Kolose 1
1
Keyagi warinakike wene
1-2Kit Allah aʼburi o Kolose nandorligogi mende Kristus kinom kunik dogolik, at ake kinobabut dombokogo kagarigogi mende, nagarlagi nirugi o. An Paulus Allah akla ambasike paga, Kristus Yesus nen nayonggo ʼbiluk laʼbani wagikemo wagagi mende etnogo, ninagot Timotius nimbisak nen wene yi kolal mbalogo kinoba laʼbi wago o. Ninombae Allah obabut pano etnogo nen, pano mende wokisigik, kinendainggen kambugut dinagagik, kagako dogowak o.
It Allah aʼburi Kolose mende inobabut pano kagako laguka paga at Paulus nen Allah keyagi wakike wene
3-6It amberek nen,
“Kit mende pano mende Allah nen wokisagin mende mbogot oba ʼbinagakemo werek o,” yiluk yokisasukama, kinendainggen Kristus Yesus oba panggot diluk kagakonem, it amberek nen,
“It inendainggen Kristus oba panggot diluk Allah aʼburi amberek taʼbokogonat inaʼbuwarogo kagarigogi,” yiluk, kinabok yisinem ninasuk kolkosik nen, kibitngge-yogonggeat sembayan kit kinake yisi dogolik, ninewe Endaganggok Yesus Kristus ombae Allah etiat keyagi warigogi o. Kit wene pano wene, Allah obabut pano nen kagarinabigogo wene etnogo ebe-alep yokisa wagukama, kinasuk kolkigisip nen, eberogonat yiluk didisigip eti kurli, Allah nen panot kinabigogo kak, pano wene eti o yi ai ndi ai wikalarik lago dogolik, Allah nen akoni esigit dilugat pano kagarinabigogoat. 7Pano wene eti at Epafras ninagarlak ninendainggen kunik mende nen yanggul kisasinem yanggul kigip o. At ebe Allah anduwanengge nit ninom ndak-ndagat dogolik, Kristus nen ayonggo ʼbiluk laʼbi wagikemo, nit nen yokisau kak ninobalikmo kinom dombokogo dogolik yokisiligogo o. 8At ebe ninoba wagasik nen, men yeke,
“It inobabut, akoni inaʼbuwarogo dogoligogi eti mende, Allah Agurengge nen wogisasinem, akoni amberek inaʼbuwarogo kagarigogi o,” yiluk, kinabok dikogo yoknisa waga o.
9Kinabok esigit diluk yisinem ninasuk kolkosik, nit nen kit kinake sembayan yigik, Allah ayonggo ʼbigik, togot digidek yisi mondogat werek. Esigit diluk yisinem Allah Agurengge nen kinakla nggagalkonem, kinakla mondok nggagalogo wene didiluk nen, at Allah akla warlok ambaligogo mende eti, kit nen dikogo kinilurogo dogobagik nen yiluk ayonggo ʼbiligogiat o. 10Esigit diluk kinilu atluk nen, ninewe Endaganggok akla panorogo, at warlok ambaligogo mende motogonat kagako dogusak. Yi mende ndi mende ai yakonem erlo nggok atluk nen enggen pano yirigogo kak, kit Allah obabut kinilu ago dogolik, yi mende ndi mende pano mende kagako dogusak o. 11Ninombae Allah obatneyak pogorarigogi mende etnogo kinobatne kinakonem, kit kinobatnerogo mondok dogobagik nen yiluk ayonggo ʼbiligogoat. Kinobatne kinakonem, yi mende ndi mende anggin kinoba ago nggorlek, kinakla mbuk agidek, kinobakanini kambuk yiluk dogolik, kinakla arlenggen kigik, 12ninombae Allah keyagi wakik, kagako dogusak. At ninombae nen, aʼburi amberek kinomat liya paga kinaiwerek erlok dogowagaluk kagat kinakikemo werek eti paga, arat keyagi wako dogusak. 13Nit alep o amummo weyak mende nen apma kerle warogo paknisek werekma, Allah nen kerle piyalogo wokninakikesik nen, aʼbut endainggen kunik mende etnogo paknisek dogowagaluk apma ʼbinanggemo werek. 14Allah nen kerle piyalogo ndil ninakike eti ebe, at aʼbut nenat kerle piyalogo ndil ninakikesik, yi weyak ndi weyak kagako lagagu mende eti arat korogo deget diyasike.
