2Korintus 9
9
Allah aʼburi nen inagarlagi inirugi amberek yamagiyausak wene
1An nen, kit it Allah aʼburi o Yudea mende yamagiyawogoluk nandoko lagap mende eti ake, wene kolal mbalogo kinoba laʼbi wisusak dek mende laʼbi wagi o. 2Kit nen it eti yamagiyawogoluk arlenggentogo kagako lagap eti, kinobabut an nilu. An nen kit pogot kinako dogolik, it akoni o Makedonia yoma men yogisasi lagi,
“Tahun alep eti paga, it akoni o Akhaya etoma mende nen it eti esigit diluk yamagiyawogoluk it mende nandorlogo ʼbisukama werek,” yiluk pogot kinako lagi. Kit arlenggentogo kagako lagap eti paga, it akoni yoma amberek inebe dogalegat nen it eti ʼbiyawogoluk inendainggen aborlok yiligogoat. 3Kit kinobabut kagako lagap eti paga, nit nen pogot kinako lago mende eti,
“We yugunat pogot kinako lagoma,” yiluk yunogo yiluk, kit nen an yigi kagat ʼbiyalok dogobagik nen yiluk, ninagarlagi kinoba laʼbiya wagi endi. 4Laʼbiya wagi endi, kit nen awan nandorlogo ʼbiyigidek werekma an akoni Makedonia mende ninom kinoba wisusak erlok dek o. Alebat an nen yisi dogolik,
“It esigit diluk eberogonat pano kagasugun o,” yiluk yisigisikmo, an nenggarli agik, kit kinenggarli agik, asunogo yiluk, it ndak laʼbiya wagi endi. Kit nen wene eti ake didisigisipmo, kit kinenggarli asunogo yiluk yokisausak dek mende yigi o. 5Esigit diluk awan nandorlogo ʼbigidek dogogun kalok erlok dek eti paga, an awan wagidek dogolik ninagarlagi eti ndak laʼbiya wisigiluk yigi o. It kinoba witluk nen, kit nen ʼbiyawogoluk abok yisigip mende etnogo, it nen arat nandorli wisuwagaluk inakla nggagalogo yogisasi lagi. An esigit diluk kagako lagi eti, kit nen kinamende warlok werek nggorlek it inane obatnerogo kinakla nggagalumo ʼbiyausak erlok dek o. Kit kinendainggen nen at ʼbiyalok werekma pano, yiluk kagako lagi o.
6Wene eti ake yigin yi kinakla ebetni. It akoni amberek nen ai ʼbugurlagat yarigogi mende, enggen ʼbugurlagat mbalugun o. Nen, it amberek ai nggokogo yarigogi mende enggen nggogat mbalugun o. 7Akoni inakla arlenggen mondok kasi dogolik it amberek ʼbiyiligogo mende eti, at Allah nen inebe inaʼbuwa dogoligogo mende eti paga, kit kinebe dombok kinamende warlok werek nggorlek, it amberek nen kinakla obatnerogo nggagalkonem ʼbiyausak erlok dek o. Kit kinakla pano dogolik, kinenggaerek kinakla nenat nggagalogo ʼbiyausak o. 8-9Akoni inobabut pano kagarigogo mende ake, Allah wene paga kolal men yiluk mbalek werek,
“It nen pano mende akoni ya wogisigik, nda wogisigik, sumburisasi dogolik, it amberek inamende dek mende sumburisiligogi. Inobabut pano nen wogisaligogi eti, Allah nen akla eberek mondok dogogin o,” (Mzm. 112:9)
yiluk kolal mbalogo ʼbisuka kak, at Allah obabut pano nen, yi mende ndi mende oba dukogo wokisasinem, kit nen kibitngge-yogongge kinenggaerek kinake erlogat dogolik, oba dukogo it amberek panorogo yamagiyasi dogobagik nen yiluk, Allah nen erlogat wokisausak werek o. 10At Allah nen it ai yarigogo mende ai wogisigik, kimbiri ebe nowagaluk wogisigik, kagarigogo mende. Esigit dilugat, akoni nen ai yasuwagaluk mbalisiligogi kak, at nen, kinobabut it amberek yamagiyasi dogusak eti mende wokisigik, nen ai yakonem enggen nggokogo yisu kak, it amberek kinaʼbuwa nen yamakiyasinem nggogot digik, kagasigin o. 11Esigit diluk wokisamo, kit nen, yi mende ndi mende oba dukogo dogolik, kininggi nggogat it amberek yamagiyasi dogogun o. Esigit diluk yamagiyagun mende eti, nit nen sumbusogo wogisasinem, Allah keyagi wasugunat o. 12Kit akoni inaʼbuwa nen yamagiyagun eti paga, Allah aʼburi ininggi dek mende erlogat waganggo dogogun eti arlek ʼbuk. At te, ndindu asu kak, akoni dogalegat nen Allah keyagi nggokogo wako dogogunat o. 13Esigit diluk yamagiyasi dogogun eti paga, it Allah aʼburi o Yudea mende nen,
“It akoni Korintus mende Kristus kagakike wene pano wene etnogo waganggukasik,
Ninobabut mot-mot kagako dogogun o, yiluk yisuka ndak-ndagat kagarigogi. Esigit diluk kagako dogolik it mende amberek warlok agidek nit yamak niyigik, it amberek taʼbokogonat yamagiyigik, kagaka o,” yiluk kinobabut enggagat kiyalok Allah pogorasugunat o. 14Esigit diluk pogorako dogolik, it nen,
“Allah obabut pano etnogo nen it nen akoni nggokogo yamagiyasi dogowagaluk inobabut eti mende wogisekemo kagarigogi,” yiluk kinebe kinaʼbuwa dogolik Allah ayonggo nggokogo ʼbisi dogogun o.
15At Allah nen pano mondok nit nen mbilelogo yusak erlok dek mende woknisasike eti ake pogorako doguwok o.
Currently Selected:
2Korintus 9: DNA
Highlight
Copy
Compare
Share
Want to have your highlights saved across all your devices? Sign up or sign in
