kinendainggen kambukogo dogono o. 5Mende, at Allah obabut pano nen akoni taʼbokogonat inaʼbuwa dogolik mberisigidek wogisaligogo eti paga, kit amberek kinakla nggagalek dek kalok, at nggino yogosumo kinakla nggagaliginat o. 6Akoni amberek nen,
“Allah nen woknisigin a? Dek a,” yiluk, wene munini ebeko dogolik nggino yogorigogi mende eti, kwiyakne nen i sarin sabulik-mbabulik kagarigogo eti kak yogorigogi eti paga, kit esigit diluk nggino yogosugun kalok,
“Woknisigin a? Dek a,” yiluk, wene munini ebekidek kinendainggen Allah oba panggot diluk nen nggino yogoko dogono o. 7-8Akoni esigit diluk nggino yogorigogi mende eti, inendainggen mbere dogolik yi mende ndi mende kagasuwogoluk,
“An esigit diluk kagasigin,” yiluk ʼbogokogo yusak erlok dek eti paga,
“Ninewe Endaganggok nen omanggi woknisiginat,” yiluk ambausak erlok dek o.
“Kit Allah aʼburi kinamende dek mende inom, werek mende inom, kinakla yigit diluk ambausak,” yiluk yogisasike wene
9Kit Allah aʼburi kinamende dek mende amberek inapma dogolik,
“An Allah nen nggogot danggemo werek o,” yiluk kinakla arlenggen kausak o. 10-11Mende, mo aninirogo yako dogolik, o engga taʼbet lagik, enggen lologo wusalok elokonggen weyak agik, kagat larigogo kak, esigit dilugat, it nggokndek inamende dogalegat mende eti, yi mende ndi mende awan kagako werekma inebe dek asugun eti paga, kit amberek kinamende dogalegat kinebe nggogat dogolik, o enggen lologo wusaligogo kak,
“An namende dogalegat yi dek asiginat o. Allah nen nendaga sebelogo ʼbanggemo werek,” yiluk, kinakla arlenggen kausagat o.
“Weyak kagarigogi eti inenggaerek nen inakla nggagalogo, weyak kagarigogi,” yiluk yogisasike wene
12Kit amberek yi weyak ndi weyak kinoba ago nggorlek, kinobakanini kambuk yiluk dogogun kalok, kinakla arlenggen kakagun o. Esigit diluk kinobakanini kambuk yiluk dogogun kalok, Allah nen,
“An nebe kinendainggen kunik mende kiniluk mondok dogogun mende wokisagin o,” yiluk, abok yoknisasike etnogo kit kinaren mbalogo nenat wokisagin o. 13At Allah weyak kagasuwagaluk akoni nen akla nggagaligogi dek. Mende, at nen, akoni amberek weyak kagasuwagaluk inakla nggagaligogo degat eti paga, kit amberek kinakla nen,
“An weyak kagasuwagaluk Allah nenat nakla nggagaligogo,” yiluk ambausak erlok dek o. 14Esigit diluk mendeat, ninebe dombok ninenggaerek ninakla nen,
“Yi mende ndi mende warlok,” yiluk weyak ambaligogi eti nenat ninebe wokninakik, lit niyigik, kagako dogolik, ninakla nggagaligogo o. 15Yabunggane ninakla nen yi mende ndi mende warlok weyak ambaligogi mende eti, kumi nen ineyagi endaginabigogi eti kak, aburla atluk, eyak endagogo weyak kagarigogi o. Nen, weyak kagarigogi mende eti korle atluk, eyak endagogo ninebe watlarigogi o.
16Nagarlagi nirugi. Kinaʼbuwa o. Kinenggaerek nen nuket dakaunogo yiluk yokisigi o. 17Ninombae Allah mbogot oba mende etnogo nenat, yi mende ndi mende pano mende woknisigik, pano mondok mende woknisigik, wusak nisa wirigogo o. At nenat mbogot oba liya werek mende eti, winamet disikesik nen, at ebe ninat kagat lagik, abel dagakogo amum agik, liya agik, kagarigogo dek. 18Yi mende ndi mende winamet disike mende taʼbokogonat mangguya negen nirat dogowagaluk, at enggaerek akla ambalok wene ebe wene eti pagaat endak ninakikemo werek o.
“Wene kinasuk kol diluk motogo kagako dogusak,” yiluk yogisasike wene
19Nagarlagi nirugi o. Kinebe kinaʼbuwa o. Wene yi kinakla eberek dogono o. Kinebe dombok wene kinasuk ibat ibat kol diluk nen, kinane paga nen erogat yigik, kinakla agaga dagi wagonem kinendainggen sebelogo dogoluk nen erogat yigik, kagako dogono o. 20Akoni inakla agaga weyak kagarigogi mende eti, Allah akla warlok ambaligogo mende kagarigogi dek o. 21Eti paga, yi weyak ndi weyak kinenggarli dek kagarik noko dogoligogi mende eti togot digik, weyak nggogat kagarik noko dogoligogi mende eti togot digik, kagako dogono o. Wene pano wene Allah nen kinakla ai yago ʼbisike mende eti paga nen ndil kinabusak eti paga, kinendainggen sebekogo at apma unggiluk, at nen wene kinakla nggagaligogo mende eti waganggo dogono o.
22Wene Allah wene eti kinasuk arlek kol diluk puk asumo, kinenggaerek nen nuket dakagun eti paga, kinasuk kol diluk, dikogo kagako dogono o. 23-24Akoni amberek wene Allah wene eti inasuk arlek kol diluk nen, wene eti ndak-ndakogo kagakidek kalok, akoni inelokonggen wukagi paga lakalok inebe werlekmangge lalok,
“Nebe endigirlik kigi,” yiluk eberek welagidek ibat-ibat obarlikma arigogi eti kagat o. 25Nit akoni kerle warek negen werekma, wene pano wene Allah nen ninasuk warogo ʼbogokogo yoknisaligogo eti paga piyal ninabigogo. Eti paga, ta nen wene eti asuk kol diluk nen, obarlikmat diligogo ʼbuk. At te, dikogo didiluk, oba eberek mondok dogolik, wene eti ndak-ndakogo kagako kalok, yi mende ndi mende kagakonem, Allah nen akla arlenggen togo yamakasi dogogin o. 26Nen, ta nen,
“An Allah apma dogolik motogo kagarigogo,” yiluk akla ambasi dogoligat, ane ilugun oba yugunat-yaganat yiligogo kalok, kuda ambe kerle warigogi kak, at esigit dilugat ambe panorogo anggorlem welagidek kalok enggaerek nen nuket dakasi dogolik,
“Allah akla ambasi ndak-ndak kagarigogo,” salek, we wirlikogonat kagarigogo o. 27Ninombae Allah nen,
“Akoni nen an nakla arlenggen togo motogo pano mondok kagako dogusak, yigit diluk. Elege irlaganggot mende inom, kumi sogugi mende inom, nuk atluk werekma yamagiyigik, akoni agat oba weyak kagarigogi mende eti inobabut waganggidek inenggaerek nen nggareligik, kagako dogusak o,” yiluk akla ambaligogo o.
Currently Selected:
Yakobus 1: DNA
Highlight
Copy
Compare
Share
Want to have your highlights saved across all your devices? Sign up or sign in
