Efesus 6
6
Elege inagoya inombae inom dogolik inobabut kagako dogusak wene
1Kit elege kinobabut, ninewe Endaganggok kinom kunik dogolik, kinagoya kinombae, inane kologo kagako dogusak eti paga, esigit dilugat kagako dogono o. 2Wene Allah nen ninasuk wakike etnogo paga, wene alebagik ninasuk wako dogolik,
“Kit nen yigit diluk kagasusak, ndigit diluk kagasusak,” yiluk yisi dogolik,
“Esigit diluk kagako dogumo panot kinabigin,” yiluk, alebagik abok omanggi inom yiluk dek. Mendeat
“Kinagoya kinombae inalon palko dogono o,” (Kel. 20:12; Ul. 5:16)
yiluk yisikesik nen, 3abok men yogisasike,
“Esigit diluk kagako dogumo, kinebe pano agik, agat oba yoma kiniluk omanggi inompogo welagik, dogogun o,” yiluk, yogisasike etiat o. 4Nen, kit inombaelak nen, yi mende ndi mende kinaʼburi inanini asusak mende omanggi kagakup o. At te, ninewe Endaganggok nen ninasuk wakik, ninendainggen sebelkik, kagarigogo kak, kit nen kinaʼburi esigit dilugat kagarogo inebe nggogorinako dogono o.
Inanduwanengge mende inombaelak inom nen, inobabut kagako dogusak wene
5Kit akoni inanduwanengge mende nen, Kristus ane kologo kinendainggen omanggiat kinayukogo dogolik kagarigogi kak, kinombaelak nggokndek inane kologo inalon palogo kagarinako dogono o. 6It nen kinanggorlem werek kalogat, akoni mende inakla panorogo kagako dogogup. At te, kinakla nen,
“Kristus anduwanengge dogolik, Allah akla warlok ambaligogo mende etiat kagako doguwok nen,” yiluk, kinakla ebet diluk nen kagako dogono o. 7Kinakla nen,
“An akoni mende inapma werek ʼbuk. At te, ninewe Endaganggok apma werek,” yiluk, kinakla arlenggen togo kagako dogono o. 8Kinobabut pano kagako dogogun kalok, ninewe Endaganggok nen, kit inanduwanengge mende, kinasokneat werek mende kinomat, kinebe dombok onggo wokisagin o.
9Nen, kit inombaelak nggokndek nen, kinanduwanengge mende inake, esigit dilugat kagako dogono o.
“Kasigin,” yiluk mbak-mbagat kasi dogogup. Kinakla nen,
“An nanduwanengge mende ninomat, ninewe Endaganggok mbogot oba werek mende etnogo nen, nit pasik,
At eti nggok. Nen, at eti nggembu, yiluk, yiligogo dek. Ninom ndak-ndagat kagat ninabigogo,” yiluk, kinakla eberek dogono o.
At Iblis ninom wim ako doguwok nen yiluk yi mende ndi mende, ninowado labesusak wene
10Ilugun oba wene yi yokisak. Ninewe Endaganggok kinom kunik dogolik, at obatne mondok werek etnogo paga, kinobatne kagat latluk dogono o. 11At Iblis obabut nggauk mende etnogo nen weyagat kinabigiluk wagonem, wim abuwogoluk sin yirigogi kak, kit kinebe mendegat doguwogoluk, at Allah nen yi mende ndi mende woknisiligogo mende eti taʼbokogonat kinowado laberogo dogono o. 12Nit wim negen abigogi eti akoni mende ninom abigogi ʼbuk. Dek o. At te, nggok mende, inane werek mende, o amummo agat oba yoma pagisek dogoligogi mende, kugi inobabut weyak mende mbogot oba kogolnggerlek agat oba kogolnggerlek werekma ninom abigogi o. 13Eti paga, weyak mende nen weyagat kinabi wagonem wim kinilkawak aʼbet weyak mendegat dogoluk, arat abiluk nen mendek doguwogoluk, sin yirigogi kak, Allah nen yi mende ndi mende woknisiligogo eti mende yitno.
