Galatia 6
6
Kit-kit yamak-yamak kagako dogono,” yiluk yogisasike wene
1Nagarlagi nirugi o. Akoni omanggi weyak kagakonem kinilenggen kegep kalok, at eti suguluk obabut kwalasuwagaluk, kit Allah Agurengge eberogonat kinakla werek mende nen kinane erogat asuk watno. Asuk esigit diluk wakonem, kit esigit dilugat kinoba asunogo yiluk, kinenggaerek kinobabut kwalogo dogono o. 2Kit-kit kinoba anggin mende werek kalok, kinebe dombok omanggi nen omanggi yamak kigik yamak-yamak kagako dogono o. Esigit diluk kagako dogogun eti paga, wene Kristus nen ninasuk warogo yanggul nisasike wene etnogoat motogo kagako dogogun o. 3Mende, kat omanggi kendaga dek dogoligat,
“An nggok,” yiluk, kakla nen ambaligogon kalok, kenggaerek nen nuket dakaligogon o. 4-5Kinebe dombok kinenggaerek nen,
“An pano kagarigogo a? Weyak kagarigogo a,” yiluk, kinaren mbalalok nen,
“Pano kagarigogo,” yiluk ambegep kalok, erlok pogorakausagat o. Esigit diluk mende, nit kagako lago mende eti ninenggaerek ninoba dombok nenat yusak eti paga,
“It amberek kagarigogi eti weyak. Nen, an kagarigogoat pano,” yiluk yusak, dek o. 6Nen, at omanggi nen pano wene yanggul kisasinem, kit kinasuk koligogi mende nen kinamende pano mende eti wogoko dogono. 7At Allah aik dagok yogosusak nogo? Mondok dek o. Mende,
“Esigit diluk yogosusak erlogat,” yiluk ambagun kalok, kinenggaerek nen nuket dakagun o. Akoni nen yi mende ndi mende ai yarigogi mende, enggen eti mendeat korle agonem, ebe mbaligogi eti kak, 8at ta nen obabut ikogat dogolik kagarigogo kalok, obabut eti pagaat elamat lasigin o. Mende, at omanggi ta nen, Allah Agurengge imbisak kunik dogolik, at mende kagarigogo mende kalok, Allah Agurengge eti nenat, iluk mondok dogowagaluk panot digin o. 9Eti paga, ninobatne dek agidek pano mende kagako dogogun kalok, yi mende ndi mende yaʼbiluk pano asi lagonem, ebe mbaligogi kak, yabunggane ilugun oba ebe pano mende korlagun eti paga, ninaʼit agidegat kagako doguwok o. 10Eti paga, nit o yogondak pano mende kagasusak erlok werek ya paga, akoni inebe taʼbokogonat yamagiyasi dogoligat, nggok negen, ninagarlagi ninirugi inendainggen Kristus oba panggoksek werek mende panorogo yamagiyasi doguwok o.
Wene ilugun oba inasuk wakik, keyagi warinakik, yisike wene
11Yogondak an nenggaerek ninggi nenat kolal nggokndek mende mbalogo kinoba laʼbi wagi eti kinilenggen enggagat kano! 12It akoni amberek nen,
“Kinowado kinenggarlimo mende mbalini o,” yiluk, inobatnerogo yokisiligogi mende, it akoni amberek nen inilenggen iyalok,
“Pano kagarigogi,” yiluk ambawagaluk kagarigogi o. Yesus ebe o paga mendiluk wakuka wene etnogo yogisasinem, akoni Yahudi mende nen weyagarinabunogo yiluk, wene ninat mende inobatnerogo yokisiligogi o. 13It eti wene Allah nen ninasuk wakike wene etnogo panorogo kolek welagidegat, inenggaerek inowado esigit diluk mbalasi dogolik,
“Kit esigit dilugat mbalani o,” yiluk inenggaerek nen pogorakasi doguwogoluk yiligogi o. 14Mende, an yi pasik ndi pasik pogorakausak mondok naʼit o. Ninewe Endaganggok Yesus Kristus o paga mendiluk wakuka mende etnogo pasigat pogorakamo, erlok. At ebe wakuka eti paga, akoni agat oba inobabut inikogat dogolik kagarigogi mende eti, arat obatne deget diyasike ambigi. Eti paga, akoni watlatluk, yi mende ndi mende kagasusak obarlikma arigogo kak, akoni inobabut inikogat dogolik kagarigogi mende etnogo obarlikmat disigi o. 15Ninowado ninenggarlimo mende mbalugun eti paga inom, mbalkidek eti paga inom, ebe eti mende nggok ʼbuk. At te, Allah nen ninebe ngget mende kagat ninabigogo etiat nggogat o. 16An wene kinasuk warogo yokisigi mende yi, motogo kagako dogogun mende, Allah nen,
“An naʼburi Israel mendeat o,” yiluk, at nenat kinendainggen kambugut dinagagik, kinebe kinaʼbuwa kigik, kagako dogowak o. 17Yabunggane an Yesus anduwanengge yiluk an noba nagalumo noʼbam enggagat werek eti paga, it amberek nen an nakla wiyik-weyak kogo kagat nabusak dek o. Mondok naʼit. 18Nagarlagi nirugi o. Ninewe Endaganggok Yesus Kristus obabut pano etnogo nen kinendainggenma dogolik eberogonat kinanggorlem dogowak yu kak,
“Amin,” yigi o.
Currently Selected:
Galatia 6: DNA
Highlight
Copy
Compare
Share
Want to have your highlights saved across all your devices? Sign up or sign in
