La’biyaske 6
6
Ap inebe 7 paga Allah aʼburi amberek yamagiyasi dogowagaluk mendiyasuka wene
1Etinem, akoni Yesus ane wagangguka mende inebe dogalegat kagat lagukama, it akoni inebe Yahudi mendeat ogwe, inane Yunani mende nen men yisuka,
“Akoni yi mende ndi mende kibitngge-yogonggeat sumburisasi dogolik, kumi soge nit mende kalok nggolelogo togot diyiligogi eti nenaluk,” yiluk, it Yahudi inaiwerek mende inom wenemuk ako laguka. 2Wenemuk esigit diluk ako lagukama, it ap inebe 12 Yesus nen inayonggo ʼbiluk laʼbiyasike mende yomenogo nen, akoni Yesus wene wagangguka mende inebe taʼbokogonat nandorluwagaluk waisasuka. Waisasukasik wagukama, inebe omanggimo nandot diluk dogolik, it nen men yogisasuka,
“Nit Allah wene yanggul isasi lago eti, togot diyalok, yi mende ndi mende sumburisasi dogusak weyak o. 3Eti paga, kit nen, ap amberek Allah Agurengge inakla nggerlekogo dogolik, inendainggen mondok nggagalek kagakonem, inaren enggak iyasi lagap mende kalok, inebe 7 paga kweyaginabini o. Kweyaginakep kalok, it nen yi mende ndi mende esigit diluk sumburisasi dogowagaluk, nit nen mendiyagun o. 4Mendiyamo, it esigit diluk kagako nggorlek, nit nen sembayan yigik, wene ebe wene etiat yogisigik, kagako dogogun,” yiluk yogisasuka.
5Wene esigit diluk yisi lagukama, it akoni Allah aʼburi yomenogo inebe taʼbokogonat nen,
“Esigit diluk yegep eti pano,” yiluk yisukasik inebe kweyagogo ʼbiyasuka. Esigit diluk ʼbiyasuka eti ap omanggi Stefanus, endainggen Allah oba panggot diluk mondok werekma Allah Agurengge akla nggerlekogo welagike mende inom, Filipus inom, Prokorus inom, Nikanor inom, Timon inom, Parmenas inom, Nikolaus o Antiokia mende Allah wene waganggikesik, Yahudi mende salek kagat lagike mende eti inom, 6inebe 7 eta kweyago ʼbiyalok, it ap Yesus nen inayonggo ʼbiluk laʼbiyasike mende yomenogo inoba ʼbiya waguka. ʼBiya wagukama, it nen ininggi inunggulowak sebelogo sembayan yisuka. 7Esigit diluk kagako lagukama, Allah wene nggok ago dogolik, akoni o Yerusalem mende Yesus wene wagangguka mende inebe dogalegat kagat laguka. Esigit diluk kagat lagonem, it ap Allah indewerek mende yomenogo inebe mondok dogalegat nen, wene eti waganggukasik inendainggen Yesus oba panggot disuka.
Wene Stefanus oba ʼbisuka wene
8At Allah obabut pano nen wogisiligogo mende etnogo, Stefanus nggokogo wogokikemo obatne nggogat welagike. Dogolik akoni nen wene diduwagaluk kagasusak dek mende nggokogo elalinat kagarinako lagike. 9Kagarinako lagikemo, it ap Yahudi mende o Kirene mende inom, Aleksandria mende inom, inebe akoni amberek inanduwanengge welagukasik yabunggane inasokne agukasik sembayan omanggimo yisi laguka mende inom, it Yahudi mende amberek o propinsi Kilikia mende inom, Asia mende inom nen, at Stefanus ane yisinem, melagukasik nen, endema kinok-kanokogo waganggukasik wenemuk mberekuka. 10Esigit diluk mberekuka mendeat, at Stefanus Allah Agurengge akla unggiluk dogolik, wene morat nggagukogo yisinem, it inane onggo ninggit diluk yogosuʼbugat kagat lagike. 11Onggo ninggit diluk yogosuʼbugat kagat lagikemo, it nen, ap amberek nen wene at oba ʼbuwagaluk inakla nggagalkuka. Inakla nggagalko dogolik,
“Kit nen men yino. At yi nen Musa abok weyak mbalkik, Allah abok weyak mbalkik, yisinem, nit ninasuk kolko, yino,” yiluk inakla nggagalkuka. 12Esigit diluk inakla nggagalkukama, it nen akoni amberek inakla nggagalkik, ap inarluwendek yomenogo inakla nggagalkik, ap Allah wene kolal mbalek inilu mende yomenogo inakla nggagalkik, kagakukama, it taʼbokogonat melagukasik, at Stefanus ebe pagogo, it ap wene erlo mbileligogo mende yomenogo inoba wolok laguka. 13Wolok lagukasik nen, ap amberek nen inenggalat wene Stefanus oba ʼbuwagaluk mendiyasuka. Mendiyasukama, it nen yisi dogolik,
“Ap yi nen Allah enggaerek ago palek yi abok weyak mbalkik, wene Allah nen ninasuk wakike wene etnogo abok weyak mbalkik, togot digidek yisi mondogat dogoligogo mende o. 14Nen, at nen yiligogo omanggi
Yesus ago Nazaret mende etnogo nen, Allah ago palek yi miyalogo ʼbiluk, wene at Musa nen ninakombalak yanggul isasikemo, nit kagako lago mende etnogo, yabunggane ninggalogat kagasigin o, yiluk yisinem ninasuk kolko o, yiluk yisuka. 15Esigit diluk yisi lagukama, it ap wene erlo mbilelko laguka mende yomenogo inebe taʼbokogonat inom korek dogolik, inilenggen at Stefanus oba ʼbirogo dogosinem at elokonggen malaikat Allah nen yonggo wusa ʼbiya wirigogo mende yomenogo inelokonggen salek kagat lagikemo inilenggen lakasuka.
Currently Selected:
La’biyaske 6: DNA
Highlight
Share
Compare
Copy
Want to have your highlights saved across all your devices? Sign up or sign in
