Ibrani 8
8
At Yesus nit ninake Allah indewerek nggok werek wene
1Nit wene yiligogi yi, nggok ebe yi o. Nit ninewe nggok Allah indewerek yogo eti kagat werek o. At ebe, ninombae Endaganggok Allah werekma inggi ebengge nggogat werek o. (Mzm. 110:1) 2Esigit diluk dogolik, Allah ago su mende akoni elalma palkuka paga werek ʼbuk. Dek o. Allah enggaerek nen ago ebe mende palkike paga etoma dogolik nit ninake kagarigogo o. 3It ap Allah indewerek ineugi nggokndek inebe dombok mendiyiligogi eti yi mende ndi mende Allah wogokik, inanggo warikik, kagako dogowagaluk mendiyiligogi eti kak, nit ninewe Allah indewerek nggo eti yi mende ndi mende amberek nit ninake Allah wogosusak werek o. 4Wene Allah nen ninasuk wakike mende eti ndak-ndagat, yi mende ndi mende Allah pasik wogoko dogusak mende, it ap Allah indewerek mende inebe werek eti paga, at Yesus ebe agat oba yoma dogolepma, Allah indewerek dogolep dek o. 5Allah nen,
“Nago su mende elalma pal danino,” yiluk Musa yogokikemo, ebe paligiluk kagakonem, yabunggane men yogokike,
“An nimbisak ndom oba dogolik, an nago yigit diluk pal danino, yiluk yalengge walkalok sikiyigi etnogo ndak-ndakogo mondok pal daninok nen, kakla eberek mondok dogono o,” (Kel. 25:40)
yiluk yogokike eti kak, it ap Allah indewerek agat oba yoma dogolik, ebe mbogot oba werek mende oba likik, alino kagakik, kagarigogi o. 6Esigit diluk kagako dogolik, it erlok dek alino kagarek mende kagarigogi mende, Allah nen,
“Kit pano kagat kinabigin,” yiluk abok yoknisasike mende oba dukogo, at Yesus ebe Allah inom, nit akoni ninom, kurli pago dogolik, wene Allah nen ngget mende warogo wokninakike ndak-ndagat ebe mendeat nggok mondok kagarigogo o. 7Wene alep Allah nen,
“Pano kagat kinabigin,” yiluk wene warogo wokninakike eti paga erlok dek agidek pano kagat ninabilepma, wene eti obalikmo,
“Panot kinabigin,” yiluk yabunggane yilep degat o. 8Mende, Allah aʼburi wene alep mende etnogo pago dogolik, erlok degat kagako lagukama men yogisasike,
“Akoni Israel mende inom, Yehuda mende inom, wene ngget mende omanggi warogo woginabigin oba weregat o, yiluk eberogonat yokisigi o. (Yer. 31:31; Mat. 26:28; Ibr. 12:24)
9An nen kit kinakombalak o Mesir nen wogisek duki wisigiluk ninggi pagisek dogolik,
Esigit diluk kagat kinako dogogin, yiluk wene alebagik wene warogo yogisasigi eti kak ʼbuk. Ninat o. An nen it wene warogo yogisasigi mende eti kologo motogo kagakidek eti paga, it inebe naʼit, yiluk nggolelogo togot diyasigi o.
10Yabunggane akoni Israel mende wene ngget mende warogo woginabigin yigi eti ebe yiat.
An nen wene inasuk warigogo mende eti inakla eberek mondok dogowagaluk, wogisigik, inendainggenma kolal mbalogo ʼbiyigik, kagatluk nen, an it inombae dogogin. Nen, it an naʼburiat dogogun o.
11It inarluwendek inom, elege inom, taʼbokogonat inombae an nebe inilu dogogun eti paga, it ineugi inagakugi inom, inagarlagi inom inirugi inom, yogisasi dogolik,
Kinombae Allah arligat kinilu atni o, yiluk yanggul isausak dek o. Inenggaerek inabusagat, nebe enggak inilu ago dogogun o.
12It weyak kagarigogi mende, eti an nen sagalogo deget diyalok, yabunggane nakla eberek dogogin dek o,” (Yer. 31:31-34)
yiluk Allah nen yogisasikemo kolal mbalek werek.
13At nen, “Wene ngget mende warogo woginabigin,” yiluk yisike eti wene paganeat mende deget digiluk yisike. Yi mende ndi mende paganeat mende il momok agonem ibat togot diyiligogi eti kak, wene alep mende deget digiluk yisike o.
Currently Selected:
Ibrani 8: DNA
Highlight
Copy
Compare
Share
Want to have your highlights saved across all your devices? Sign up or sign in
