2Petrus 1
1
Keyagi warinakike wene
1Nagarlagi nirugi o. An Simon Petrus Yesus Kristus nen, at anduwanengge dogowagaluk nayonggo ʼbiluk laʼbani wagikemo wagagi, etnogo nen wene yi kolal mbalogo kinoba laʼbi wagi o. At Kristus eti ebe Allah at dogolik, obabut motogonat kagarigogo etnogo nen, kit ninom ndak-ndagat ninendainggen at oba panggot disinem, ndil ninabigogo o. 2Kit nen Allah inom, ninewe Endaganggok Yesus inom, imbisak inebe dikogo kiniluat welagap eti paga, it inobabut pano etnogo nen pano mende wokisigik, kinendainggen kambugut dinagagik, nggokogo kagako mondogat dogowak o.
“Nit ninombae Allah nen mik ninakikesik ninayonggo ʼbisike,” yiluk yogisasike wene
3At Allah ikok mondogat dogolik, yi mende ndi mende elalinat kagakonem pogorako mondok werek mende etnogo nen ninayonggo ʼbisike o. Eti paga, nit nen at ebe dikogo ninilu atluk, nit ninebe niniluk dogolik, at ake motogo kagako dogowagaluk, at enggaerek obatne paga yi mende ndi mende woknisasikemo inde agosik werek. 4It akoni agat oba yoma yi mende ndi mende warlok nen, inendainggen nen nasinem inobabut weyak kagatluk weyak ambiligogi mende eti togot diyalok lo dukiluk, Allah obabut waganuwagaluk, pano mende woknisiligogo o. At nen elalinat kagakonem pogorako mondok werek mende etnogo nen,
“Yi mende ndi mende onggo paga waganusak erlok dek. Pano mondok nggok mende, wokisagin werek o,” yiluk abok yoknisasike eti ebe woknisiligogo o. 5Eti paga, kit eti mende inde asubagik nen yiluk, arlenggen togo kagako dogono o. Kinendainggen Kristus oba panggot diluk werek mende eti oba dukogo, inobabut motogo kagarigogi eti mende inde atluk kagako dogono o. Motogo kagako dogolik, eti mende oba dukogo, Allah ebe inilu arigogo mende eti inde atno. 6Allah ebe kinilu dogolik, eti mende oba dukogo, inendainggen sebekogo werek mende eti inde atno. Kinendainggen sebekogo dogolik, eti mende oba dukogo, yi ake ndi ake kagako dogolik, inobakanini kambuk yiluk werek eti mende, inde atno. Kinobakanini kambuk yiluk dogolik, eti mende oba dukogo, Allah apma dogolik, at akla warlok ambaligogo mende motogo kagarigogi mende, inde atno. 7Allah akla warlok ambaligogo mende motogo kagako dogolik, eti mende oba dukogo, inagarlagi inirugi Allah aʼburi inaʼbuwarogo werek eti mende, inde atno. Kinagarlagi kinirugi Allah aʼburi inaʼbuwarogo dogolik, eti mende oba dukogo, akoni inebe taʼbokogonat inendainggen kunik werek eti mende, inde atno. 8Kit kinobabut eti mende taʼbokogonat inde atluk, alep-yabungga nggokogo inde atluk dogogun eti paga, we yugunat wirlikogo welagidek, ninewe Endaganggok Yesus Kristus dikogo kinilu asugun o. 9Esigit diluk mende, it kit mende amberek nen inobabut eti mende inde agidek dogogun kalok, inilenggen amum atluk walegat nen kausak erlok dek werek. Esigit diluk dogolik, it nen,
“Weyak kagako lagagu mende, Allah nen sobal ninakike,” yiluk yusak mende, at obarlikmat diluk werek o.
10Eti paga, nagarlagi nirugi o. Kinebe Allah nen mikinakikesik, kinayonggo ʼbisike eti eberogonat kagat lasuwagaluk, kit nen kinobatnerogo kagako dogono o. Esigit diluk kagako dogogun kalok, kinendainggen Allah oba panggot diluk werek mende togot diyalok dukugun dek o. 11Ninewe Endaganggok Yesus Kristus ndil ninabigogo mende etnogo, nggok mondogat dogoginmo etoma ʼbinagi unggisi dogolik, at nen,
“Kit kinebe indewerek o,” yiluk, keyagi warogo panorogo wokisek unggigin o.
12Eti paga, wene ebe wene kinilu agagisip kinendainggen korlerogo pago werek mende, an nen wene yigi eti pasik kibitngge-yogongge kinakla ebet dinagasi mondok dogogin o. 13-14At ninewe Endaganggok Yesus Kristus nen yoknikike kagat, an nebe naberlal mende elalma ake werek yi, nonggorlogo togot diyalok ligin korogat werek, yiluk an nilu eti paga, yogondak nebe niluk werek ya paga, wene eti ake kinakla eberogo yokisasi mondok dogusak embaligogo o. 15Yabunggane nebe watlasumo, wene eti kit kinakla eberek mondok dogobagik nen yiluk, panorogo yokisasi dogogin o.
“Yesus ebe pogorarigogo mende yigit diluk ninilenggen kasugu,” yiluk yogisasike wene
16Ninewe Endaganggok Yesus Kristus obatneyak etnogo ebe wagike mende pasik kinilurogo yokisaligogi eti, wene siyonggane akoni inakla nggagalogo mbileligogi mende eti oba lisogo yokisaligogi dek o. At te, at ebe Endaganggok mende wagikemo, ninenggaerek ninilenggen dombok kasugu mende nen yokisaligogi o. 17Nit o etoma werekma, ninombae Allah nen, at Yesus ebe pogorakik, keyagi wakik, kagakonem nit ninasuk kolkugu. At Allah ebe nggogat pogorako mondok werek mende etnogo nen,
“An naʼbut nendainggen kunik mende nakla arlenggen kiligogo ebe etiat o,” (Mat. 17:5; Mrk. 9:7; Luk. 9:35)
18yiluk, ane mbogot oba nen wusa ʼbi wagonem, nit Yesus ninom ndom Allah enggaerek andom unggul eti paga dogolik ninasuk dombok kolkugu. 19Esigit diluk kolkugu eti paga, ninakla nen,
“It ap Allah wene yogisasi laguka mende nen yisuka mende eti eberogonat,” yiluk alebat ʼbugurlagat negen ambasi lagagu mende, yabunggane ninasuk kolkugu eti paga, mondok dikogo didisugu o. Eti paga, o amum mondok werekma, akoni nen isagal yibarlogo ʼbisinem, liyarogo mondok werek eti kak, wene eti kinendainggenma eberogo mondok waganggo dogono. Esigit diluk waganggo werekma, yabunggane o amum mende widisi nggorlek, kusagal kuben duki wirigogo eti kak, at Kristus kinendainggenma liyat kinabi wisigin o. 20-21Wene Allah wene eti it akoni inakla nggagalogo omanggi yisuka dek o. Inebe akoni mendeat, Allah Agurengge nen inakla nggagalogo yanggul isasi nggorlek, Allah nen yisike wene eti yogisasi laguka eti paga, wene Allah wene kolal mbalogo ʼbisuka mende werek eti, Allah Agurengge nen ninakla nggagalkidekma, ninenggaerek ninarligat nen dikogo didusak erlok dek o.
Currently Selected:
2Petrus 1: DNA
Highlight
Copy
Compare
Share
Want to have your highlights saved across all your devices? Sign up or sign in