“Ebe nggok Kristus at,” yiluk yogisasike wene
15-16Allah ebe ninilenggen kiligogi dek mende, ebe alino elokonggen ndak-ndak negen, Yesus ebe etiat o. At Allah nen, yi mende ndi mende, mbogot oba mende inom, agat oba mende inom, ninilenggen kiligogi mende inom, kiligogi dek mende inom, winamet diyasike. Ninilenggen kiligogi dek mende omanggi, malaikat inobatnerogo dogolik inapma pagisek werekma inane kologo dogoligogi mende etiat. Allah nen esigit diluk taʼbokogonat winamet diyasike eti ebe, at Kristus nen, at enggaerek akeat winamet diyasike eti paga, yi mende ndi mende taʼbokogonat eti eragalilungge negen werek nggorlek, nggok mondok, Allah aʼbut mangguya mende Kristus etiat o. 17At Allah ebe yi mende ndi mende awan walkigidek werek nggorlek welagikesik nen, yogondak yi mende ndi mende obalikmo dombok werek eti, at nenat pago werekma pano werek o. 18Nit Allah aʼburi ninewe nggok at Kristus dogolik, ninilugut ninabigogo eti paga, at ebe inggi iyok negen werek. Yi mende ndi mende eragalilungge negen werek nggorlek, at Allah nen,
“Nggok, an naʼbut mangguya mendeat dogowak o,” yiluk, at ebe watlagikesikmo nen ilugut disike o. 19At Allah nen,
“An nakla warlok ebe, an nobabut nikok mondok werek eti kak, an naʼbut esigit dilugat nimbisak ndak-ndak mondogat dogowak o,” yiluk, akla ambasike ndak-ndagat werek o. 20Yi mende ndi mende agat oba mende inom, mbogot oba mende inom, taʼbokogonat Allah inom weyak agukasik, wim mbalek negen werekma, at Allah enggaerek inom dambulogo ʼbiyasike eti ebe, Yesus o paga mendiluk wakukama amep wulabogo watlagike eti paga dambulogo ʼbiyasike o.
21Alebagik, kit kinakla weyak wene ebeko dogolik, kinobabut weyak kagako lagagip eti paga, Allah kinom walegat dogolik wim mbalek negen welagagip. 22Esigit diluk mendeat, kit kinebe at Allah enggaerek ake ʼbakalok, at il oba wene kinoba dekogo pano nggaʼberek dogowagaluk, aʼbut ebe watlagike eti paga, enggaerek kinom dambulogo ʼbinagisikemo werek o. 23Eti paga, pano wene kinasuk kolkigisip kinakla nen,
“Yabunggane pano asigin,” yiluk, ambasigip mende eti kinendainggen aborlok yiluk nggobokogo togot digidek kinobatnerogonat pago dogono o. Pano wene eti at nen yi ai ndi ai akoni inebe taʼbokogonat yogisasike wene eti yogisilik noko dogowagaluk, an Paulus nayonggo ʼbisike o.
Paulus nen Allah aʼburi inake kagako lagike wene
24An yogondak ya, at Kristus nen,
“Allah aʼburi taʼbokogonat an nebeat o,” yiluk nit ninake yi aik ndi aik kasi lagikesik watlagike eti omanggi kigidek mende obalikmo, an nebe kit pasik yi aik ndi aik kagat nabigogi eti paga nakla arlenggen kiligogo o. 25An, Allah nen, kit kinake, at aʼburi mende taʼbokogonat inanduwanengge dogowagaluk nayonggo ʼbisikemo, wene Allah nen yisike wene eti taʼbokogonat yogisilik noko dogusak mendeat, yogisilik liligogo o. 26Wene eti o muk paganeat erloma nen yi tahun ndi tahun kagat lago dogolik, akoni endak larik wago nggorlek, Allah nen akoni yogisigidek akla limago welagike. Mende, yogondak nit at aʼburi mende kalok, selekma ʼbukakogo yoknisasike o. 27At Allah akla nen, it akoni sikmangge mende taʼbokogonat pano mondok kagarinabigin wene eti nggokogo pogorasusak mendeat ambasikesik nen akla limago welagike mende, at aʼburi kalok selekma ʼbukakogo yogisagaluk yisike. Wene eti ebe, Kristus kit kinakla werek kalok, yabunggane panot kinakonem pogot kinabugunat o. 28Eti paga, nit nen, wene Kristus abok eti ʼbukakogo akoni taʼbokogonat inebe dombok yogisilik liligogi. Esigit diluk yogisilik liligogi eti paga, inebe dombok Kristus inom kunik dogolik, inendainggen korle atlukmo, Allah oba wogisek wisuwogoluk, ninakla nggagalek mondok dogolik, inasuk wakik, wene yanggul isigik, kagarik liligogi o. 29An wene eti pasik ʼbogokogo kagasigiluk, at Kristus obatne etnogo an nakla dogolik nobatnet nako nggorlek, nobatnerogonat kagako mondok werek o.
Currently Selected:
Kolose 1: DNA
Highlight
Copy
Compare
Share
Want to have your highlights saved across all your devices? Sign up or sign in
