2Korintus 4
4
“Pano mende, iyak yenggalasusak mende akla kenago werek,” yiluk yogisasike wene
1At Allah ninebe ninaʼbuwa nen, at ake yigit diluk kagako dogowagaluk ninayonggo ʼbisike eti paga, ninakla mbuk atluk togot digidek kagakoat werek o. 2Nit, akoni nen yi mende ndi mende limago weyak kagatluk nen inenggarli arigogo mende eti togot diyasugu. Togot diyalok, akoni nuket diyigik, Allah wene omanggi mende oba lambelogo yogisigik, kagarigogi dek. Akoni yoma inakla dombok nen didinanuwagaluk, wene ebe wene Allah iloba selekmaat yogisilik liligogi o. 3Pano wene yogisilik liligogi eti, akoni amberek nen didiligogi mende, it akoni nuk arigogi mende, wene eti ake inendainggen amukak laberek werek o. 4Esigit diluk werek eti, it akoni agat oba mende inombae Iblis etnogo nen inendainggen Allah oba panggot digidek mende eti, inendainggen amumet inakikemo werek o. At Kristus Allah kagatma, ebe pogorarigogi wene, pano wene eti paga liyarinabusak mende, liyarinabunogo yiluk, inendainggen amumet inakikemo werek o. 5Wene yogisilik liligogi eti, ninenggaerek kagarigogi wene ʼbuk. Dek o. At Yesus Kristus kagakike wene o. At Yesus ebe ninewe Endaganggok yiluk, nit at ake kit kinanduwanengge werek, yiluk yogisiligogi o. 6At Allah nen yisi dogolik,
“O amum eti akla nen liya atnek,” (Kej. 1:3)
yiluk yisike etnogo kak, at nenat nit ninakla amum mende eti liyat ninakikemo werek o. Esigit diluk dogolik, at Kristus elokonggen aʼbigil yakonem ninilenggen lakalok nen, at Allah pogorarigogo mende etnogo ebe endigirlik yiluk didisi dogowagaluk esigit diluk liyat ninakike.
7Nit wene yigit diluk yogisalik nokonem, akoni inilenggen niyasi dogolik, inakla nen,
“It inobatne dek. At Allah obatne mondok werek kigi,” yiluk enggagat didisi dogowagaluk, iyak agat mende kagarogo kenasusak kak, pano mende eti nit erlok dek mende ninakla ʼbinanggemo werek o. 8Akoni nen nit yi aik ndi aik kagat ninabigogi mende, ninebe mondok weyagat ninakidek werek. Esigit diluk kagat ninakonem, ninggit diluk kagasuʼbuk, ninobake mbalarigogo mende, ninendainggen kuni arigogo dek. 9It akoni amberek nen, weyagat ninabuwogoluk kagarigogi mende, at Allah nen ninarligat togot dinanggidek o. Ndugi ninakonem sogumpogo liligogo mende, ninebe mondok watlarigogi dek o. 10Watlagidek werek eti paga, at Yesus ebe watlagikesik iluk agikesik nen, nit ninakla iluk dogoligogo mende eti, enggagat asuwagaluk, at wakuka kak, nit kibitngge-yogongge ninasuwogoluk kagakonem ndil ninabigogo o. 11At Yesus watlagikesik nen iluk agikesik nit ninebe watlarigogi mende yi ninakla iluk dogoligogo eti enggagat asuwagaluk, nit yogondak niniluk werek nggorlek, at Yesus ake kibitngge-yogongge ninasuwogoluk kagakonem ndil ninabigogo o. 12Akoni nen nit ninebe watlasuwagaluk kagat ninabigogi eti paga, Allah nen kit kinebe kinilugut kinabigogo o. 13At Allah wene paga kolal mbalogo ʼbisi dogolik, men yisuka,
“Nendainggen at oba panggot diluk dogolik nane yigi o,” (Mzm. 116:10)
yiluk yisikemo kolal mbalogo ʼbisuka ndak-ndak, nit nen ninendainggen at oba panggot diluk wene yogisaligogi o. 14Esigit diluk yogisasi dogolik, ninakla men ambaligogi. At Allah nen, ninewe Endaganggok Yesus suguluk ilugut disike eti kak, nit at ninom ndak-ndagat ninilugut ninabiluk nen, kit ninomat Yesus oba ʼbinani ligin yiluk ninilu. 15Nit yi aik ndi aik taʼbokogonat kasi lago eti, kit kinakeat o. Esigit diluk kasi lago paga, at Allah obabut pano mondok nen akoni amberek inaʼbuwa kigik, amberek inaʼbuwa kigik, inebe dogalegat inaʼbuwa kalok ndil inakonem, inebe dogalegat nen, Allah keyagi warigogi eti paga, it amberek nen Allah pogorarigogi o.
“Ninendainggen Allah oba panggot diluk kagako dogusak,” yiluk yogisasike wene
16Eti paga, ninakla mbuk atluk togot digidek aʼbetogo kagarigogi. Ninowado sikmangge yi, weyak ago nggorlek, ninakla akmangge, kibitngge-yogongge ngget kagat ninako mondok werek. 17Nit yogondak, yi aik ndi aik kagat ninabigogi eti, elalma ake ʼbugurlagat o. Mende, esigit dilugat kagat ninabigogi eti paga, yabunggane pogorarigogo mende ikok mondok dogogin mende mondok nggogat inde asugun o. 18Nit yi mende ndi mende ninilenggen kiligogi mende eti dek asigin mende. Ninilenggen kiligogi dek mende eti ikok mondok dogogin eti paga, ninilenggen kiligogi mende eti ake ninamborowak sebe yiluk kagakidek, ninilenggen kiligogi dek mende eti ake ninamborowak sebe yiluk kagarigogi o.
Currently Selected:
2Korintus 4: DNA
Highlight
Copy
Compare
Share
Want to have your highlights saved across all your devices? Sign up or sign in
