1Timotius 1
1
Keyagi wakike wene
1-2Timotius naʼbut o. Kendainggen Kristus oba panggot disigin eti paga, an naʼbut eberogonat agaginmo, wene yi an Paulus nen kolal mbalogo koba laʼbi wagi o. At Allah ndil ninabigogo mende inom, Kristus Yesus nen panot ninabigin yiluk ninakla ambasi lago mende etnogo inom, imbisak nenat nayonggo ʼbiluk, at Kristus Yesus ake kagako dogowagaluk laʼbani wagukama wagagi o. Ninombae Allah inom, ninewe Endaganggok Kristus Yesus inom, imbisak inobabut pano etnogo nen, pano mende wokigik, kaʼbuwa kigik, kendainggen kambugut dagigik, kagako dogowak o.
Timotius nen it akoni amberek inasuk motogo wako dogowagaluk yogokike wene
3An o Efesus nen o Makedonia yoma wisigiluk, kat kakla nggagalogo wene men yiluk yokikigi ambigi,
“Kat kebe o yoma dogono. Dogolik it amberek nen wene ebeat mende dek. Ninat mende yanggul isiligogi mende eti yigidek puk asuwagaluk inasuk wako dogono. 4It eti nen, wene siyonggane inenggalat mbilelkik,
Ninebe esigit diluk endak larik wagagu, yiluk wene erloma nen mbal digidegat mbilelik mondok lagik, yiligogi eti mende paga inendainggen eberek mondok dogunogo nen, yigidek togot diyawagaluk inasuk watnoat,” yiluk yokikigi ambigi. Wene eti mende yisinem, ebe wene ninendainggen Allah oba panggot diluk werekma, at nen panot ninabigin eti mende nggok arigogo dek o. Ilugun oba inane nggogat sagaligogi o. 5Inendainggen Allah nen korinakonem inenggaerek inakla nen,
“An wene noba dek, nakla siyak werek,” yiluk ambasi dogolik, inendainggen eberogonat Allah oba panggot diluk dogoligogi eti paga, akoni inaʼbuwarogo werek o. Eti paga, it esigit dilugat dogowagaluk inasuk wako dogono o, yiluk yokigi o. 6Mende, it amberek nen inobabut pano kagarigogi eti mende kagako dogoluk nen, togot diyalok mirlokogo, wirlikogo dek asigin mende etiat yisi dogolik, inenggaerek nenat nugakaligogi o. 7It eti nen,
“Wene Allah nen ninasuk wakike wene etnogo, nit nen yanggul isasi dogogun,” yiluk warlok nen yanggul isasi dogoligat mende, wene ebe didigidek inonggodek dogolik,
“Wene ebe yigit diluk o. Eberogonat dikogo yanggul isogo,” yiluk yiligogi mende, didigidek dogoligat yiligogi o. 8Wene Allah nen ninasuk wakike wene eti nit nen didiluk, kagasusak ndak-ndagat kagako dogogun kalok, pano o, yiluk ninilu. 9Eberogonat kak yi, wene Allah nen ninasuk wakike wene eti akoni motogo kagarigogi mende pasik yisike ʼbuk. At te, akoni inasuk warek dek koluʼbuk kagarigogi mende inom, Allah inaʼit dogolik weyak kagarigogi mende inom, inebe Allah ake ʼbiyigidek Allah wene sagalogo kagarigogi mende inom, inombae inagoyalak inebe mondok inarigogi mende inom, akoni amberek yugunat inebe mondok inarigogi mende inom, 10ap nen kumi inil arurlu paʼbiyigik, ap-ap kumi-kumi pak-pak yigik, kagarigogi mende inom, akoni amberek inaʼburi mende ininggi abusak limaginabigogi mende inom, inenggalat yiligogi mende inom,
“Wene eberogonat yigin,” yiluk Allah endaga mbaliluk nen, nuket diyiligogi mende inom, it taʼbokogonat esigit diluk kagarigogi mende pasik yisike. Nen, it amberek inobabut ebe wene panot ninabigogo wene eti sagalogo togot diyalok nggorlo kagarigogi mende taʼbokogonat an yigidek mende amberek pasik inomat yisike. 11Nen, wene eti motogo, pano wene etnogo an nen yogisilik noko dogowagaluk noba ʼbisike. Pano wene eti, Allah pogorakik, keyagi wakik, kagarigogo mende etnogo aneat o.
