2Korintus 12
12
Allah nen yi wene ndi wene Paulus ilenggen kowagaluk aʼbingganggo paga yogokike wene
1An pogorakilik wago lagi mende eti, yusak dek mende, pogorakaginat o. Ninewe Endaganggok nen an nilenggen kowagaluk yoknekemo naʼbingganggo paga kigik, kimago mende ʼbunggalogo ʼbekemo kigik, kasigi mende yigin o. 2An 14 tahun alebat nilenggen kasigi mende it amberek inoba lisogo yigin o. Ap omanggi Kristus imbisak kunik welagike mende Allah nen mbogot oba kurli mbere agorek togot diluk kurli omanggi ombo etoma paga liyaʼbisike eti nilu. At eti ebeat liyaʼbisike a? Agurengge liyaʼbisike a. An nonggodek. Nombae Allah at ilu o. 3-4Ap eti Allah nen mbogot oba panoma etoma liyaʼbisikemo wene akoni nen yiligogi dek, nen yusak erlok degat mende asuk kolkike nilu o. Esigit diluk mende, ebeat liyaʼbisike a? agurengge a. An nonggodek mende, Allah at ilu yigi. 5Ap eti akeat pogorako dogolik, an nenggaerek nake pogorakigidek, nebe erlok dek eti akeat pogorakaginat o. 6An pogorakagin kalok, nane eberogonat yigin eti paga, akoni nggembu mende nen yiligogi kak yigin dek o. Esigit dilugat mende, akoni amberek nen an kiligogo eti mende ake pogot nabunogo yiluk, nebe inilenggen niyigik, nane inasuk kolkik, kagarigogi eti paga didanuwagaluk, omanggi eti mende yigidek togot digin o. 7-8An nen,
“Naʼbingganggo paga elalinat nilenggen kigi eti nayuk o,” yiluk nenggaerek nen pogorakaunogo yiluk, akoni inebe paga arlok unggisinem kenet warigogi kak, u noba agonem kenet wako dogowagaluk, noba ʼbanggikemo, Iblis nen ayonggo ʼbisike mende kak noba werekma, ninewe Endaganggok nen kenogo wula ʼbanuwagaluk ninggi kenagan oba ayonggo ʼbigi mendeat, 9at nen,
“Kat erlok dek kalok, an nobatne korleyagatma kebe kaʼbuwa kiligogo etnogo nen, erlok pano dogogin o,” yiluk yoknikike. Esigit dilugat yoknikike eti paga, at Kristus obatne an nakla ʼbanggike mende etiat dogowagaluk, an yi mende ndi mende ake erlok dek dogolik, nakla arlenggen togo pogorakasi dogogin o. 10Eti paga, an Kristus ake, nebe erlok dek agi kalok, akoni nen nabok weyak mbalko kalok, wiyik-weyakogo kagat nako kalok, yi aik ndi aik kagat nako kalok, wim ako dogolik inasuwogoluk koboriyegarek kak kobot niyasi kalok, an erlok degat werekma, eti paga nobatne arigogo yiluk nakla arlenggen kiligogo.
