Ibrani 12
12
Inendainggen Allah oba panggot diluk inobakanini kambuk yiluk dogowagaluk inasuk wakike wene
1It akoni alebagik kagarik waguka mende inabok yilik wago eti, inebe dogalegat nineragalilungge dagakogo inilenggen laknisek werek eti paga, ta ae aʼbusuk ta ae aʼbusuk luwogoluk yi mende ndi mende inoba anggin mende nonggorlogo togot diyalok liligogi eti kak, nit ninoba anggin weyak yirluk-marlukogo werek mende eti inom, ninobabut weyak kagarigogi mende ninoba denggelek mondok werek mende eti inom, taʼbokogonat nonggorlogo togot diyalok, Allah nen,
“Kurli eti kurli lano,” yiluk yoknisasike eti ninakla nen,
“Ninelokoma mbiyokogo kurli eti pagaat luwok,” yiluk ninobatnerogo lago doguwok o. 2Esigit diluk lago dogolik, ebe-alep ninendainggen Yesus oba panggot diluk dogowagaluk, at nenat ninakla nggagalkik, kurli ilugun oba pano ʼbogokogo mondok asi lowagaluk, at nenat ninanggorlem welagik, kagarigogo eti paga, arat nit ninilenggen nen wolok mutluk lago doguwok o. At akla nen,
“Inebe o paga mendiyalok inenggarli warogo inarigogi eti kak, an esigit diluk watlasu nenggarli,” yiluk ambigidek,
“An yabunggane nakla arlenggen kigin,” yiluk at ebe wako nggorlek obakanini kambuk yiluk welagikesik nen, yabunggane iluk agikesik yogondak Allah nggok dogoligogoma etoma eragalilu inggi ebengge nggogat werek o. 3Kit kinakla mbuk atluk kinobatne dek asunogo yiluk, it akoni weyak kagarigogi mende nen at Yesus inakla nen kai diluk, ebe weyagat disi nggorlek togot diyalok obakanini kambuk yiluk welagike eti, kit nen,
“At ninggit diluk kagakike nogo,” yiluk kinakla nen didisi dogono o. 4Kirat, weyak kagasu kinaʼit nen, wim inobatnerogo abigogi eti kak kagakonem, awan kinamep wulabogo kinakidek mende werek o. 5-6Inombaelak nen inaʼburi elege inasuk warigogi eti kak, kit Allah aʼburi mende, at nen kinasuk warigogo mende eti obarlikmat degesip werek a? At nen yisi dogolik,
“Akoni an nendainggen kunik mende inebe dombok inasuk wakik, it an naʼburi mende yiluk ʼbukakogo yiligogo mende inebe dombok ndugi inakik, an nen kagarigogo eti paga, naʼbut o. Kat nen,
Nombae Endaganggok Allah nen nasuk wake, yiluk kakla nen mbugut diyalok togot diyagup o. An nen,
Weyak kagaken, yiluk yokogo kalok, kakla mbuk agidek dogono,” (Ams. 3:11-12; Ayb. 5:17)
yiluk yisikemo kolal mbalogo ʼbisuka. 7It elege inombaelak nen inasuk wakidek amberek dogoligogi nogo? Inasuk warigogiat eti paga, Allah nen kinasuk wakonem, kit nen,
“Nit at aʼburi werek eti paga ninasuk wake,” yiluk kinobabut kwalogo dogono o. 8Elege inebe taʼbokogonat inasuk warigogi arlek, eti kak, kit amberek kinasuk wakidek kalok, kit at aʼburi ebeat mende ʼbuk. At te, yugunat nen endago mende o. 9Nen, nit ninombaelak ninebe endak ninakuka mende nen ninasuk wakonem, inane kologo inalon palogo kagako lago eti kak, niniluk dogowagaluk ninombae nen ninakla ngget endak ninabigogo mende ane kologo alon palogo kagasusak dek nogo? At ane kologo kagasusagat o. 10It nen,
“Pano kagasusak mende yi kigi,” yiluk elalma ake we ʼbugurlagat ninasuk wako lagaka mendeat, ninombae Allah at, at weyak kagakidek nggaʼberek werek eti kak, nit ninom esigit dilugat nggaʼberek dogowagaluk ninasuk warigogo. 11Ninasuk wako nggorlek etaat ninakla pano arigogo dek. Ninakla weyak arigogo mende, yabunggane ninasuk warigogo eti paga, ninasuk warek dogoligogi mende dombok, yi mende ndi mende enggen yirigogo eti kak, ninobabut pano enago dogolik motogonat kagako dogogun o.
