1Petrus 3
3
Kumi ap inagoni inagugi inom inobabut kagako dogusak wene
1-2Eti kak, kit kumi amberek kinagoni Allah wene waganggidek mende kalok, nena paga waganusak ambegep? Kinane yogisagun oba ʼbuk. Kinobabut kinilaga iyokogo kinagoni inane kologo kagakonem, it nen inilenggen kiyalok Allah werekmangge witluk ane waganuwagaluk, kinenggaerek kinagoni dombok inapma unggiluk inane kologo kagako dogono o. 3Kinoba panorogo, kinowado sikmangge mende pasik waganggo dogogup. Eti, kinisi dalkik, kinobanggengge emas mende waganggik, su pano onggo nggogat mende yikik, kagako dogogup o. 4At te, kinoba panorogo eti kinendainggen ake limago mende eti waganggo dogono. Eti, kinobabut mondok dogogin mende enago welagik, kambukogo welagik, kagako dogono o. Kinobabut Allah il oba esigit diluk kagakonem, at akla nen pano mondok ambaligogo etiat o. 5Paganeat it kumi Allah aʼburi mende inendainggen Allah oba panggot diluk dogolik, inoba panorogo esigit dilugat inagoni dombok inapma dogolik inane kologo kagako laguka. 6At kwe Sara esigit dilugat agun Abraham apma dogolik ane kologo kagako dogolik, keyagi,
“I, nombae o,” yiluk wako lagike. Kit yogondakne, akoni nen kinayuk asuwagaluk kagakonem kinayuk agidek pano kagarigogi kalok, at Sara eyagiat werek o.
7Nen, kit ap nen, Allah obabut pano nen kinagugi kinom ndak-ndagat kiniluk mondok dogowagaluk indewerek ʼbinagakemo werek eti paga, kit sembayan yisinem Allah nen kinane asuk kolkidek togot dunogo yiluk, kinagugi kinom pano dogolik, kinakla nen,
“Kumi inobatne dek,” yiluk didiluk, inalon palogo inaʼbuwa kasi dogono o.
“Kinagarlagi kinirugi kinom naʼbuwa-kaʼbuwarogo kagako dogono o,” yiluk yogisasike wene
8Wene ilugun oba men yokisak. Kit kinebe taʼbokogonat kinakla nen,
“Ninebe Allah aʼburi ninagarlagi ninirugi ninom,” yiluk, kinendainggen kunik dogolik, kinakla omanggiat mende ambigik, kinendainggen omanggiat mende ebekik, kagako dogono o. Esigit diluk kagako dogolik, kinenggaerek nen pogorakigidek, kinendainggen sebekogo dogolik, kit-kit naʼbuwa-kaʼbuwarogo kagako dogono o. 9Akoni amberek nen kit weyak kagat kinakonem, kit nen onggo weyagarinakup o. Nen, inane aik dagok weyak yokisasinem, kit nen onggo kinane aik dagok yogisagup o. Onggo, Allah nen inebe panorinabuwagaluk, ayonggo ʼbisi dogono o. Yabunggane at nen pano mende wokisagaluk kinayonggo ʼbisike eti paga, kit nen onggo pano mende yogisasi dogono o. 10-12Wene eti pasik men yisuka,
“Akoni inobabut ninombae Endaganggok akla warlok ambaligogo mende motogo kagarigogi mende, at ilenggen inoba dogolik, sembayan ayonggo ʼbisinem inane asuk koligogo o. Mende, it weyak kagarigogi mende, elokonggen agaga wariyaligogo o. Eti paga, ta nen,
An niluk omanggi inom dogolep, kibitngge-yogonggeat pano mende dombok kagat lagonem kasi dogolep, iluk dogu warlok kalok, aʼbi paga weyak wene yigidek welagik, ambe paga nen enggalat akoni amberek nukerinakidek welagik, weyak mende omborlikngge togot diyalok pano mende dombok kagakik, obabut akoni amberek inom dambukogo pano werek eti mende nggogot diluk obatnerogo mutluk lagik, kagako dogusak o,” (Mzm. 34:12-16 = TB 34:13-17)
yiluk Allah wene paga kolal mbalogo ʼbisuka.
13Kit pano kagako doguwogoluk anggilukogo kagarigogi kalok, ta nen weyagat kinabusak nogo. Weyagat kinabusak dek o. 14Mende, motogo kagakonem weyagat kinako kalok, yi aik ndi aik kasi dogolik, kinakla arlenggen kasi dogono o. Kinayuk asuwagaluk kagat kinakonem, kinayuk atluk kinakla wene munini uwan ʼbero ebekup o. 15Kit nen Kristus kinayukogo pogorako dogolik,
“Ninewe Endaganggok at o,” yiluk kinendainggen oba nen pogorako dogono o. Pogorakonem, it amberek nen kinok kinoba waganggo dogolik,
“Pano asigin, yiluk oba eberek werek eti nenaluk,” yiluk yokisasinem, onggo wene dikogo yogisagun mende kinakla eberek mondok dogolik, 16kinane panorogo keyagi warogo yogisasi dogono. Esigit diluk yogisasi dogolik, kinakla nen,
“An wene noba selek o,” yiluk ambasi dogolik, Kristus kinom kunik dogolik, pano kagakonem, akoni nen kinabok weyak mbalugun mende eti inilenggen kiyalok inenggarli asugun o. 17Kit weyak kagakonem kinoba yi aik ndi aik kinobabut oba kasi dogogun weyak. Mende, kit nen pano kagakonem, Allah nenat,
“It yi aik ndi aik kowak,” yiluk ambasi kalok, pano o. 18Nit akoni weyak kagarigogi eti pasik nininggi ilugun oba, at Kristus yabunggane watlagidek dogigiluk omanggi pasigat watlagike. Ninebe Allah oba woknisek lagaluk, at obabut motogo kagarigogo mende nen, nit ninobabut nggorlo kagarigogi mende pasik watlagike o. Ebe nit akoni mende eti wakukama watlagike mende, agurengge mende eti, Allah nen ilugut disike o. 19Ilugut disikemo it amberek inamonggarengge kerle warek werekma wene yogisa lagike. 20Inamonggarengge eti, inebe paganeat at Nuh nen nggu nggok mende mberlako nggorlek, Allah obabut pano nen anggorlem werek nggorlegat, wene waganggidek togot diyalok weyak kagako mondok werekma i nggok salko dogolik inakukama watlaguka o. Esigit diluk inako nggorlegat, it amberek nggu nggok mende akla unggiluk welaguka mende, inebe 8 oba mbererlagat i nggok salkike eti paga ndil inakike o. 21It i paga ndil inakike eti kak nit yogondak ima wusaligogi eti paga ndil ninabigogo o. I paga ndil ninabigogo eti ima wusa ʼbinanggonem, ninowado i eti paga sobaligogi eti paga ndil ninabigogo ʼbuk. At te, ninendainggen oba nen wene ninoba selek asuwagaluk Allah ayonggo ʼbisinem, Yesus Kristus watlagikesik iluk agike eti paga ndil ninabigogo o. 22At ebe iluk agikesik nen, mbogot oba dagisikesik, Allah inggi ebengge nggok dogolik, malaikat Allah nen yonggo wusa ʼbiya wirigogo mende yomenogo inom, ineugi nggokndek mende inom, inobatneyak mende inom, pagisek werek o.
Currently Selected:
1Petrus 3: DNA
Highlight
Copy
Compare
Share
Want to have your highlights saved across all your devices? Sign up or sign in