Paulus nen Allah aʼburi o Korintus mende inake endainggen pisik welagike wene
11It ap Kristus nen inayonggo ʼbiluk laʼbiya wirigogo mende negen kagat latluk witluk,
“At Paulus endaga dek,” yiluk yiligogi eti, an eberogonat nendaga dek. It nggokndek inendaganggok kigi! Esigit diluk dek o. Kit nen didaniluk nalon palogo yoknisusak mende, esigit diluk yiligogi dek eti paga, eberogonat ap nggembu nen yiligogo kak, yokisigi o. 12Kit nen,
“Paulus eti, Kristus nen ayonggo ʼbiluk laʼbi wagikemo,” yiluk enggagat didanuwagaluk an ninom dogolik yi mende ndi mende ake nobakanini kambuk yiluk werekma, akoni nen diduwagaluk, Allah nen obatnerogo yi mende ndi mende elalinat kagako lagike. 13An nen kit kinake kagarigogo mende eti, it Allah aʼburi yi ai ndi ai nandorligogi mende ake kagarigogo mende eti imbisak walkamo, nggi mende ake kaiyet kinaki nogo. An yabu kagako lagi ake,
“Ninggi onggo omanggi woknitni,” yiluk nggino kinoba anggin togo yokisigidek welagagi eti weyagat kinaki a? Eti paga, weyagat kinaki eti ake sagalogo deget diyalok kinakla pano atni o! 14An alep ninggi mbere paga kinoba wagagisik, yabunggane omanggi wisigiluk nggarelogo ʼbigirik werek o. An kinoba wisigin eti, yi mende ndi mende inaʼburi nen inagoya-inombae agarlagi inom kweyago wogisaligogi ʼbuk. Dek o. Inagoya inombae agarlagi inom nen, inaʼburi inake kweyago wogisaligogi eti paga, kit mende yi mende ndi mende nggino kinoba anggin togo yokisa wisigin ʼbuk. Dek o. Kinebeat kweyakinabik wisigin o. 15Eti kak, kinendainggen ake an namende yi mende ndi mende ʼbinagagik, nebe inom ʼbinagagik, nendainggen oba nen nakla arlenggen kasi dogolik ʼbinagusagat ʼbinagagi o. An kit kinebe nendainggen ndurlem werek eti paga, kit nen, an nebe kinendainggen kunik dek negen dogusak nogo? 16An nen, kit kinoba angginet dunogo yiluk kit mende nggino yokisigidek eti enggagat werek. Mende, kit amberek nen yisi dogolik,
“At Paulus obabut nggauk nogo nen, yi mende ndi mende sabusagaluk, ane ʼbindokogo yoknisiligogo,” yiluk yiligogi o. 17Esigit diluk yiligogi eti, an nagoromi kit kinoba laʼbiya wagagi yomenogo nen, kit mende amberek sabusogo an woknisi waguka nogo? Mondok dek o. 18At Titus kinoba wasuwagaluk akla nggagalkigisik nen, ninagarlak Allah aʼbut omanggi at imbisak laʼbiya wagagimo waguka etnogo, wagukasik, at Titus nen kit nen ʼbisigip mende amberek ndilogo korlasike nogo? Mondok degat o. An Titus nimbisak, ninobabut omanggiat kagako lagagu dek nogo? It amberek alep iniyok ʼbilik lagakarekma, it amberek yabunggane oba dukogo ʼbilik lagakarek kak, at Titus an nimbisak yabu mot-mot kagako lagagu dek nogo? 19Kit kinakla nen,
“At Paulus wene enggaerek oba nggogologo yiligogo,” yiluk paganeat nen yisi lagap mende, an esigit diluk ambaligogo dek o. Nagarlagi nirugi o. Kinebe kinaʼbuwa o. At Allah il oba, an Kristus nimbisak kunik dogolik yiligogo o. Yi mende ndi mende kagarigogo eti, kit kinendainggen korle asuwagaluk kagarigogo o. 20An yabunggane kinoba wisigin eti witluk, an nen,
“It inobabut pano werekma ligin,” yiluk ambaligogo kak dek. Weyak werekma ʼbikiya wagik. Nen, kit nen,
“At Paulus obabut pano,” yiluk yiligogi kak, dek. Nobabut weyak dogolik ʼbikiya wagik, kagasunogo yiluk, nendainggen pirigogo. Kit-kit kinom wenemuk akik, uwa mbalkik, kinakla agaga dagagik, kinenggaerek kinakeat kagakik, inabok weyak selekma mbalkik, limago mbalkik, kinenggaerek nen pogorakigik, yugunat-yaganat kagakonem an wisusak eti, nayuk. 21Esigit diluk kagakonem, an wagonem, nombae Allah nen kit kinobabut kagako lagap eti ake kit kinil oba nenggarli warogo korek ʼbanusak eti nayuk. It akoni kit mende amberek dogalegat nen kumi inagoni werek mende, ap inagugi werek mende nen yogot paʼbiyigik, korlak sarlisik mende elege nen paʼbiyigik, inenggarli dek weyak mondok kagakik, o paganeat nen kagarigogi mende togot diyalok inobabut kwalagidek mondok dogoligogi eti ake, de asi wisunogo yiluk nendainggen pisik werek o.
Currently Selected:
2Korintus 12: DNA
Highlight
Copy
Compare
Share
Want to have your highlights saved across all your devices? Sign up or sign in
