Ibrani 1
1
At Allah nen wene at aʼbut yogokikemo, at nen nit yoknisasike wene
1O paganeat, at Allah nen it ap at ane yogisasi laguka mende yomenogo inggi kibitngge-yogongge, at omanggi yogokik, at omanggi yogokik, wene arlikendek dombogat yogisasinem, it nen nit ninakomba ninagona lak yanggul isasi laguka. 2Mende, o ilugun oba, nit yogondak werek ya paga, Allah nen wene aʼbut yogokikemo, at nen nit yanggul nisa wagike. At aʼbut eti erloma Allah nen yi mende ndi mende taʼbokogonat winamet diyasike eti, ebe at aʼbut nenat winamet diyasikemo, indewerek dogowagaluk mendisikemo dogogin o. 3Mulinggi nderlelek-werlelekogo laʼbi wirigogo kak, Allah ebe pogorarigogo mende eti nen, Yesus ebe laʼbi wagikemo agat oba liyarogo dogolik, ombae alinoat werek o. Esigit diluk dogolik, yi mende ndi mende taʼbokogonat werek eti, at ane obatne paga werek. Werekma, nit weyak kagako lagagu mende arat korogo deget disikesik nen, Allah Endaganggok, nggok mende etnogo oba dagisikesik inggi ebengge nggogat werek o.
Malaikat erlok dek negen mendeat, Allah aʼbut arligat nggok mondok werek wene
4At Allah nen, it malaikat yomenogo inendaga wema paga negen werek nggorlek, at Yesus arligat, Endaganggok, nggok siyakogo dogowagaluk sal disike kagat, it malaikat inebe wema paga negen werek nggorlek, Yesus ebe Endaganggok siyakogo werek o. 5Allah nen at yogoko dogolik,
“Kat an naʼburat o. Kebe yogondak endak kaki,” (Mzm. 2:7; 1Taw. 17:13)
yiluk yogokike eti kak, it malaikat mende omanggi wene esigit diluk yogisasike nogo? Dek o. Nen omanggi,
“An, at ombae asigin. Nen, at an naʼbut asuwak o,” (2Sam. 7:14)
yiluk, it malaikat amberek yogisasike nogo? Degat o. 6Eti paga, at Allah nen aʼbut omanggiat endago agat oba yoma wusa ʼbi wagike etinem, it malaikat yigit diluk yogisasike,
“Kit an nagoromi malaikat taʼbokogonat, at arligat oba panggoksek dogolik pogorako dogono o,” (Ul. 32:43; Mzm. 97:7)
yiluk yogisasike. 7Nen omanggi, it malaikat pasik men yisike,
“An nen it malaikat inebe o kwiyakne negen kagarogo ʼbiyigik, it yonggo laʼbiyiligogo mende inebe kindu amulok negen kagarogo ʼbiyigik, kagarigogo,” (Mzm. 104:4)
yiluk yisike. 8Mende, aʼbut yogoko dogolik,
“Kat kebe Allah at dogolik, yi akoni ndi akoni pagisek mondok dogogin o. Kat nggok esigit dilugat dogolik, wene motogonat moret diyasi dogogin o.
9Nen, kat kobabut, motogo arlek kagarigogon eti mende kagako dogolik, nggorlo kagako dogusak kaʼit mondok eti paga, kagarlagi kinom dogoligogi mende inapma negen werek nggorlek, karligat kunggul oba ambusu ndiyalogo an kombae nen mendagasigi eti paga, kakla arlenggen mondok kasi dogono o,” (Mzm. 45:6-7 = TB 45:7-8)
yiluk yogokikesik, 10wene omanggi yigit diluk yogokikeat,
“Kat kendaga nggogatma erlo paga nen, agat yi erlo walkigik, mbogot kinggi paga walkigik, kagakigin o.
11Taʼbokogonat winamet disigin mende eti su negen momok atluk yabunggane dek asigin mende, kat karligat kikok mondok dogogin o.
12Mbogot agat yi, su dinggilogo ʼbiligogi eti kak, kat nen dinggilogo ʼbiluk, yabunggane ngget mende ʼbigin mende, kat kebeat yi tahun ndi tahun kagat lago nggorlek, kebe karlongga agidek kikok mondok dogogin o,” (Mzm. 102:25-27)
yiluk yogokike. 13Esigit diluk yogokikesik nen, omanggi men yogokikeat,
“Akoni kat kasili mende yomenogo kiyok nen al debelogo ʼbiyanok nen yiluk, an nen ʼbiya wagidek werek nggorlek, kat kebe nggok an neragalilu ninggi ebengge dogon o,” (Mzm. 110:1)
yiluk, it malaikat mende yomenogo omanggi yogokike nogo? Dek o. 14Allah agoromi malaikat eti inebe, ninggit diluk kagarigogi mende nogo? It inebe inagurengge kagatma, nit Allah nen ndil ninabigin mende yamak niyasi dogowagaluk, at nen inayonggo ʼbiluk laʼbiya wirigogo mende o.
Currently Selected:
Ibrani 1: DNA
Highlight
Copy
Compare
Share
Want to have your highlights saved across all your devices? Sign up or sign in