Allah keyagi wakike wene
12-13An alebagik, Yesus abok weyak mbalkik, ebe nakla nen kai diluk Allah aʼburi mende yi aik ndi aik kagarinakik, kagako lagagi mende, ninewe Endaganggok Kristus Yesus naʼbuwa niyasikesik,
“Kat nen yabunggane an nake kobabut dombokogo erlok kagako dogogin,” yiluk, wene yi an noba ʼbiluk nayonggo ʼbigik, obatne woknikik, kagakike o. Esigit diluk weyak kagako lagagi etanem, an nendainggen ninewe Endaganggok Kristus Yesus oba panggot digidek dogolik, esigit diluk kagasusak dek mende, nonggodek nen kagako lagagi eti paga, at nen nebe naʼbuwa niyasike eti paga, keyagi warigogo o. 14Eti, at ninewe Endaganggok Kristus Yesus obabut pano nen nggokogo naʼbuwa niyasikesik, nobabut at inom kunik dogolik kagarigogi kagat, nendainggen at oba panggot digik, akoni amberek inaʼbuwarinakik, nggokogonat kagako dogowagaluk, nebe woknakike o. 15Akoni weyak kagako werekma Kristus Yesus nen ninebe ndil ninabigiluk agat oba yoma wusa wagike yiluk yigi eti akoni nen,
“Wene eti eberogonat,” yiluk dikogo waganusak mende. Akoni amberek weyak ʼbugurlagat negen kagarigogi mende ogwe, anat, weyak nggok mondok kagako lagagi o. 16Mende, it akoni amberek yabunggane inendainggen Yesus oba panggot disinem iniluk mondok dogowagaluk, kagarinabigin mende inakla nen ambasi dogolik,
“Paulus weyak kagako nggorlek, Kristus Yesus akla mbuk agidek mondok welagikesik nen, aʼbuwa atluk ebe waganggike eti, at nen akoni weyak kagarigogi mende esigit diluk woginabigogoma kigi,” yiluk, Allah obabut enggagat diduwagaluk, an ndak esigit diluk woknakike o. 17Ninombae Endaganggok Allah eti arligat o. At ebe ninilenggen kiligogi dek. Walsenak ikok mondok dogoligogo mende etiat o, yiluk, pogorakik, keyagi wakik, kagako mondok doguwok o, yiluk,
“Amin,” yigi o.
18Timotius naʼbut o. An wene yi kasuk warogo yokisik. It amberek nen wene alebat kat kenggaerek pasik yisi dogolik,
“At esigit diluk kagako dogogin,” yiluk yisuka kak, pano wene yi pasik, wim inobatnerogo abigogi kak, kobatnerogo yogisasi dogono o. 19It amberek nen wene eti eberogonat yiluk waganiluk nen, inakla siyakogo dogusak mende, yabunggane weyak kagarigogi eti paga, nggu ima mak-makogo wusaligogo kak, korla wusega. Kat eti ndak-ndak kagakidek, kakla nen,
“An weyak omanggi kagakidek, nakla siyakogo werek,” yiluk kendainggen Allah oba panggot diluk kobatnerogo kagako dogono. 20It weyak esigit diluk kagarigogi eti inebe amberek, Himeneus Aleksander imbisak nen Allah abok weyak mbalko lagukama, yabunggane inobabut kwalatluk weyak kagakidek togot duwagaluk inebe Iblis wogokima werek o.
Currently Selected:
1Timotius 1: DNA
Highlight
Copy
Compare
Share
Want to have your highlights saved across all your devices? Sign up or sign in