14Wim kinom abubagik nen yiʼbiluk mendek dogusak eti, ebe yi. Serlok yisu kak, wene ebe wene etiat yikik, kinamik owak oba yisu kak, Allah akla warlok mende arlek kagarigogi eti mende yikik, 15kiniyok sepatu yisu kak, Allah nen ninebe dambukogo ʼbinanigogo, yiluk pano wene eti wolok luwogoluk, inobabut,
“E o. An ligin,” yiluk yiligogi eti mende yikik, yitno. 16Marle yamburiyasinem mbiyokogo lowagaluk, o taʼbelek ininggimo wolok liligogi kak, kinendainggen Allah oba panggot diluk werek eti mende kibitngge-yogonggeat wolok noko dogono o. Wolok lagonem, Iblis obabut weyak mende etnogo nen kindu marle ilugun oba kunogo yambukiyasinem kinendainggen Allah oba panggot diluk dogogun eti paga erlok nagulko dogusagat o. 17Inunggulowakma inasunogo yiluk, inunggulagiye aʼbet mende saligogi kak, Allah nen ndil ninabigogo eti mendeat waganiluk salino. Esigit diluk sal diluk nen, wim abuwogoluk mbirok ininggimo wolok liligogi kak, Allah wene, Agurengge nen woknisiligogo eti mende wolok lago dogono o. 18Esigit diluk taʼbokogonat kagako dogolik, Allah nen yamakiyawagaluk sembayan yisi dogono o. At Agurengge kinakla dogolik kinakla nggagaligin kagat, kibitngge-yogongge sembayan Allah ayonggo ʼbigik, nggino yogokik, yisi mondogat dogono o. Esigit diluk yisi dogolik, kinakla mbuk agidek, kinobabut kwalek mondok dogono o. Esigit diluk dogolik, Allah aʼburi taʼbokogonat inake sembayan Allah ayonggo ʼbisi dogonoat o. 19Esigit diluk ayonggo ʼbisi dogolik, an nen pano wene Allah akla limago welagike mende eti, at nen yanggul noko nggorlek, nane ʼbukakogo yogisasi dogik nen, kit nen Allah ayonggo ʼbisi dogonoat o.
20Wene eti yogisasi dogowagaluk at Kristus nen nayonggo ʼbiluk laʼbani wagikemo an witluk yogisasi lagi eti pasik, ninggi kerle warogo ʼbanggama werek. Esigit diluk dogolik, an nayuk dekogo pano wene eti yogisasi dogusak ndak-ndagat yogisasi dogik nen, sembayan an nake yisi dogonoat o.
Wene ilugun oba arat keyagi warinakike wene
21Wene an nebe yoma werek mende inom, kagarigogo mende inom, kit kinilurogo, ninagarlak Tikikus aʼbuwa mende, ninewe Endaganggok pasik endainggen kumbukogo kagako werek mende etnogo nen wene taʼbokogonat yokisa wisigin o. 22Nit ya dogolik kagako lago mende kinilu atluk nen, kinendainggen sebelogo dogobagik nen, yiluk kinoba laʼbi wagi o. 23Ninombae Allah inom, ninewe Endaganggok Yesus Kristus inom, imbisak nenat, kit nagarlagi nirugi Allah aʼburi taʼbokogonat pano dambukogo ʼbinagagik, akoni inaʼbuwarogo werek mende eti wokisigik, inendainggen at oba panggot diluk werek mende eti inomat wokisigik, kagasuwak o. 24Kit kinewe Endaganggok Yesus Kristus nggolelogo togot digidegat kinendainggen kunik mondok dogogun mende taʼbokogonat, Allah obabut pano etnogo nen pakisek dogowak o.
Currently Selected:
Efesus 6: DNA
Highlight
Copy
Compare
Share
Want to have your highlights saved across all your devices? Sign up or sign in
