2Korintus 7
7
1Eti paga, nagarlagi nirugi o. Kinebe kinaʼbuwa o. At Allah nen esigit diluk dogogun yiluk abok yoknisasike eti paga, ninebe nen, ninendainggen nen, weyak kagako mende eti, ninenggaerek nen panorogo korogo togot diyawok o. Esigit diluk togot diyalok, Allah ebe ninayuk dogolik, ninebe at ake ʼbiluk doguwok nen, ninendainggen ʼbogokogo korlet disi doguwok o.
Akoni o Korintus mende inobabut kwalagukama Paulus akla arlenggen kasike wene
2Nit ninake, ninebe wokninabu kak kinendainggen kunik dogono o. Nit nen, ap omanggi kit mende weyagat kinakik, kaiyet dinagagik, nuket dinagagik, kagako dek o. 3An nen alebagik yokisasi dogolik,
“Kit kinebe ninendainggen oba kunik mondok werek o. Eti paga, ninom watlasumo watlasusagat o. Nen, ninom niniluk dogumo, dogusagat o,” yiluk esigit diluk alebagik yisigi eti paga, yogondak, wene yokisigi eti, wene kinoba ʼbigiluk yigi dek o. 4An nakla nen, kit pano kagasugun, yiluk nendainggen ʼbogok kogo dogolik pogot kinako mondok dogoligogo mende o. Esigit diluk dogolik, it akoni amberek nen weyagat ninabuwogoluk yi aik ndi aik kagat ninako nggorlegat, an nakla mondok pano dogolik, nakla arlenggen nggogat kiligogo o. 5Nit o Makedonia yoma wagugusik werekma, ninoba dirluk yiluk dekmaat, weyagat ninabuwogoluk yi aik ndi aik kagat ninakuka o. Akoni amberek nen ninasuwogoluk kagakonem, nit ninendainggen ninayuk kigik welago. 6Werekma, at Allah obabut, akoni nen,
“Ninggit diluk kagasugun,” yiluk inakla weyak atlukmo panot inabigogo etnogo paga, at Titus laʼbi wagama wagasik nen nakla panot nabi waga. 7At Titus ebe waga eti paga arlek nakla pano aga ʼbuk. Kit nen kagakonem at akla pano aga mende eti, yoknisi waga eti paga, nakla panot nakeat o. Kit nen,
“At Paulus ninom abuk atlep,” yiluk noba ebekik,
“Ninobabut nen weyak kagakugu,” yiluk kinakla ambigik, it amberek nen an nabok yisinem, kinendainggen oba nenat an werekmangge wagik, kagakep mende eti mbilelogo yoknisi wagama nakla arlenggen mondok nggok kigi o. 8Esigit diluk nakla arlenggen kigi mende, an nen surat alebagik mbalogo kinoba laʼbi wagagi etnogo nen,
“Inakla weyagat inakigi eti, togot dusak mende nobabut nen laʼbisigi o,” yiluk nakla ambasi lagi dek o. At te,
“Nobabut nen omanggi ake inakla weyagat inaki,” yiluk nakla ambasi lagarik mendeat, 9yogondak nakla arlenggen kiligogo o. Kit kinakla weyak aga eti paga nakla arlenggen kiligogo ʼbuk. Kit kinakla weyak aga eti paga, kit weyak kagakigip mende togot diyalok kinobabut kwalagap eti paga, nakla arlenggen kigi o. Kit kinakla weyak agap eti, at Allah akla ambasike pagaat weyak aga o. Eti paga, nit nen nuket dinagago yiluk yusak dek o. 10Akoni agat oba mende nen inakla nggagalkonem, inakla weyak nen, inebe watlarigogi mende, at Allah akla ambaligogo paga inakla weyak atluk, weyak kagarigogo mende togot diyalok inobabut kwalagonem, Allah nen panot inabigogo. Panot inakonem,
“An nakla weyak aga paga, nobabut nen nobabut kwalagi,” yiluk yabunggane inakla munini eberigogi dek.
11At Allah akla warlok ambaligogo paga kinakla weyak atluk nen,
“Nobabut nen weyak kagakima,” yiluk kinobabut kwalatluk nen, pano mende obatnerogo kagakik, wene kinoba dek mot-mot kagakik, kinakla agaga dagagik, kinayuk agik,
“Paulus ninom abuk atlep,” yiluk noba ebekik, kinakla aganggen sok-sok kagakik, at weyak kagakike mende eti inggirluk oba wula ʼbiyigik, kagakep eti kani! Esigit diluk kagako dogolik kit weyak omanggi kagakidek wene kinoba mende nggorogo mondok laʼbiyegep o. 12An nen kolal mbalogo kinoba laʼbi wagagi mende, at ap omanggi weyak kagakike eti ake laʼbi wagagi ʼbuk. Nen, at weyak kagakike eti paga it amberek weyagat inakike mende eti inake laʼbi wagagi ʼbugat o. Eti, kit kinenggaerek kinakla nen,
Nit Paulus agarlagi inom ninendainggen kunik it inake obatnerogo kagasusak werek kigi,” yiluk Allah il obaat, kinenggaerek kinaren mbalubagik nen yiluk laʼbi wagagi o. 13Laʼbi wagagimo kagakep eti paga nit ninakla pano aga.
Eti ake ninakla pano agaat. Nen, at Titus kit taʼbokogonat nen ebe waganggesip pano kagakonem, akla pano aga mende mbilelogo yoknisasinem, ninakla arlenggen mondok kogoat o. 14An nen alebagik Titus yogoko dogolik,
“It yabunggane pano kagasugun,” yiluk pogot kinako lagagi kak kagakepma, an nenggarli kigidek o. Nit nen yi wene ndi wene eberogonat dombok yokisasugu kak, at Titus yogoko dogolik kit pogot kinakugu eti, eberogonat o. 15At nen kit kinebe endainggen kunik welaga mende, ebe kinoba wagama, kinayuk agik, kinowak del kigik, kagako dogolik at ebe waganggesip, at nen yokisasinem, ane kologo kagakep mende eti, kinoba ebet kinako dogolik, kit taʼbokogonat kinebe kinaʼbuwa mondok kiligogo o. 16Nen, an nen,
“It yi mende ndi mende pano dombok kagako dogogun mende,” yiluk nendainggen kinoba dogolik nakla arlenggen kiligogo o.
Currently Selected:
2Korintus 7: DNA
Highlight
Copy
Compare
Share
Want to have your highlights saved across all your devices? Sign up or sign in