Inakla eberek dogolik kagako dogowagaluk yogisasuka wene
12Eti paga, kininggi obatne dek mende obatne digik, kinindibagal dik-dik yiligogo mende kambugut digik, kagatno o. 13Esigit diluk, kiniyok abel mirlalek mende yabunggane weyak agidek pano asuwagaluk, kolak mot enago pano yagoma noko dogono o. (Ams. 4:26; Yes. 35:3)
14Kit kinebe nggarelogo Allah mende ʼbiyigidek dogogun kalok, at ebe kinilenggen kugun mondok dek eti paga, akoni taʼbokogonat kinom pano dambulik dogolik, kinebe at ake ʼbiyalok weyak kagakidek pano nggaʼberek mondok doguwogoluk kinobatnerogo kagako dogono o. 15Akoni kit mende amberek Allah obabut pano nen woknisaligogo mende eti, togot diyalok dukisinem, o engga arle werek mende dabulatluk nen, pano mende arle diligogo kak, ap eti nen akoni taʼbokogonat weyagarinabunogo yiluk kinilenggen panorogo dogono o. 16At Esau kimbiri abu nen, men yisike,
“Mangguya endago anatma, an inde asigin mende eti nggogat dek. Nagot inde asuwak,” yiluk kimbiri piring omanggiat ndemerek mende pasik, at agot oba onggo waganggike eti kak, kit amberek kumi yogot paʼbiyigik, wene ebeat mende nggogot digidek kinakla mbuk agik, kagako dogogup o. 17At Esau kagakike eti kit kinilu o. At akla nen,
“Nombae nen yoknoko dogolik,
Allah nen panot kako dogowak o, yiluk yoknisuwak,” yiluk yabunggane yogosuwagaluk, de ako dogolik nggino yogokike mende, agot arat yogokikesikmo nogo nen, yabunggane suguluk waganusak erlok dek agike.
18Alebat it akoni Israel mende ndom Sinai ininggi erlok pakausak mende paga waguka kak, kit ndom eti kak mende paga wagidek. Ndom Sinai eti paga yigit diluk kagakonem waguka. Kindu amulok dagigik, o sebe yiluk ki agik, kwiyakne obatnerogo pulka wagik, 19-20ane pinggon ane negen nggokogo yigik, yisinem Allah ane nggokogo yisi dogolik, wene yigit diluk yisike,
“Akoni inom, domba sapi inom, ndom yi ininggi paka wago kalok, inebe nggit oba min mondok inatno o,” (Kel. 19:12-13)
yiluk inasuk wakonem kolkukasik, inasuk kolek dogusak mondok erlok dek agikemo, it nen,
“At ane eti yabunggane omanggi inom yoknisausak dek o,” yiluk inane obatnerogo yogokuka. 21Mondok inayuk mende inilenggen kasukasik inane obatnerogo esigit diluk Musa yogokukama, at nen, men yogisasike,
“An oke, nayuk nen nowak del kiligogoat o,” (Ul. 9:19)
yiluk yogisasike.
22It eti kak mende paga waguka mende, kirat, ndom Sion Allah iluk werek mende ago unggul o kota Yerusalem mbogot oba mende paga wagap o. Etoma malaikat dogalek mondogat inom, 23Allah aʼburi mangguya mende inendaga mbogot oba kolal mbalek werek mende nandorlek inakla arlenggen kasi werekma, it akoni pano kagako lagukama Allah nen ʼbogokogo panorinakike mende inagurengge inom, Allah ebe, akoni taʼbokogonat wene inoba ʼbigik, nggokik, kagarigogo mende etnogo inom werekma oba wagap o. 24Yogondak Allah nen nit ninom kunuwogoluk wene ngget mende warogo wokninakikesik, Yesus ebe woknisasikemo kurli paga werek eti inom werekma wagap o. At Habel ewe nen wakikemo amep wene weyak mende kagat lagike mende eti oba wagap ʼbuk. Yesus ebe wakukama amep warogo pano wene kagat lagike mende oba wagap o.
25It akoni Allah wene agat oba yogisasinem inasuk kolusak inaʼit welaguka mende, inebe iniluk togot digidek inako lagike o. Eti paga, nit yi men, wene mbogot oba nen yoknisasinem ninasuk kolusak ninaʼit dogogun kalok, ninakidek togot dinanigin ambegep a? Dek o. Mondok ninasigin eti paga, at ane yisi nggorlek kolkidek,
“Ninaʼit,” yiluk togot diyaunogo yiluk, kinobabut kwalogo dogono o. 26Etinem, at Allah wene yisike eti paga agat aborlogot kasike mende, yogondak, at nen,
“An yabunggane yigit diluk kagasigin,” yiluk abok yisike mende kolal yigit diluk mbalek werek,
“An yabunggane omanggi pasigat agat yi arlek aborlogot kagin ʼbuk. Dek o. Mbogot inomat aborlogot kagin o,” (Hag. 2:6 = TB 2:7)
yiluk yisikemo kolal mbalek werek. 27Esigit diluk
“Omanggi pasigat aborlogot kagin,” yiluk yisike eti aborlok yusak dek aʼbet mende dogowagaluk togot diluk, mbogot agat at nen winamet disike mende taʼbokogonat aborlogot kagin yiluk yisike o. 28-29Esigit diluk aborlogot kagin mende, nirat Allah apma ʼbiyiligogoma aborlok yigin mondok dek mende woknisasikemo inde agosik werek eti paga,
“Allah nombae,” yiluk keyagi wako doguwok o. Nen, at Allah ebe, yi mende ndi mende kindu nen niligogo eti kagatma, nit esigit diluk weyagat ninabunogo yiluk, at ebe ninayukogo kagakik, alon palogo kagakik, kagako dogolik, at ane kologo akla warlok mende kagako dogolik, pogorako doguwok o. (Ul. 4:24)
Currently Selected:
Ibrani 12: DNA
Highlight
Copy
Compare
Share
Want to have your highlights saved across all your devices? Sign up or sign in
